کراچی پولیس چیف نے ناکے پر تعینات پولیس اہلکاروں کے لئے نئی ہدایات جاری کردیں

تفصیلات کے مطابق کراچی پولیس چیف اے آئی جی ڈاکٹر امیر شیخ کا کہنا ہے کہ شہر میں پولیس ناکے ختم نہیں کیے ہیں، شہریوں کی سہولت کے لیے تمام ڈی آئی جیز، ایس ایس پیز اور دیگر متعلقہ حکام کواس حوالے سے نئی ہدایات جاری کی ہیں۔

جاری کردہ نئی ہدایات میں کہا گیا ہے کہ کسی بھی مقام پر چیکنگ کے لیے ناکہ بندی پوائنگ پر ڈی ایس پی، ایس ایچ او یا کسی اور ذمے دار پولیس افسر کی موجودگی کو یقینی بنایا جائے۔ شہر میں پولیس کے ناکے یا چیکنگ کہاں کہاں ہوں گی، علاقوں اور مقامات کی لسٹیں بناکر اعلیٰ پولیس حکام کو بھیجنے کا حکم دیا گیا ہے۔

ڈاکٹر امیر شیخ کا کہنا تھا کہ پولیس اہلکاروں کے موٹر سائیکل گشت کے لیے علاقے کی حساسیت کے حساب سے روٹ پہلے سے متعین کئے جائیں۔ تھانے سے علاقے میں ڈیوٹی پر روانہ کرتے وقت پولیس افسران گشت پر مامور اہلکاروں کی مکمل بریفنگ کریں۔

شہریوں کی تکریم کو ملحوظِ خاطر رکھنے کے لیے پولیس چیف کی جانب سے دی گئی ہدایات میں کہا گیا ہے کہ چیکنگ کے دوران پولیس اہلکار شہریوں کی عزت و تکریم کا ہر ممکن خیال رکھیں، چیکنگ کرنے والے پولیس اہلکار ترش یا رعب دار اور حاکمانہ اندازِ گفتگو ہرگز استعمال نہ کریں۔

ہدایت نامے میں یہ بھی کہا گیا ہے کہ پولیس اہلکاروں کی جانب سے ویران مقامات پر انفرادی چیکنگ اور شہریوں کو تنگ کرنے کا عمل مکمل ختم کیا جائے۔ چیکنگ کے بہانے نکاح ناموں کی طلبی یا منہ سونگھ کر شہریوں کی تذلیل کرنے والے پولیس اہلکاروں کے خلاف سخت ترین کارروائی ہوگی۔