اسلام کے قلعے اسلامی جمہوریہ پاکستان کے ہر قسم کے حالات بگاڑ کا شکار ہو چکے ہیں۔ بے ترتیبی ، بد نظمی اور غیر یقینی صورتحال نے زندگی کے ہر شعبے کو شدید متاثر کررکھا ہے ۔ پاکستان کا ہر شہری پریشان حال ہے۔ یوں معلوم ہوتا ہے جیسے ملک میں حکومت اور قانون نام کی کوئی شئے موجود ہی نہیں ہے ۔ وفاق میں موجود اتحادی حکومت بوجوہ اتنی کمزور اور نحیف ہے کہ اس کے بارے میں بجا طور پر کہا جا سکتا ہے: ہر چند کہیں کہ ہے، نہیں ہے!!یوں لگ رہا ہے جیسے ملک مختلف ہچکولوں اور دھچکوں کا شکار بن کر رہ گیا ہے ۔ ہر پاکستانی کی زبان اور دل میں مملکتِ خداداد پاکستان کی سلامتی کے لئے دعائیں نکل رہی ہیں ۔ اس کا مطلب یہ بھی ہے کہ کہیں نہ کہیں غیر سلامتی کے خدشات موجود ہیں ۔وفاقی حکومت کے خلاف پنجاب، کے پی کے، گلگت بلتستان اور آزاد کشمیر کی حکومتیں ایکا کر چکی ہیں ۔ ایک طرف اتحادی حکومت میں شامل درجن بھر جماعتیں اور درجن سے زائد سیاسی لیڈرز کھڑے ہیں اور دوسری طرف اکیلا عمران خان ان کے مقابل کھڑا ہو کر انہیں للکار رہا ہے ۔ یہ ایک پریشان کن صورتحال ہے جس نے ہماری ملٹری اسٹیبلشمنٹ کو بھی پریشان کررکھا ہے ۔ اور سچی بات یہی ہے کہ یہ اسٹیبلشمنٹ ہی ہے جس نے عمران خان کو اقتدار میں لانے کے لئے اُنہیں بے جا لاڈ پیار سے نوازا اور نون لیگ اور پیپلز پارٹی کے لیڈروں کو سیاست سے نکالنے کی کوشش کی ۔اور اب یہ عمران خان اقتدار سے محروم ہونے کے بعد اِسی اسٹیبلشمنٹ کو للکار بھی رہے ہیںاور گھرک بھی رہے ہیں اور اِس پر نئے نئے الزامات بھی عائد کررہے ہیں ۔ اسٹیبلشمنٹ اِسی وجہ سے عمران خان سے خائف بھی ہے اور ناراض بھی ۔ جبکہ عمران خان کو اس بات پر ناز ہے کہ ملک کے عوام کی اکثریت اُن کی ہمنوا ہے اور اُن کی آواز پر لبیک کہہ رہی ہے ۔ جبکہ اتحادی حکومت اپنے عوام دشمن اقدامات اور کمر شکن مہنگائی کی وجہ سے عوام میں خاصی ھد تک نامقبول ہو چکی ہے ۔ حکومت نے اپنی معاشی کمزوریوں پر قابو پانے کے لئے شہباز شریف کی قیادت میں سعودی عرب اور چین کے اعلیٰ سطحی دَورے تو کئے ہیں لیکن ابھی تک وہاں سے کوئی خوش خبری نہیں مل سکی ہے جس کی وجہ سے اتحادی حکومت یعنی شہباز شریف خاصے پریشان ہیں ۔ ایسے میں ملک میں کئی ایسے واقعات رُونما ہُوئے ہیں جنہوں نے مرکزی حکومت کو مزید پریشان کیا ہے ۔ مثال کے طور پر (١) 3نومبر2022ء کو وزیر آباد کے نزدیک عمران خان پر ایک جنونی کی طرف سے اُس وقت حملہ کیا گیا جب وہ لانگ مارچ کا قافلہ اسلام آباد کی طرف روانہ کئے ہُوئے تھے (٢) اس حملے کے بعد عمران خان کا ، بغیر کسی ثبوت کے، وزیر اعظم ، وزیر داخلہ اور سیکورٹی فورسز کے ایک اعلیٰ افسر کے خلاف ایف آئی آر کٹوانے کا عندیہ دینا (٣) اِس سانحہ اور عمران خان کے سنگین الزامات کے بعد وزیر اعظم شہباز شریف کا لاہور میں 5نومبر2022ء کو ایک بھاری بھر کم پریس کانفرنس کا انعقاد (٤) اسی تاریخ کو وزیر اعظم کے زیر صدارت کابینہ کے ایک اجلاس میں عمران خان کے خلاف کارروائی کرنے کا فیصلہ کرنا (٥) اُسی روز ”پیمرا” کی طرف سے عمران خان کے خلاف یہ فیصلہ کرنا کہ اُن کی کوئی تقریر اور پریس کانفرنس پاکستان کے کسی ٹی وی پر نہیں دکھائی جائے گی لیکن چند گھنٹوں کے بعد ہی وفاقی حکومت کی طرف سے یہ اعلان کرنا کہ ”پیمرا” کے فیصلے کو ختم کر دیا گیا ہے (٦)وفاقی حکومت کی طرف سے لاہور کے سی سی پی او غلام محمود دوگر کو معطل کرنے کا اقدام (٧) پانچ نومبر ہی کو اسلام آباد میں پی ٹی آئی کے سینیٹر اعظم سواتی خان کی طرف سے روتے ہُوئے ایک ویڈیو کا انکشاف۔۔۔۔ ہم کوشش کریں گے کہ باری باری ان تمام مذکورہ باتوں کے بارے میں اظہارِ خیال اور تجزیہ کریں اور کھوج لگائیں کہ درونِ پردہ کیا کچھ چل رہا ہے ؟۔۔۔۔۔بلا شبہ وفاقی حکومت کے خلاف عمران خان کا لانگ مارچ مرکزی حکومت کے لئے دردِ سر بنا ہُوا تھا۔ لیکن دوسری طرف عمران خان بھی پریشان تھے کہ اُن کے لانگ مارچ میں توقعات کے عین مطابق عوام شریک نہیں ہو رہے تھے ۔ خان صاحب اس صورتحال سے مایوس بھی تھے لیکن اس کے باوجود وہ اپنے خطابات سے عوام کا دل اور حوصلے بڑھا رہے تھے ۔ اُن کے لانگ مارچ کی سستی اور کاہلی کا یہ عالم تھا کہ سات دنوں میں یہ لاہور سے چل کر صرف وزیر آباد تک پہنچ سکا تھا۔ ایسے میں عمراں خان نے اعلان کر دیا کہ وہ مزید ایک ہفتہ کے بعد اسلام آباد پہنچیں گے ، حالانکہ پہلے اُنہوں نے اعلان کیا تھا کہ وہ 4نومبر بروز جمعہ کو اسلام آباد پہنچیں گے ۔ اس دوران وہ باربار شام کے وقت لانگ مارچ کے مجمع سے نکل کر لاہور اپنے گھر تشریف لے جاتے رہے ۔ اس عمل نے بھی اُن کے عشاق کے دلوں میں کئی شکوک و شبہات پیدا کئے ۔ خان صاحب 3نومبر بروز جمعرات وزیر آباد میں تھے کہ اُن پر ایک شخص ( نوید ولد بشیر) نے مبینہ طور پر پستول سے حملہ کر دیا ۔مارچ کے شرکا میں بھگدڑ مچ گئی ۔ اور پھر اچانک معلوم ہُوا کہ عمران خان کی ٹانگ میں گولی لگی ہے اور وہ زخمی ہو گئے ہیں ۔ اُنہیں فوری طور پر لاہور لے جایا گیا جہاں اُنہیں کسی سرکاری ہسپتال میں داخل کرنے کی بجائے اُن کے اپنے ہسپتال ( شوکت خانم کینسر ہسپتال) لے جایا گیا ۔ اس عمل نے بھی کئی شکوک و شبہات کو جنم دیا ۔ خاص طور پر یہ سوال اُٹھایا گیا کہ میڈیکو لیگل تو کسی سرکاری ہسپتال ہی میں ہو سکتا ہے ۔ وفاقی حکومت نے بھی اِسی ضمن میں کئی سوالوں کو اُٹھایا ۔ لانگ مارچ تو وقتی طور پر وزیر آباد ہی میں رک گیا تھا لیکن اس دوران پورے ملک میں خان صاحب کے چاہنے والوں نے جلاؤ گھیراؤ کے مناظر پیدا کئے ۔ کئی سرکاری املاک کو بھی نقصان پہنچا ۔اور پھر یہ بھی معلوم ہُوا کہ وزیر آباد ہی میں فائرنگ کے نتیجے میں لانگ مارچ ہی میں شامل ایک شخص ( معظم گوندل ) بھی گولی لگنے سے جاں بحق ہو گیا ہے ۔ یہ بھی کہا گیا ( بقول پی ٹی آئی اور عمران خان ) کہ فائرنگ سے 14افراد مزید زخمی ہُوئے ہیں ۔ یہ نہائت پریشان کن صورتحال تھی ۔ عمران خان نے شوکت خانم میں موجودگی کے دوران ، دوسرے دن 4نومبر کی شام، میڈیا سے بذاتِ خود خطاب کرتے ہُوئے کئی مزید انکشافات بھی کئے اور کئی لوگوں پر الزامات بھی عائد کئے ۔ ان الزامات کی ابھی تحقیقات ہونا باقی ہے ۔ خان صاحب نے دعویٰ کیا کہ اُن پر حملہ کرنے والے ایک سے زیادہ لوگ تھے اور یہ کہ اُنہیں چار گولیاں لگی ہیں ۔ واللہ اعلم بالصوب۔ عمران خان نے اپنے اِسی خطاب میں تین اہم سرکاری شخصیات پر الزامات بھی عائد کر دئیے اور ان کے نام بھی لے دئیے اور دعویٰ کیا کہ یہ لوگ اُن پر حملے میں ملوث تھے ۔ اس وجہ سے خاصی پریشان کن صورتحال پیدا ہو گئی تھی ۔ اُن سے قبل پی ٹی آئی کے سیکرٹری جنرل اسد عمر نے عمران خان کی ایما اور حکم پر ان تینوں افراد کے نام میڈیا کو بتا کر اولین الزام کا آغاز کر دیا تھا ۔ یہ الزامات تو عائد کر دئیے گئے لیکن اتوار کی صبح جبکہ یہ کالم لکھا جارہا ہے ، ان تینوں نام کی بنیاد پر ابھی تک ایف آئی آر نہیں کاٹی جا سکی ہے ۔ اس دوران پی ٹی آئی کے کارکنان نے اپنے لیڈر عمران خان کے حکم کی پابندی کرتے ہُوئے ملک کے کئی حصوں میں احتجاجات بھی کئے ، سڑکیں بھی بند کیں ، حکومت کے خلاف نعرے بھی لگائے ، لاہور کے گورنر ہاؤس کے مین گیٹ کو آگ بھی لگا دی، موٹر ویز کو بھی بند کر دیا ۔ ان سب باتوں پر افسوس کا اظہار ہی کیا جا سکتا ہے ۔فضا میں چونکہ عمران خان کے خطاب کا خاصا اثر محسوس ہورہا تھا؛ چنانچہ وزیر اعظم جناب شہباز شریف نے اس کا توڑ کرنے کے لئے لاہور میں ایک پریس کانفرنس سے خطاب کیا ۔ شہباز شریف نے عمران خان کے سنگین الزامات کو مسترد کر دیا اور کہا کہ دودھ کا دوھ اور پانی کا پانی کرنے کے لئے وہ سپریم کورٹ سے درخواست گزار ہیں کہ چیف جسٹس آف پاکستان کی سربراہی میں ایک فل کورٹ کمیشن قائم کی جائے تاکہ کسی کو کوئی شک و شبہ نہ رہے ۔ اس تجویز کو خوب پذیرائی بھی ملی ہے اور کہا گیا ہے کہ اگر اس پر عمل درآمد ہوجاتا ہے تو نتائج پر کسی کو انگلی اٹھانے کی ضرورت نہیں رہے گی اور فیصلہ بھی جلد از جلد سامنے آ سکے گا۔ساتھ ہی سیکورٹی ادارے کی طرف سے بھی حکومت سے مطالبہ کیا گیا کہ عمران خان کی طرف سے جس سیکورٹی افسر کے خلاف بے بنیاد الزامات عائد کئے گئے ، اس کی فوری تحقیق بھی کی جائے اور الزامات عائد کرنے والوں کو قرارواقعی سزا بھی دی جائے ۔ سیکورٹی فورسز کے ترجمان ادارے کی طرف سے بجا طور پر اعلان کیا گیا کہ ”ہم ہر صورت میں اپنے افسروں اور سپاہیوں کی حرمت اور عزت کا تحفظ کریں گے ۔” اِس مطالبے نے اتحادی حکومت پر ایک نیا دباؤ ڈالا ؛ چنانچہ ہم دیکھتے ہیں کہ 5نومبر کی شام مرکزی حکومت نے ایک تفصیلی میٹنگ کے بعد اعلان کیا کہ ” جلاؤ ، گھیراؤ، اور الزام تراشی پر عمران خان اور اُن کے ساتھیوں کے خلاف سخت کارروائی کا فیصلہ، قانونی ماہرین کی کمیٹی تشکیل دے دی گئی ۔”یوں اندازہ ہوتا ہے کہ مرکزی حکومت اور عمران خان کے درمیان کشیدگی بڑھے گی کیونکہ جب خان صاحب کے خلاف کارروائی بروئے کار آئیگی تو پھر صلح کے امکانات بھی ختم ہو جائیں گے ۔ یوں حکومت ایک بار پھر کسی بڑے بحران کا شکار ہو جائے گی ۔ شائد اُسے عمران خان کے متعدد مطالبات کے سامنے سر بھی جھکانا پڑ جائے ۔ اگر ایسا ہوتا ہے تو اتحادی حکومت ، خاص طور پر نون لیگ ، کی رہی سہی عزت اور ووٹ بینک بھی تباہ ہو جائیگا۔ سچی بات یہ ہے کہ حکومت سنبھال کر شہباز شریف نے ایک خسارے کا ہی سودا کیا ہے ۔ روز بروز اُن کا ووٹ بینک سکڑتا جارہا ہے ۔ اور اُن کے ووٹروں میں بھی مایوسی پھیل رہی ہے ۔ ملک میں بڑھتی مہنگائی اور لاقانونیت نے اتحادی حکومت کو شدید دباؤ میں ڈال رکھا ہے ۔ ایسے میں لندن میں براجمان نواز شریف اور مریم نواز بھی سخت مایوس اور پریشان محسوس ہوتے ہیں ۔ لیکن حیرانی کی بات ہے کہ ان سب بحرانوں سے بے نیاز شہباز شریف اور اُن کے ساتھیوں کے غیر ملکی دَورے ہی ختم نہیں ہو رہے ۔ افسوس تو یہ ہے کہ ان غیر ملکی دَوروں سے پاکستان اور پاکستانی عوام کا کوئی بھلا نہیں ہورہا ۔ اب پھر شہباز شریف اگلے ایک دو روز میں اپنے وزرا کے ساتھ ایک عالمی کانفرنس میں شرکت کیلئے ”شرم الشیخ” (مصر) جا رہے ہیں ۔ ملک کے اندر مسائل بڑھ رہے ہیں ۔مثال کے طور پر مرکزی حکومت نے لاہور کے سی سی پی او غلام محمود دوگر کو معطل کر دیا ہے ۔ پچھلے کئی ہفتوں سے وفاقی حکومت ڈوگر صاحب کو واپس اسلام آباد بلا رہی تھی لیکن وہ مان رہے تھے نہ پنجاب حکومت اُنہیں واپس آنے دے رہی تھی ۔ اب وفاقی حکومت نے یہ بہانہ بنایا ہے کہ چونکہ سی سی پی او لاہور گورنر ہاؤس کا فسادیوں سے تحفظ نہیں کر سکے ، اسلئے اُنہیں معطل کیا جاتا ہے ۔ اس سلسلے میں اسٹیبلشمنٹ نے معطلی کا نوٹیفکیشن بھی جاری کر دیا ہے ۔ غلام محمود ڈوگر پر یہ بھی الزام عائد کیا جارہا ہے کہ اُنہوں نے پنجاب پولیس کو سیاست زدہ کر دیا تھا۔ اِس دوران پی ٹی آئی کے سینیٹر اعظم خان سواتی نے پریس کانفرنس میں رو رو کر اپنی مبینہ برہنہ جس ویڈیو کا انکشاف کیا ہے ، اس کا اشارہ بھی مرکزی حکومت کی طرف کیا گیا ہے ۔ یہ مزید بد قسمتی ہے ۔ دوسری طرف حکومت نے اس الزام کی سختی سے تردید کی ہے اور ویڈیو کو فیک قرار دے دیا ہے اور یہ دعویٰ فرانزک لیبارٹری میں بھی مبینہ طور پر درست ثابت ہو گیا ہے ۔ ہماری سیاست نے عجب رُخ اختیار کر لیا ہے ۔ ہر طرف الزامات اور تہمتوں کی بارش ہو رہی ہے ۔ اِس عمل سے اسلامی جمہوریہ پاکستان کا خوبصورت چہرہ گہنا سا گیا ہے ۔ اللہ تعالیٰ سے دعا ہے کہ وہ ہمارے ملک کو بد تینتوں اور بد نیتوں سے محفوظ رکھے ۔ آمین ۔ یہ پیارا وطن ہے تو ہم سب کی عزتیں بھی محفوظ ہیں ۔

جناب محمد نواز شریف کے سمدھی و معتمد خاص اورنون لیگی رہنما ، اسحق ڈار صاحب، خود ساختہ جلاوطنی کے پانچ سال بعد آخر کار لندن سے واپس پاکستان ”تشریف” لے ہی آئے ہیں ۔ ”حُسنِ اتفاق” ہے کہ وہ وزیر اعظم کے جہاز میں پاکستان سے نکلے تھے اور اب وزیر اعظم کے جہاز ہی میں واپس آئے ہیں۔ ڈار صاحب اکتوبر2017ء میں دوشنبے(وسط ایشیا) میں ایک وزارتی کانفر نس میں شرکت کرنے گئے تھے ۔ وہاں سے وہ سعودی عرب چلے گئے اور چند دنوں بعد وہیں سے لندن پہنچ گئے تھے ۔ تب اُن کے وکیل ( خواجہ حارث ) نے ”نیب” کورٹ سے استدعا کی تھی کہ اُن کے موکل کی چونکہ طبیعت”اچانک” خراب ہو گئی ہے اور وہ بغرضِ علاج لندن چلے گئے ہیں، اسلئے اُن کی ذاتی غیر حاضری کو قبول کیا جائے ۔ اب راستے ”ہموار ” ہُوئے ہیں تو اسحاق ڈار واپس وطن آ گئے ہیں ۔ لاہور اور اسلام آباد میں اگرچہ لندن ایسی سہولتیں اور امن کا ماحول تو نہیں ہے لیکن اپنا وطن آخر اپنا وطن ہوتا ہے ۔پاکستان کے اشرافیہ،مقتدر اور انتہائی مراعات یافتہ طبقات کیلئے یہ ملک سیاسی و مالی منفعت کے خوب کام آ رہا ہے ۔ وہ اپنی دولت، سیاسی طاقت اور اقتداری رسوخ کے الٰہ دینی چراغ سے ، پاکستان میں ہر جگہ، جنگل میں منگل پیدا کرنے کی سکت اور طاقت رکھتے ہیں ۔ سو، ہم کہہ سکتے ہیں کہ اسحق ڈار وطن واپسی پر یہاں بھی اپنے لئے لندن ایسی فضائیں پیدا کر سکتے ہیں ۔ اُن کے بعد قائدِ نون لیگ ، قبلہ محمد نواز شریف، بھی ایسی ہی دلنواز فضا میں قدم رنجہ فرمائیں گے ۔ اسحق ڈار نے آتے ہی سینیٹ کی رکنیت کا حلف اٹھایا اور وہ دوسرے روز وفاقی وزیر خزانہ بھی بنا دیئے گئے ۔ حلف اُٹھاتے ہی اُنہوں نے اخبار نویسوں سے جو خطاب کیا، اس میں اُنہوں نے سابق وزیر اعظم عمران خان کے بارے میں ایک ایسا قابلِ گرفت لفظ بھی استعمال کیا جو ہرگز استعمال نہیں کرنا چاہئے تھا۔ ہماری سیاست مگر بد قسمتی سے ایسے موڑ پر آ چکی ہے جہاں سیاستدان اپنے حریفوں اور مخالفوں کو قابلِ گرفت الفاظ سے یاد کررہے ہیں اور کسی کو اس کا ملال بھی نہیں ۔دیکھا جائے تو اس کا آغاز حالیہ ایام میں جناب عمران خان نے کیا تھا۔ اب اسحق ڈار کے خلاف بھی خان صاحب کھل کھلا کر سامنے آئے ہیں ۔ پی ٹی آئی کے چیئرمین ، جناب عمران خان ، بظاہر ، اسحق ڈارایسے اشرافیہ طبقات کے خلاف ہیں ؛ چنانچہ ہم یہ منظر دیکھ چکے ہیں کہ بطورِ وزیر اعظم پاکستان جب خان صاحب نے امریکہ کا پہلا دَورہ کیا تھا تو واشنگٹن کے وسیع اسٹیڈیم میں پاکستانیوں کے زبردست اجتماع سے خطاب کے دوران اُنہوں نے اپنے منہ پر ہاتھ پھیرتے ہُوئے اعلان کیا تھا:” وطن واپس جا کر مَیں دیکھتاہُوں کہ نواز شریف کس طرح جیل میں ائر کنڈیشنرز کے ٹھنڈے ماحول میں رہتے ہیں ۔” لیکن تمام تر طاقت اور اختیارات رکھنے کے باوجود خان صاحب ، میاں محمد نواز شریف کو جیل میں ائر کنڈیشنر کی سہولت سے محروم نہیں کر سکے تھے ۔یہ ہے ہماری اشرافیہ کی طاقت!جناب اسحق ڈار کی وطن واپسی سے قبل اُن کے راستے کے تمام خطرناک کانٹے چُن لئے گئے تھے ۔یوں عمران خان اور اُن کے حواریوں و ہمنواؤں کے خواب دھرے کے دھرے رہ گئے ہیں ۔ اسحق ڈار لندن میں تھے ، تب بھی خان صاحب کے کچھ ”ٹائیگرز” لندن کی گلیوں اور سڑکوں پر اسحق ڈار کا تعاقب کرتے رہتے تھے ۔ یہ اخلاقیات کے منافی عمل تھا ۔ کسی نے بھی اِسے پسند نہیں کیا ۔ اسحق ڈار نے مگر صبر کیا اور لندن میں آوازے کسنے والوں کے خلاف کوئی کارروائی کی نہ قابلِ اعتراض زبان استعمال کی ۔ یہ مناظر اب بھی، کسی بھی وقت، ےُو ٹیوب پر ملاحظہ کئے جا سکتے ہیں ۔ ابھی اسحق ڈار صاحب نے پاکستان میں واپسی کا قدم رکھا بھی نہیں تھاکہ اُن کی آمد کی خبر پاتے ہی پی ٹی آئی کے قائدین اور جنگجو، ڈار صاحب کے خلاف متحرک ہو گئے تھے ۔ مثال کے طور پر ڈار صاحب کی آمدے سے تین دن قبل جناب عمران خان نے( 24ستمبر کو) رحیم یار خان کے اپنے پُر ہجوم جلسے میں اسحق ڈار پر جو (پرانے الزامات) دہرائے اور اُن کے خلاف جو سخت زبان استعمال کی، ہم یہ الفاظ یہاں دہرا نہیں سکتے ۔ عمران خان نے یہ بھی کہا تھا:”جو بھی یہ سمجھتا ہے کہ اسحٰق ڈار واپس آ کر ملک کی معیشت ٹھیک کر لے گا، احمقوں کی جنت میں رہتا ہے ۔”یہ کیسے ممکن ہے کہ خانصاحب اپنے کسی مخالف پر الزام عائد کریں اور پی ٹی آئی کے دیگر سینئر ارکان پیچھے رہ جائیں؟ ابھی خان صاحب کے مذکورہ بیان کی سیاہی خشک بھی نہیں ہو پائی تھی کہ پی ٹی آئی کے سینئر رہنما اور سابق وفاقی وزیر، اسد عمر، نے کراچی میں اسحاق ڈار کے خلاف نہائت قابلِ اعتراض الزامات عائد کر دئیے۔لیکن سیاسی مخالفت کی رَو میں بہہ کر شائد سب ”روا” سمجھ لیا گیا ہے ۔ خان صاحب کے سابق وفاقی وزیر، فواد چودھری، تو میڈیا بیانات اور ٹوئٹر پر مسلسل اسحق ڈارپر ”بمباری” کررہے ہیں ۔وفاقی وزیر اطلاعات، محترمہ مریم اورنگزیب، نے فواد چودھری کے ڈار مخالف بیانات پر ردِ عمل دیتے ہُوئے کہا ہے:” عمران خان روئیں، پیٹیں یا چیخیں،اسحق ڈار وطن واپس آ چکے ہیں۔” جناب عمران خان مگر مسلسل اسحق ڈار کے خلاف شعلہ فشانیاں کرتے ہوئے نظر آ رہے ہیں ۔ مثال کے طور پر اُنہوں نے پشاور میں علمائے کرام کے ایک جلسے سے خطاب کرتے ہُوئے کہا ہے کہ ”پاکستان کا قانون اسحق ڈار کو روک سکا ہے نہ پاکستان کی حفاظت کرنے والے ۔ مگر اب مَیں اسحاق ڈار کو روک کر دکھاؤں گا۔” دیکھتے ہیں خان صاحب اب ڈار صاحب کا راستہ کیسے روکتے ہیں؟ ایک بات تو، بہرحال، تسلیم کرنا پڑ ے گی کہ اسحق ڈار کی واپسی وطنِ عزیز کے تمام میڈیا اور سیاستدانوں کے حواس اور اعصاب پر چھائی رہی۔پی ٹی آئی کی طرف سے اسحق ڈار کی مخالفت کے ساتھ ساتھ یہ حقیقت بھی مگر واضح رہنی چاہئے کہ اسحق ڈار کی وطن واپسی ، بعض درونِ خانہ شناسوں کے نزدیک، دراصل نون لیگ کے اندر پائے جانے والے اُس دھڑے کی پسپائی ہے جو مفتاح اسماعیل کی محبت میں اسحق ڈار کی مخالفت کرتا رہا ہے ۔ اِس دھڑے میں ایک ایسی معروف نون لیگی شخصیت مرکزی کردار ادا کررہی تھی جو مفتاح اسماعیل کی بے دریغ حمائت میں نواز شریف کی پسند ، ناپسند کو بھی خاطر میں نہیں لارہی تھی ۔ نواز شریف اِس شخصیت کو ، پارٹی کے وسیع تر مفادات میں، جھڑک سکتے تھے نہ اُن کی مفتاح اسماعیل بارے اندھی حمائت کو مسترد کر سکتے تھے ۔ نون لیگ کے اندر پایا جانے والا یہ وہی طاقتور دھڑا ہے جس نے پہلے بھی ، شاہد خاقان عباسی کی وزارتِ عظمیٰ کے دوران، مفتاح اسماعیل کوبوجوہ وزیر خزانہ بنا نے میں مرکزی کردار ادا کیا تھا۔اسحق ڈار کی وطن واپسی سے یہ دھڑا نون لیگ کے اندر دوسری صف میں کھڑا ہونے پر مجبور ہو رہا ہے ۔ ایسے دھڑے ہر سیاسی و مقتدر پارٹی میں پائے جاتے ہیں ۔اسلئے یہ کوئی نئی اور انہونی خبر نہیں ہے ۔ ہم مگر یاد رکھیں گے کہ وزیر اعظم شہباز شریف کی اتحادی حکومت میں بننے والے وزیر خزانہ، مفتاح اسماعیل، کے اقدامات سے غریب عوام کے دل دُکھے رہے ۔اُن کے فیصلوں سے مہنگائی دن دگنی، رات چگنی ”ترقی” کررہی تھی اور مفتاح صاحب پریس کانفرنسوں میں زیر لب مسکرا مسکرا کر عوام کے زخموں پر نمک پاشی کرتے تھے۔مفتاح کے اقدامات سے نون لیگ کی مقبولیت کو بٹّہ لگا ہے ۔ اگرچہ اُنہوں نے ایک بار آنسو بہا کر اپنے اقدامات کا ”کفارہ” بھی ادا کرنے کی کوشش کی ۔لندن میں بھی مبینہ طور پر ، نواز شریف کی موجودگی میں، مفتاح کے فیصلوں کو پسند کی نظر سے نہیں دیکھا گیا۔ اب مستعفی مفتاح اسماعیل ٹوئٹر پر یوں پیغام لکھ رہے ہیں:” اب مَیں کراچی کی جاوید نہاری کھا سکوں گا اور غفار و میرٹھ کبابوںسے لطف اُٹھا سکوں گا۔” اِس پیغام سے لگتا ہے کہ وزارتِ خزانہ سے مستعفی ہو کر وہ خود کو ہلکا پھلکا محسوس کررہے ہیں ۔ معروف جرمن نشریاتی ادارے ، ڈاؤچے ویلے، نے مگر لکھا ہے کہ نون لیگی قیادت نے مفتاح اسماعیل کو قربانی کا بکرا بنایا اور اب پھر اسحق ڈار کو وفاقی وزیر خزانہ بنا کر ثابت کیا ہے کہ نون لیگ میں اقربا پروری کا عنصر موجود ہے۔پی ٹی آئی قیادت کا ڈار صاحب کے خلاف غصہ اپنی جگہ مگر سوچنے والی بات یہ ہے کہ اسحاق ڈار کو چوتھی بار وفاقی وزیر خزانہ کا قلمدان اگر سونپا گیا ہے تو اُن میں کوئی خاص خوبی تو ہوگی جو دوسروں میںنہیں پائی جاتی ! اسحق ڈار کے وزیر خزانہ بنتے ہی اب تک ڈالر کی قیمت میں 10روپے کی کمی ہو چکی ہے ۔ ڈار صاحب نے یکم اکتوبر2022ء کو پٹرول اور ڈیزل کی قیمتوں میں بھی کمی کر دی ہے ۔ یہ فیصلے خوش آئند اور عوام کیلئے حوصلہ افزا ہیں ۔ جناب محمد اسحق ڈار کی واپسی جناب عمران خان کے اعصاب پر بھاری پڑ رہی ہے ۔ ابھی یہ بوجھ کم بھی نہ ہونے پایا تھا کہ خبر آ گئی کہ عمران خان کی سب سے بڑی سیاسی حریف محترمہ مریم نواز شریف اور اُن کے شوہرکیپٹن صفدر کو اسلام آباد ہائیکورٹ نے مقدمات میں بری کر دیا ہے ۔ دونوں میاں بیوی کے خلاف کیسز اب کالعدم ہو چکے ہیں ۔ شریف خاندان پر خوشیاں برسات بن کر برس رہی ہیں ۔ ہم نے دیکھا کہ مریم نواز کی بریت پر وزیر اعظم جناب محمد شہباز شریف اپنی بھتیجی کو مٹھائی کھلا رہے ہیں ۔ یہ منظر عمران خان اور اُن کے حواریوں اور ساتھیوں کے اعصاب پر بجلی بن کر برس رہے ہوں گے ۔ بریت کے بعد وزیر اعظم شہباز شریف اور مریم نواز نے اپنے اپنے انداز میں جو پریس کانفرنسیں کی ہیں، ان میں بھی عمران خان کو ہدف بنایا گیا ہے ۔ یہ پریس کانفرنسیں اپنے اسلوب اور مواد میں براہِ راست عمران خان پر حملہ ہیں ۔ مریم نواز نے بریت کے بعد صاف الفاظ میں کہا ہے کہ میری قید اور مقدمات سے صرف اور صرف عمران خان کو سیاسی فائدے پہنچے اور میری بریت دراصل عمران خان اور اُن کے ”کوچ” کی شکست ہے ۔ ہمارے اخبارات اور الیکٹرانک میڈیا مریم نواز کی مقدمات سے بریت کے حوالے سے گونج رہے ہیں ۔ یہ ایک غیر معمولی صورتحال ہے اور اس بات کا بھی پتہ دیتی ہے کہ مریم نواز شریف واقعی معنوں میں ہماری مستقبل کی سیاست کا روشن ستارہ ہیں ۔ اب مقدمات سے بریت کے بعد وہ انتخابات میں کھل کر حصہ لے سکیں گی اور کامیابی کی صورت میں حکومت بنا کر کسی اعلیٰ عہدے پر متمکن بھی ہو سکیں گی ۔ کئی تجزیہ نگار تو اُن کے مستقبل کے عہدے بارے قبل از وقت پیش گوئیاں بھی کرنے لگے ہیں ۔ یہ پیش گوئیاں سُن کر مریم نواز گہری مسکراہٹ سے طرح دے جاتی ہیں اور تبصرے سے گریز کرتی ہیں ۔احتیاط کا تقاضا بھی یہی ہے ۔ مریم نواز کی بریت پر لندن میں بیٹھے نون لیگ کے اصل قائد میاں محمد نواز شریف بھی خوشی سے نہال ہو رہے ہیں ۔ مریم نواز نے بھی بریت کا فیصلہ سنتے ہی سب سے پہلے یہ خبر اپنے والد صاحب کو سنائی اور اس کا ذکر اپنی پہلی پریس کانفرنس میں بھی کیا ۔ اُنہیں ایسا کرنا بھی چاہئے تھا ۔مریم نواز کی بریت اور اسحق ڈار کی واپسی کی خبر کے بعد جس خبر نے پورے پاکستان کو اپنی لپیٹ میں لے رکھا ہے ، وہ تین چار آڈیو لیکس ہیں ۔ پہلی آڈیو لیک میں وزیر اعظم شہباز شریف اور اُن کے کوئی سینئر سرکاری ساتھی مبینہ طور پر مریم نواز کے داماد (راحیل) بارے بھارت سے منگوائی گئی مشینری بارے بات چیت کررہے ہیں ۔لیکن اس میں کوئی قابلِ گرفت بات سامنے نہ آ سکی ۔ شہباز شریف نے بھی اس کا زکر اپنی مفصل پریس کانفرنس میں کیا ہے۔ اس کے باوجود مگر عمران خان اور پی ٹی آئی نے اس لیک بارے میڈیا میں خوب طوفان اُٹھایا ۔ ابھی اس کی باز گشت تھمی بھی نہ تھی کہ عمران خان بارے دو آڈیو لیکس سامنے آگئیں ۔ ان آڈیوز میں عمران خان مبینہ طور پر امریکی خط بارے گفتگو کرتے سنائی دے رہے ہیں اور صاف الفاظ میں یہ کہتے سنائی دے رہے ہیں کہ اب ہم اس خط سے کھیلیں گے لیکن امریکہ کا نام نہیں لیں گے ۔ وہ قریبی سیاسی ساتھیوں کو مبینہ طور پر یہ کہتے سنائی دیتے ہیں کہ خبردار اس خط کا ذکر کرتے ہُوئے کسی کی زبان پر امریکہ کا نام نہ آئے ۔ ان دونوں آڈیو لیکس سے عمران خان اور پی ٹی آئی شدید غصے اور الجھن میں ہیں کہ ان آڈیو لیکس نے امریکہ بارے عمران خان کے سارے پروپیگنڈے کی ہوا نکال دی ہے ۔خان صاحب کے پروپیگنڈے کی ہنڈیا عین بیچ چوراہے آکر پھوٹی ہے ۔

آج 19ستمبر2022ء کو وزیر اعظم شہباز شریف صاحب نیویارک پہنچ رہے ہیں ۔ وہ23ستمبر کو اقوامِ متحدہ کی جنرل اسمبلی سے خطاب کریں گے ۔ نیویارک پہنچنے سے قبل وہ تین دن سمر قند( ازبکستان) میں تھے جہاں اُنہوں نے ”شنگھائی تعاون تنظیم ” کے سالانہ سربراہی اجلاس میں شرکت کی ۔اس اجلاس میں شہباز شریف کی رُوسی، ترکیہ، ایرانی اور وسط ایشیائی ممالک کے صدور سے اچھی ملاقاتیں رہیں ۔رُوسی صدر سے ملاقات کے نتیجے میں یہ بات سامنے آئی ہے کہ رُوس، پاکستان کو گیس اور تیل فراہمی پر رضامند ہو گیا ہے ۔ مگر صرف رضامندی سے کیا ہوتا ہے؟ اصل بات تو یہ ہے کہ امریکہ بہادر پاکستان کو رُوس سے یہ گیس اور تیل لینے کی اجازت دے گا؟لیکن زیادہ حیرت کی بات تو یہ ہے کہ ابھی جنرل اسمبلی سے خطاب میں پورے پانچ دن باقی ہیں لیکن کسی کی سمجھ میں یہ بات نہیں آتی کہ پانچ روز قبل ہی ہمارے وزیر اعظم، شہباز شریف، کیوں نیویارک پہنچ گئے ہیں؟ان پانچ دنوں کا بھاری خرچہ قومی خزانے سے ادا کیا جائیگا کہ وزیر اعظم اکیلے نیویارک نہیں پہنچے ہیں ۔ اُن کے وفد میں کئی سرکاری اورغیر سرکاری افراد بھی شامل ہیں ۔ ان کے قیام و طعام کا کمر شکن خرچ بھی قومی خزانے سے ادا کیا جائیگا اور قومی خزانے میں پہلے ہی چوہے ناچ رہے ہیں ۔ شہباز شریف کی حکومت دُنیا بھر سے قرض کے نام پر بھیک مانگ رہی ہے ۔ ڈالر دن رات چھلانگیں مارتا مہنگا سے مہنگا تر ہوتا جا رہا ہے اور روپے کی قدر دن رات کم ہوتی جا رہی ہے ۔ وزیر خزانہ ، مفتاح اسماعیل ، کچھ بھی نہیں کر پارہے، سوائے پریس کانفرنسوں میں رونے کے ۔ اوپر سے سیلابوں نے ایک تہائی پاکستان کو غرقاب کررکھا ہے ۔ ساڑھے تین کروڑ پاکستانی سیلابوں سے براہِ راست متاثر ہو چکے ہیں ۔ پندرہ سو سے زائد افراد سیلاب کی نذر ہو کر جاں بحق ہو چکے ہیں ۔ سینکڑوں بچے بھی سیلابوں میں بہہ گئے ہیں ۔ تقریباً6ملین پاکستانیوں کے گھر سیلاب نے صفحہ ہستی سے مٹا دئیے ہیں ۔ لاکھوں افراد سیلاب کے کھڑے پانی کی وجہ سے ڈینگی، ملیریا اور پیٹ کی بیماریوں میں مبتلا ہو چکے ہیں ۔ اورخزانہ خالی ہے ۔ ایسے میں شہباز شریف کا پانچ دن پہلے ہی وفد کے ساتھ نیویارک براجمان ہو جانا حیرت اور ظلم کی بات ہے ، جبکہ ملک عالمی برادری سے سیلاب زدگان کی امداد کے لئے چندوں کی اپیلیں کررہا ہے ۔ تین کروڑ سے زائد سیلاب زدگان صاف پینے کے پانی، روٹی اور دیگر ضروری خورو نوش کی اشیا کو ترس رہے ہیں ۔ جو این جی اوز اپنے تئیں سیلاب زدگان کی امداد کے لئے ضرورتمندوں تک پہنچ رہی ہیں ، سب کا کہنا ہے کہ سیلاب کے متاثرین بھوک اور پیاس سے اسقدر نڈھال ہیں کہ امدادی اشیا پر ٹوٹ پڑتے ہیں ۔ کئی جگہوں پر ڈاکے پڑنے کی بھی اطلاعات ہیں ۔ وفاقی وزیر خزانہ، مفتاح اسماعیل، ٹی وی پی پر آکر آنسو بہاتے ہُوئے کہتے سنائی دے رہے ہیں کہ ”سیلابی تباہی اتنی وسیع ہے کہ ہم اکیلے سیلاب زدگان کی دستگیری نہیں کر سکتے ۔” ایک درجن سے زائد ممالک سے امدادی سامان سے لدے درجنوں جہاز ملک کے مختلف حصوں میں اُتر چکے ہیں ۔ مگر بھوک اور ضرورتیں اتنی ہمہ گیر ہیں کہ پوری پڑتی دکھائی نہیں دے رہی ۔ درجنوں ملکی اور غیر ملکی این جی اوز بھی سیلاب زدگان کی امداد کررہی ہیں ۔ شہباز شریف کی اتحادی حکومت رات دن واویلا کررہی ہے کہ ہمارے پاس کچھ نہیں ہے، امداد میں اضافہ کیا جائے ۔ شہباز شریف حکومت کے ترلے اور اپیلیں سُن کر اقوامِ متحدہ کے سیکرٹی جنرل، انٹونیو گوتریس، بھی بنفسِ نفیس پاکستان کے دو روزہ دَورے پر پچھلے ہفتے پاکستان تشریف لائے ۔ اُنہوں نے بھی سیلاب کی تباہ کاریاں دیکھ کر عالمی برادری سے اپیل کی ہے کہ سیلاب زدگان کی فوری اور دل کھول کر امداد کی جائے ۔ ایک طرف تو شہباز شریف کی قیادت میں وفاقی اتحادی حکومت کی مالی حالت یہ ہے اور دوسری جانب دُنیا یہ دیکھ کر حیران ہی تو رہ گئی ہے کہ اِسی ”غریب” حکومت نے پچھلے ہفتے ( 13ستمبر2022ئ)8مزید مشیر ( معاونینِ خصوصی) کابینہ میں شامل کر لئے ہیں ۔ ان کے ”اسمائے گرامی” یوں ہیں :نوابزادہ افتخار خان، مہر ارشاد سیال، رضا ربانی کھر، مہیش کمار ملانی، فیصل کریم کنڈی،سردار سلیم حیدر، تسنیم قریشی اور علی شاہ باچا۔ ان کی تقرری کے نوٹی فکیشنز بھی جارہی ہو چکے ہیں ۔ ان آٹھوں کا تعلق پاکستان پیپلز پارٹی سے ہے ۔ ان میں سے اولین چار قومی اسمبلی کے ارکان ہیں جبکہ بقیہ چار سادہ سیاستدان ہیں اور ماضی میں کبھی رکنِ اسمبلی رہ چکے ہیں ۔ یوں وزیر اعظم شہبازشریف کی ”غریب حکومت” کی کابینہ کی کُل تعداد 70ہو گئی ہے ۔ لوگ حیران اور ششدر ہیں کہ ایک طرف تو یہ حکومت بھکاریوں کی طرح ساری دُنیا سے امداد کی شکل میں بھیک مانگ رہی ہے اور دوسری جانب اس کی عیاشیوں ، لاپرواہیوں اور اللوں تللوں کا حال یہ ہے کہ مزید آٹھ معاونینِ خصوصی کابینہ میں شامل کر لئے ہیں ۔ یہ شرمناک صورتحال ہے اور اِس بات کا ثبوت بھی کہ شہباز شریف کی اتحادی حکومت کے سینے میں دل کی جگہ پتھر رکھا ہے ۔ یہی وجہ ہے کہ اتنی بھاری بھر کم کابینہ کے بے پناہ اخراجات پورے کرنے کے لئے وزیر خزانہ، مفتاح اسماعیل، وحشت اور درندگی کے ساتھ غریب عوام پر آئے روز ٹیکس پر ٹیکس لگا رہے ہیں ، آئے روز بجلی ، گیس اور پٹرول کی قیمتوں میں بے تحاشہ اور کمر توڑ اضافہ کیا جارہا ہے اور پاکستان بھر کے غریبوں کا قیمہ بنایا جارہا ہے ۔ شہباز شریف کے اس بہیمانہ فیصلے کی گونج ساری دُنیا میں سنائی دی گئی ہے اور سبھی نے سخت ناراضی کا اظہار کیا ہے ۔عالمی میڈیا میں بھی اس اقدام بارے شہباز شریف پر تنقید کی بارش برس رہی ہے ۔ مثال کے طور پر جرمنی کے مشہور میڈیا ”ڈاؤچے ویلے” نے بھی اِس پر اظہارِ خیال کرتے ہُوئے کہا ہے کہ شہباز شریف کی حکومت کے اس ظالمانہ فیصلے سے ملک بھر میں ناراضی اور غصے کا طوفان اُبل پڑا ہے ۔ شہباز شریف کو مگر اس کا احساس تک نہیں ہے ۔ ”ڈاؤچے ویلے” نے مزید لکھا ہے :”کئی حلقوں میں اس فیصلے کو ہدف تنقید بنایا جا رہا ہے اور اسے قومی خزانے پر بوجھ قرار دیا جا رہا ہے۔ ناقدین کا دعوی ہے کہ ان آٹھ معاونین خصوصی کے تقرر کے بعد وفاقی کابینہ کا حجم تقریبا 70 کے قریب ہو گیا ہے، جس میں چونتیس وزرا، سات وزیر مملکت، چار مشیر اور پچیس معاونین خصوصی شامل ہیں۔