اقوام متحدہ کی قراردادوں کے منافی کوئی حل قابل قبول نہیں‘ مشرق وسطیٰ میں امن صرف منصفانہ فیصلوں سے ہی ممکن ہے، ملیحہ لودھی

نیویارک :  اقوام متحدہ میں پاکستان کی مستقل مندوب ڈاکٹر ملیحہ لودھی نے کہا ہے کہ اگر مسئلہ کشمیر اور مسئلہ فلسطین حل نہ کرایا گیا تو لوگ اقوام متحدہ پر اعتماد کھودیں گے،‘ اقوام متحدہ کی قراردادوں کے منافی کوئی حل قابل قبول نہیں‘ مشرق وسطیٰ میں امن صرف منصفانہ فیصلوں سے ہی ممکن ہے، عالمی برادری فلسطینی پناہ گزینوں کی امداد کے لیے آگے بڑھے، سفارت خانوں کی یروشلم منتقلی کے فیصلے سے مشرق وسطی میں سیکیورٹی کی صورتحال مزید خراب ہوئی۔ اقوام متحدہ میں پاکستانی مندوب ملیحہ لودھی نے مشرق وسطیٰ کی صورتحال پر مباحثے میں اظہار خیال کرتے ہوئے کہااقوام متحدہ کی سیکیورٹی کونسل پر زور دیا کہ وہ مسئلہ کشمیر اور مسئلہ فلسطین سے متعلق اپنی قراردادوں پر عملدرآمد کروائے، دوسری صورت میں پوری دنیا کے لوگوں کا اقوام متحدہ پر سے اعتماد ختم ہوجائے گا۔ملیحہ لودھی نے کشمیر، فلسطین یا دنیا میں کہیں بھی غیر ملکی تسلط کے زیر اثر زندگی بسر کرنے والے مظلوم انسانوں کی مسلسل حمایت کے عزم کا بھی اظہار کیا۔عالمی منظرنامے پر روشنی ڈالتے ہوئے ڈاکٹر ملیحہ لودھی نے کہا کہ تنازعات میں شدت آرہی ہے اور نئے خطرات سامنے آرہے ہیں۔دوسری جانب مشرق وسطی کی صورتحال پر تبصرہ کرتے ہوئے ملیحہ لودھی نے کہا کہ عالمی برادری فلسطینی پناہ گزینوں کی امداد کے لیے آگے بڑھے، ساتھ ہی انہوں نے سب سے بڑے ڈونر یعنی امریکا کی جانب سے فلسطینیوں کی امداد میں کٹوتی پر بھی افسوس کا اظہار کیا۔کچھ ممالک کی جانب سے اپنے سفارت خانوں کی یروشلم منتقلی کے فیصلے کو تنقید کا نشانہ بناتے ہوئے ملیحہ لودھی نے کہا کہ اس سے مشرق وسطی میں سیکیورٹی کی صورتحال مزید خراب ہوئی۔مباحثے کے دوران پاکستانی مندوب نے یمن اور شام کی صورتحال پر بھی روشنی ڈالی۔


اپنی راہےکااظہار کریں

آپ کا ای میل ایڈریس شائع نہیں کیا جائے گا.