Daily Taqat

ایل او سی پر بھارتی بلا اشتعال فائرنگ پر بھارتی ڈپٹی ہائی کمشنر کی دفترِ خارجہ طلبی

بلا اشتعال فائرنگ پر پاکستان نے شدید احتجاج ریکارڈ کرایا

پاکستان نے بھارتی ڈپٹی ہائی کمشنر جے پی سنگھ کو دفترِ خارجہ طلب کیا، لائن آف کنٹرول پر بھارتی بلا اشتعال فائرنگ پر شدید احتجاج ریکارڈ کرایا گیا۔ تفصیلات کے مطابق لائن آف کنٹرول پر بھارتی فورسز کی جانب سے بلا اشتعال فائرنگ پر پاکستان نے بھارتی ڈپٹی ہائی کمشنر جے پی سنگھ کو دفترِ خارجہ طلب کر کے واقعے پر شدید احتجاج کیا۔

دفترِ خارجہ کے ترجمان نے بتایا کہ 2 نومبر کو بھمبر سیکٹر میں بھارتی فورسز کی بلا اشتعال فائرنگ سے خاتون شہید ہوئی تھیں۔ ترجمان دفترِ خارجہ کے مطابق بھارتی فوج مسلسل شہری آبادی کو نشانہ بنا رہی ہے، بھارت 2018 میں 2312 بار سیز فائر کی خلاف ورزی کر چکا ہے۔

یاد رہے کہ 14 اکتوبر کو بھی بھارتی فوج نے کنٹرول لائن پر بلا اشتعال فائرنگ کی تھی، جس کے نتیجے میں 8 سالہ بچہ شدید زخمی ہوگیا تھا۔ پاک فوج کے شعبۂ تعلقات عامہ (آئی ایس پی آر) سے جاری بیان کے مطابق بھارتی فوج نے ایک بار پھر ایل او سی کی خلاف ورزی کرتے ہوئے چیری کوٹ سیکٹر پر بلا اشتعال فائرنگ کی۔

واضح رہے کہ 11 اکتوبر کو بھارتی فوج نے سیالکوٹ سیکٹر پر بلا اشتعال فائرنگ کی تھی، بھارتی فورسز نے سکھیال گاؤں کو نشانہ بنایا، کنٹرول لائن کی خلاف ورزی کی صورت میں محمد حنیف نامی شہری شدید زخمی ہوا تھا۔


Get real time updates directly on you device, subscribe now.

اپنی راہےکااظہار کریں

آپ کا ای میل ایڈریس شائع نہیں کیا جائے گا.

Translate »