پاکستان تحریک انصاف نے فوری طور پر ان تقرریوں پر اپنا ردعمل ظاہر کیا اور اسے قومی خزانے پر بوجھ قرار دیا ہے۔پی ٹی آئی کے رکن قومی اسمبلی محمد اقبال خان آفریدی کا کہنا ہے :” ملکی خزانے کو لوٹنے کے لیے مزید لوگوں کو شامل کر لیا گیا ہے۔ ایک طرف شہباز شریف سرکاری خرچے پر ہیلی کاپٹر کے دورے کر رہے ہیں، جو صرف فوٹو سیشن کے لیے ہیں اور دوسری طرف انہوں نے اپنے اتحادیوں کو خوش کرنے کے لیے معاونین خصوصی رکھ لیے ہیں، جس سے قومی خزانے پر مزید بوجھ پڑے گا۔ یہ ایک ایسے وقت میں ہورہا ہے جب ملک پہلے ہی 136 بلین ڈالرز سے زائد کا مقروض ہے”۔ملک بھر کے کئی تجزیہ نگاروں کا کہنا ہے کہ” کابینہ کے حجم کو ایک ایسے وقت میں بڑھایا گیا ہے جب سیلاب زدگان کی مدد کے لیے پائی پائی کی ضرورت ہے۔جنوبی پنجاب، بلوچستان، خیبر پختونخواہ اور سندھ میں سیلاب متاثرین بھوک وافلاس اور دربدری کا شکار ہیں۔ وہ بیماریوں سے مر رہے ہیں اور یہاں وفاقی کابینہ کے حجم کو بڑھایا جارہا ہے۔ اس بات کو نظر انداز کرتے ہوئے کہ معیشت کو دس سے تیس بلین ڈالرز کا نقصان ہوچکا ہے۔ تیس لاکھ ایکڑ سے زیادہ اراضی تباہ ہوگئی ہے۔ لاکھوں انسان کیمپوں میں رہنے پر مجبور ہیں۔ ایسے میں یہ تقرریاں انتہائی شرمناک ہیں۔ حکمران طبقہ کی اس دلیل میں کوئی طاقت نہیں کہ وزرا اگر منسٹر انکلیو میں سرکاری گھروں میں رہتے ہیں، تو وہ اس کے پیسے اپنی تنخواہ سے کٹوا دیتے ہیں۔ اس جگہ گھر ایک ایک دو دو کینال یا اس سے بھی بڑے ہوتے ہیں۔ اسلام آباد میں ایسے گھر دس لاکھ سے بیس لاکھ روپے کرائے پر ملتے ہیں۔ اس کے علاوہ ان وزیروں ، مشیروں اور معاونینِ خصوصی کا سفر مفت ہوتا ہے۔ ان کا علاج و معالجہ حکومت کرواتی ہے۔ پٹرول اور دوسری یوٹیلیٹیز پر بھی ان کو بہت رعایت دی جاتی ہے۔ تو ان کی مراعات پر بے تحاشہ پیسہ قومی خزانے سے خرچ ہوتا ہے، جو ان حالات میں سیلاب زدگان پر لگنا چاہیے۔”تاہم حکومت کی اتحادی جماعت پاکستان پیپلز پارٹی سے تعلق رکھنے والے سابق ڈپٹی چیئرمین سینیٹ صابر علی بلوچ کا کہنا ہے :” وزرا پر ہونے والے اخراجات بہت معمولی ہیں اور ان کو قومی خزانے پر بوجھ قرار نہیں دیا جاسکتا۔ پاکستان 22 کروڑ سے زیادہ آبادی کا ملک ہے، جہاں پر لوگوں کے مسائل کی نوعیت مختلف اور ہرعلاقہ اور ہرصوبہ وفاقی کابینہ میں نمائندگی چاہتا ہے تاکہ اس علاقے کے مسائل حل ہو سکیں۔ موجودہ معاونین میں سے ایک بڑی تعداد ایسے ہی علاقوں کی ہے۔ یہ اتحادی حکومت ہے جس میں حکومت کے دوسرے اتحادیوں کو شراکت اقتدار کے تحت حصہ دینا پڑتا ہے لیکن اس کا مقصد صرف عوام کی خدمت کرنا ہوتا ہے۔ یہ معاونین سیلاب کے بعد پیدا ہونے والے مسائل کو حل کرنے میں وزیر اعظم کی مدد کر سکتے ہیں۔ یہ تصور غلط ہے کہ اراکین اسمبلی یا وزرا پر بے تحاشا پیسہ خرچ ہوتا ہے۔ کچھ لوگ یہاں تک الزام لگا دیتے ہیں کہ وزرا حج اور عمرہ بھی سرکاری پیسے سے کرتے ہیں، جس میں کوئی حقیقت نہیں ہے۔ اسی طرح زیادہ تر بیرون ملک دوروں کے خرچے مہمان ممالک اٹھاتے ہیں۔”کئی حلقوں کا یہ دعوی ہے کہ اٹھارویں ترمیم کے بعد وفاقی سطح پر کابینہ کا حجم اتنا بڑا نہیں ہو سکتا ؛ تاہم قانون سازی، پارلیمانی امور اور سیاسی امور کے ماہر احمد بلال محبوب کا کہنا ہے :” یہ بات درست ہے کہ وفاقی کابینہ کا حجم بہت زیادہ نہیں ہو سکتا۔ آئین کے آرٹیکل بانوے کے مطابق وزرا اور وزرائے مملکت کی تعداد اراکین پارلیمنٹ کی مجموعی تعداد کا گیارہ فیصد سے زیادہ نہیں ہونی چاہیے۔ ہماری پارلیمنٹ کی مجموعی تعداد 446 ہے۔ تو اس حوالے سے وفاقی کابینہ کے ارکان کی تعداد 49 ہونی چاہیے۔تاہم وزیراعظم معاونین خصوصی جتنے چاہے، رکھ سکتے ہیں، اس کی آئین میں کوئی حد نہیں ہے۔ وزیراعظم نہ صرف ان معاونین کا تقرر کر سکتے ہیں بلکہ ان کو وزیر یا وزیر مملکت کا درجہ بھی دے سکتے ہیں”۔آئین میں اِسی کمزوری کا فائدہ اب وزیر اعظم شہباز شریف بھی اُٹھا رہے ہیں اور اپنی کرسی مضبوط کرنے کے لئے اتحادیوں کو خوش کررہے ہیں اور غریب اور غربت و مہنگائی کی ماری عوام جائے بھاڑ میں ۔ اِس کی شہباز شریف کو پروا ہے نہ ہماری اسٹیبلشمنٹ کو ۔ یوں لگ رہا ہے جیسے یہ اتحادی حکومت بنی ہی اسلئے تھی کہ اِس میں شامل سیاستدان ”نیب” وغیرہ میں بنے اپنے مقدمات ختم کروا سکیں ۔ اِس الزام کی ایک تصدیق تو 18ستمبر2022ء کو ہو گئی ہے جب یہ خبر آئی ہے کہ ”نیب” میں ترامیم کے بعد ( نیب میں ترامیم بھی اتحادی حکومت ہی نے کی تھی) 150سے زائد سیاستدانوں کے خلاف ”نیب” میں بنے ریفرنسزواپس بھجوا دئیے گئے ہیں ۔ ان کیسز میں شپباز شریف ، حمزہ شہباز اور سید یوسف رضا گیلانی وغیرہ اتحادی حکومت کے کئی لوگ شامل ہیں ۔ پی ٹی آئی نے شائد بجا ہی کہا ہے کہ یوں اتحادی حکومت میں شامل افراد کو2400ارب کا ریلیف اور این آر او دیا گیا ہے ۔ اتحادی حکومت میں شامل ان سیاستدانوں نے اپنے لئے تو بے پناہ ریلیف لے لیا ہے لیکن اِس حکومت کے پاس غریب عوام کو ریلیف دینے کی کوئی طاقت ہے نہ نیت ۔ ایسے میں نون لیگ سمیت پی پی اور جے یو آئی ایف وغیرہ کس منہ سے اگلے انتخابات سے عوام سے ووٹ مانگ سکیں گے ؟ انہیں تو عوام سے ٹھینگا ملے گا۔ عوام کی بے بسی تو یہ بھی ہے کہ وزیر اعظم شہباز شریف اگلے آرمی چیف کی تعیناتی کیلئے مشورے کیلئے لندن پہنچ رہے ہیں ۔ ممکن ہے ان سطور کی اشاعت تک وہ لندن پہنچ بھی چکے ہوں ۔ اِس ضمن میں پی ٹی آئی شدید گلہ ہُوئے اگر یہ کہتی ہے کہ ایک مجرم بھلا اگلے آرمی چیف کی تعیناتی کا مشورہ کیونکر دے سکتا ہے ، بجا ہی ہے ۔

