کسانوں کوٹیوب ویل سبسڈی دینے کے مطالبے کی قرارداد پنجاب اسمبلی میں جمع

لاہور: کسانوں کو ڈرل رگنگ ٹیوب ویل لگانے کے لیے سبسڈی دینے کے مطالبے کی قرارداد پنجاب اسمبلی میں جمع کرادی گئی ۔ تحریک انصاف کی رکن پنجاب اسمبلی نبیلہ حاکم علی کی طرف سے جمع کروائی گئی قرار داد کے متن میں کہا گیا ہے کہ کسانوں کو زراعت کے لئے پانی کا حصول دن بہ دن مشکل ہوتا جارہا ہے۔کیونکہ موجودہ طریقہ کار سے ٹیوب ویل لگانا بھی متروک ہوتا جارہا ہے۔کچھ کسان پرائیویٹ سیکٹر سے ڈرل رگنگ ٹیکنالوجی سے ٹیوب ویل لگا رہے ہیں۔لیکن پرائیویٹ سیکٹر نے کسانوں کی مجبوری کی آڑ میں لوٹ مار شروع کر رکھی ہے۔اس لوٹ مار کے خلاف حکومت کی جانب سے کوئی چیک اینڈ بیلنس سسٹم موجود نہیں۔قرارداد میں حکومت سے مطالبہ کیا گیا ہے کہ وہ ضرورت مند کسانوں کو سبسڈی سے ڈرل رگنگ ٹیوب ویل لگانے کے فوری اقدامات کرے۔علاوہ ازیں پاکستان تحریک انصاف کی رکن پنجاب اسمبلی سعدیہ سہیل رانا نے ایک تحریک التوائے کار پنجاب اسمبلی میں جمع کروا دی ہے جس میں کہا گیا ہے کہ نجی اخبار کی خبر کے مطابق حکومت پنجاب کے تعلیمی اصلاحات لانے کے بلند بانگ دعوے بے نقاب ہو گئے، لاہور سمیت پنجاب بھر کے لئے رکھا جانیوالا تعلیمی بجٹ استعمال نہ ہو سکارواں مالی سال میں حکومت پنجاب نے سکول ایجوکیشن کے لئے 53 ارب روپے مختص کئے تھے جس میں سے صرف 38 فیصد بجٹ ہی استعمال ہو سکا۔ حکومت بیشتر نئے منصوبوں کو شروع ہی نہ کر سکی۔ اساتذہ کی بین الاقوامی معیار کی ٹریننگ کا منصوبہ بھی کاغذوں کی زینت بنا ہوا ہے اور اُن کی حاضری ممکن بنانے کا ای سسٹم پر بھی عمل درآمد زیرو ہے۔ کمپیوٹر لیبز فراہم کرنے کا منصوبے بھی التوا کا شکار ہے۔ حکومت کی ترجیحات میں فرق سکول ایجوکیشن کی زبوں حالی کا منہ بولتا ثبوت ہے۔