امریکا اور روس کے درمیان ہتھیاروں کی روک تھام کا معاہدہ معطل

واشنگٹن اور ماسکو کے درمیان کشیدگی، امریکا نے انٹرمیڈیٹ رینج نیوکلیئر فورس ٹریٹی معطل کرنے کا اعلان کر دیا۔ غیر ملکی ذرائع کے مطابق امریکی وزیر خارجہ مائیک پومپیو نے کہا ہے کہ امریکا نے معاہدے پر عمل درآمد کے لیے روس کو کافی وقت دیا، تاہم روس کئی سالوں سے معاہدے کی شرائط کی خلاف ورزی کر رہا تھا۔

امریکی وزیر خارجہ نے سٹیٹ ڈیپارٹمنٹ میں بریفنگ دیتے ہوئے کہا کہ امریکا کی جانب سے روس کو معاہدے پر عمل درآمد کرنے کے لیے 180 دن کی مہلت دی گئی ہے۔ عمل درآمد نہ کرنے کی صورت میں امریکا روس کے ساتھ طے پانے والا معاہدہ ختم کر دے گا۔

خیال رہے کہ روس اور امریکا کے درمیان ہتھیاروں کی دوڑ روکنے کیلئے 1987ء میں معاہدہ ہوا تھا۔