ماحولیاتی آلودگی پرقابو پانے کیلئے بھرپور کوشش کرنا ہوگی ، وسیمہ عمر

قصور: ڈپٹی کمشنر قصور/منیجنگ ڈائریکٹر KTWMAصاحبزادی وسیمہ عمر نے ہدایت کی کہ KTWMAکی مشینری کو آپریشنل رکھنے کیلئے تمام تر وسائل بروئے کار لائے جائیں، ٹینریز ایریا میں سولڈ ویسٹ اُٹھانے اور صفائی کیلئے جہاں پر سٹاف کی ضرورت ہے اس مسئلے کو فوراًحل کیاجائے، ہمیں قصور سے ماحولیاتی آلودگی پرقابو پانے کیلئے بھرپور کوشش کرنا ہوگی ۔ یہ بات انہوں نے قصورٹینریز ویسٹ مینجمنٹ ایجنسی کی مینجمنٹ کمیٹی کی میٹنگ میں گفتگو کرتے ہوئے کہی۔

اجلاس میں ڈائریکٹرفنانس KTWMA/ ڈسٹرکٹ اکاﺅنٹس آفیسر راناثناءاللہ خاں ، ایڈیشنل ڈپٹی کمشنر(جنرل) /پراجیکٹ منیجر KTWMA رانا محمدشہزاد،ممبران منیجنگ کمیٹی حاجی عبدالغفار، میاں محمداشفاق، صدر ٹینریز ایسوسی ایشن دین گڑھ میاں شان الہٰی،نمائندہ ٹینریز میاں فضل الرحمن،آڈٹ آفیسر جہانزیب ٹیپو،انچارج اکاﺅنٹس محمدفیصل اور محبوب اشرف نے شرکت کی۔ اجلاس کے شرکاءکو ایڈیشنل ڈپٹی کمشنر جنرل رانا محمدشہزاد نے KTWMA کے آپریشنز کے متعلقہ امور پربریف کیااور مشینری کی موجودہ صورتحال کے متعلق بتایا۔
ڈپٹی کمشنر قصور نے ایڈیشنل ڈپٹی کمشنرجنرل کو ہدایت کی کہ KTWMAکے جوملازمین سسٹم کوخراب کررہے ہیں اُن کے ساتھ سختی سے نمٹا جائے اور کام کرنیوالے ملازمین کی بہتری کے لیے سوشل سکیورٹی ڈیپارٹمنٹ سے انکی رجسٹریشن کروائی جائے ۔ ٹینریز کے نمائندگان نے منگل منڈی روڈ اور دین گڑھ چینل کی تعمیر کے متعلق مطالبہ کیا جس پر ڈپٹی کمشنر نے کہاکہ وہ ان چیزوں کی تعمیر ومرمت کے حوالے سے ہائی وے ڈیپارٹمنٹ سے سفارش کریں گی۔ اس کے علاوہ پراجیکٹ منیجر کی بھرتی کے لیے اخبار اشتہار دینے کی بھی مینجمنٹ کمیٹی نے منظوری دی۔ ٹینریز سے ریکوری کے معاملے پرڈپٹی کمشنر نے سختی سے ہدایت کی کہ ٹینریز کے ذمہ بقایاجات کی ادائیگی کے لیے تمام تر وسائل بروئے کار لاتے ہوئے متعلقہ ٹینریز سے بقایاجات کی وصولی کی جائے۔ اجلاس میں موجود تمام شرکاءنے KTWMAکے معاملات میں بہتری لانے پر ڈپٹی کمشنرقصور کی کوششوں کو سراہا۔