کمیشن برائے حقوقِ صارفین پاکستان کے تحت قومی صارف کانفرنس کا انعقاد

اسلام آباد:  جمہوریت کی اساس بنیادی انسانی حقوق پر ہے، اور اس ضمن میں صارفین کے حقوق کلیدی حیثیت کے حامل ہیں۔ جمہوری نظام سے صارفین کے حقوق کے تحفظ کو یقینی بنیا جاسکتا ہے۔ وفاقی وزیرِ مملکت برائے خزانہ رانا محمد افضل خان Consumer Rights Commission of Pakistan (CRCP) /کمیشن برائے حقوقِ صارفین پاکستان کے تحت منعقدہ قومی صارف کانفرنس کے افتتاحی اجلاس سے خطاب کر رہے تھے۔وزیر ِ مملکت نے اپنے خطاب میں کہا کہ صارفین کو گوناگوں مسائل کا سامنا ہے، ےہاں تک کہ دکاندار اور ہوٹل مالکان بھی عام شہری کو  رسید دینا گوارہ نہیں کرتے، تاکہ بعد میں غیر معیاری مصنوعات یا سہولیات کی فراہمی کی صورت میں کاروائی کا سامنا نہ کرنا پڑے اور ساتھ ہی ساتھ ٹیکس بھی نہ دینا پڑے۔اس صورتحال کے تدارک کے لئے حکومت صارفین کے تحفظ کے لئے ایک موئثر قانونی اور انتظامی ڈھانچہ کا جلد قیام عمل میں لا رہی ہے۔کانفرنس میں معیارِ زندگی اور صارفین ، معلومات تک رسائی اور صارفین کے تحفظ کے لئے قانونی ڈھانچہ، تعلیم ،صحت اور بینکاری کی موجودہ صورتحال، توانائی کی فراہمی اور صارفین کے مسائل، جیسے موضوعات پر خصوصی مکالمہ جات کا اہتمام کیا گیا جہاں صارف حقوق اور پیشہ ور ماہرین نے ان موضوعات پر اظہارِ خیال کیا اور مقالہ جات پڑھے گئے۔کانفرنس کے آغاز میں سی آرسی پی کے سیکرٹری جنرل، جناب ابرار حفیظ، نے کانفرنس کے شرکاءکو خوش آمدید کہتے ہوئے الیکٹرانک رسائی، موبائل فون اور انٹرنیٹ پر دستیا ب سہولیات ، اشیاء وغیرہ کے باعث صارفین کی مشکلات میں اضافہ کو باعث تشویش قرار دیا۔ان کا کہنا تھا کہ اس مسئلہ کا جلد حل نکالنا ہوگا۔منیر احمد صاحب، پروگرام کوآرڈینیٹر سی آرسی پی ، نے کہا کہ اگر ریاست اپنا کردار ادا نہ کرے تو صارفین منڈی کی بارسوخ قوتوں کے سامنے بے بس ہیں ۔ صارفین کے پاس ایسے موئثر فورم موجود نہیں جہاں وہ اپنے مسائل کے حل اور شکایات کے ازالہ کے لئے رجوع کرسکیں۔انہوں نے اس بات پر تاسف کا اظہار کیا کہ اسلام آباد گرچہ دارلحکومت ہے مگر قانون ہونے کے باوجود یہاں نہ ہی صارفین کے تحفظ کی کونسل بنائی گئی ہے اور نہ ہی صارف عدالتوں کا قیام عمل میں آیا ہے۔جناب نورالامین مینگل ، ڈائریکٹر جنرل پنجاب فوڈ اتھارٹی نے کانفرنس سے خطاب کرتے ہوئے ایک نجی آئس کریم کمپنی کے دیگر کمپنیوں پر قبضہ کی تفصیل بیا ن کی اور حاضرین کو آگاہ کیا کہ مارکیٹ میں آئس کریم کے نام پر فروزن ڈیزرٹ اور گیس کا ملغوبہ فروخت کیا جارہا ہے۔ جو صارفین کے لئے کسی بھی طرح صحت افزاءنہیں۔انہوں نے اس عزم کا اظہار کیا کہ پنجاب میں گمراہ کن اشتہارات کے تدارک کے لئے جلد ہی قانون سازی ہو جائیگی ۔ انہوں نے حاضرین کو پنجاب فوڈ اتھارٹی کی طرف سے خیبر پختونخواہ میں فوڈ اتھارٹی کے قیام میں کی جانے والی کاوشوں کو بھی بیان کیا۔