لاہور قلندرز ملتان سلطانز کو شکست دے کر پہلی بار فائنل میں پہنچ گئی

کراچی: پاکستان سپر لیگ فائیو کے دوسرے ایلیمینیٹر میں لاہور قلندرز ملتان سلطانز کو 25 رنز سے شکست دے کر پہلی بار فائنل میں پہنچ گئی۔
نیشنل اسٹیڈیم کراچی میں کھیلے گئے پی ایس ایل 5 کے ایلیمینیٹر ٹو میں 183 رنز کے ہدف کے تعاقب میں ملتان سلطانز کی ٹیم 19.1 اوورز میں 157 رنز پر ڈھیر ہوگئی۔ ذیشان اشرف 12 جب کہ ایڈم لیتھ نصف سینچری مکمل کرکے فخر زمان کے ہاتھوں کیچ آؤٹ ہوئے، شان مسعود 27، روی بوپارا ایک، رائیلی روسو 18 اور شاہد آفریدی صفر پر پویلین لوٹ گئے، سہیل تنویر بھی محض 3 رنز اور عمران طاہر بھی ایک رن بنا کر چلتے بنے۔ اس سے قبل ملتان سلطانز نے لاہورقلندرز کے خلاف ٹاس جیت کر فیلڈنگ کا فیصلہ کیا اور حریف ٹیم کو بیٹنگ کی دعوت دی۔ لاہور قلندرز کی جانب سے فخرزمان اور تمیم اقبال نے اننگز کا آغاز کیا تاہم قلندرز کی پہلی وکٹ 46 رنز پر گری جس میں تمیم اقبال 30 رنز بناکر آؤٹ ہوگئے جس کے بعد سہیل اختر آئے اور محض 5 رنز بنانے کے بعد رائیلی روسو کے ہاتھوں کیچ آؤٹ ہوئے۔ سہیل اختر کے بعد محمد حفیظ میدان میں آئے، انہوں نے اور فخر زمان نے محتاط انداز میں اننگز کو آگے بڑھایا تاہم وہ بڑی شراکت داری قائم نہ کر سکے اور 94 کے مجموعے پر محمد حفیظ 19 رنز بناکر پویلین لوٹ گئے جس کے بعد فخر زمان بھی 46 رنز پر لیتھ کی بال پر سہیل تنویر کو کیچ دے بیٹھے۔

لاہور قلندرز کے بین ڈنک کا ڈنکا بھی نہ بج سکا اور وہ بھی محض 3 رنز بنا کر چلتے بنے جس کے بعد سمت پیٹل نے 26 رنز بنائے اور ڈیوڈ ویزے 48 رنز کے ساتھ ناٹ آؤٹ رہے۔قلندرز نے تمام اوورز کھیلتے ہوئے 182 رنز اسکور کیے اور مخالف ٹیم کو فتح کے لیے 183 رنز کا ہدف دیا۔ ملتان سلطانز کی جانب سے شاہد آفریدی نے 2 جب کہ لیتھ، سہیل تنویر، محمد الیاس اور جنید خان نے ایک ایک کھلاڑی کو آؤٹ کیا۔
پاکستان سپر لیگ 5 کے دوسرے ایلیمینیٹر میں کامیاب ہونے والی ٹیم فائنل میں کراچی کنگز سے مقابلہ کرے گی۔


اپنی راہےکااظہار کریں

آپ کا ای میل ایڈریس شائع نہیں کیا جائے گا.