آج 12ستمبر2022ء بروز پیر جب آپ قارئینِ کرام یہ سطور پڑھ رہے ہوں گے، اقوامِ متحدہ کے سیکرٹری جنرل جناب انتونیو گوتریس پاکستان کا دَورہ کرکے واپس نیویارک پہنچ چکے ہوں گے۔ انتونیو گوتریس صاحب دو روزہ دَورے پر پاکستان تشریف لائے تھے ۔ اُن کے دَورے کا بڑا مقصد یہ تھا کہ پاکستان کے کروڑوں سیلاب زدگان کے مسائل اور مصائب کا احوال خود دیکھ سکیں تاکہ جب وہ عالمی برادری سے ان سیلاب زدگان کے لئے امداد کی اپیل کریں تو اس میں معنویت بھی ہو اور اس اپیل پر وہ خود بھی حق الیقین کر سکیں ۔ ایک اندازے کے مطابق پاکستان میں تین کروڑ سے زائد افراد مہلک سیلابوں سے متاثر ہُوئے ہیں ۔ کروڑوں ایسے ہیں جو اپنے مکانات، جائیدادوں اور زرعی اراضی و فصلوں سے محروم ہو چکے ہیں ۔یہ نقصان خاصا مہیب ہے ۔ زیادہ متاثرین کی تعداد سندھ، جنوبی پنجاب اور کے پی کے کے بالائی علاقوں سے تعلق رکھتے ہیں ۔ گلگت ، بلتستان کے چند علاقے بھی شدید طور پر متاثر ہُوئے ہیں ۔ یو این او کے سیکرٹری جنرل انتونیو گوتریس اِسی لئے پاکستان تشریف لائے تھے تاکہ سیلاب متاثرین کے مصیبت زدہ افراد کے مسائل و مصائب سے براہِ راست آگاہی حاصل کر سکیں ۔ گوتریس صاحب کی آمد کا ایک مطلب یہ بھی ہے کہ پاکستانی حکومت نے سیلاب زدگان کی مدد امداد کے لئے جو امیر دُنیا سے اپیل کررکھی ہے، وہ رائیگاں نہیں گئی ہے ۔ جناب گوتریس صاحب پہلے بھی ہمارے سیلاب زدگان کی دستگیری کے لئے عالمی برادری سے 16کروڑ ڈالر کی فلیش امداد کی اپیل کر چکے ہیں ۔اس اپیل کے بھی مثبت جوابات آ رہے ہیں ۔ انتونیو گوتریس صاحب 8ستمبر کی شام اسلام آباد پہنچے تھے ۔ پاکستان کی وزیر مملکت برائے خارجہ امور محترمہ حنا ربانی کھر نے ہوائی اڈے پر اُن کا اپنے ساتھیوں کے ساتھ پُر تپاک استقبال کیا۔اُن کی آمد کا ایک مقصد جہاں یہ تھا کہ دُنیا کو سیلاب کی تباہ کاریوں سے آگاہ کریں گے، وہاں دوسرا مقصد یہ بھی تھا کہ وہ دُنیا کو موسمیاتی تبدیلیوں کے بحران سے نمٹنے کی اپیل بھی کریں گے کہ پاکستان میں جو ہلاکت خیز سیلاب آئے ہیں ، یہ بھی تو عالمی موسمیاتی تبدیلیوں کا ایک شاخسانہ ہے ۔ حالانکہ پاکستان نے عالمی موسمیاتی تبدیلوں کے مہلک اثرات میں ایک فیصد بھی حصہ نہیں ڈالا ہے لیکن سب سے زیادہ اور سب سے پہلے سزا بے گناہ پاکستان ہی کو ملی ہے ۔ پاکستان آمد کے موقع پر ہی جناب انتونیو گوتریس نے ایک ٹوئٹ میں اپنی آمد کا اعلان کیا اور موسمیاتی تبدیلی کے باعث ہونے والی تباہی سے متاثرہ افراد کی بحالی کے لیے عالمی برادری سے دل کھول کر مدد کرنے کی اپیل بھی کی۔اِس دَورے کے دوران یو این او کے سیکرٹری جنرل نے وزیر اعظم شہباز شریف سے بھی ملاقات کی اور وزیر خارجہ بلاول بھٹو سے بھی ملے ۔ اس کے علاوہ اُنہوں نے NFRCC( نیشنل فلڈ رسپانس اینڈ کوآرڈی نیشن سنٹر) کے اہلکاروں اور زمہ داروں سے بھی تفصیلی ملاقاتیں کرکے پاکستان کے سیلابوں اور سیلاب زدگان بارے مکمل معلو مات حاصل کیں ۔ ان بریفنگز کا پاکستان کے بد نصیب سیلاب زدگان ہی کو فائدہ پہنچے گا کہ اِنہی بریفنگز کے ساتھ عالمی برادری کی مالی امداد وابستہ ہے ۔ گوتریس صاحب نے 9ستمبر2022ء کو اسلام آباد میں ، وزیر اعظم شہباز شریف کی زیر صدارت ، ہونے والے ایک اہم اجلاس میں شرکت بھی کی ۔ اس اجلاس کا مقصد ہی یہ تھا کہ یو این سربراہ کو پاکستان کے کروڑوں سیلاب زدگان بارے مکمل معلومات فراہم کی جائیں ۔ اس اجلاس میں وزیر اعظم شہباز شریف کی گفتگو خاصی شاندار اور متاثر کن تھی۔ وزیر منصوبہ بندی احسن اقبال نے اچھے الفاظ میں یو این سیکرٹری جنرل کو سیلاب زدگان بارے بریفنگ دی ۔ گوتریس صاحب اس بریفنگ اور فراہم کی گئی معلومات سے خاصے متاثر لگتے تھے ۔ اُنہوں نے بجا طور پر کہا کہ عالمی کلائمیٹ چینج میں پاکستان کا حصہ نہ ہونے کے برابر ہے لیکن پاکستان ہی کو سب سے پہلے اور سب سے زیادہ سزا( بصورتِ مہلک سیلاب) ملی ہے۔اُنہوں نے وعدہ کیا کہ وہ پاکستان کے سیلاب زدگان کی ہر طرح کی بحالی اور تباہ شدہ انفرا اسٹرکچر کی تعمیرِ نَو کے لئے عالمی برادری سے دل کھول کر امداد دینے کی اپیل کریں گے ۔ گوتریس صاحب جہاز میں بیٹھ کر سیلاب زدگان کا فضائی نظارہ کرکے چلے نہیں گئے ، بلکہ اُنہوں نے سیلاب زدگان سے کیمپوں میں ( مثال کے طور پر سکھر میں) خود بھی ملاقاتیں کیں ، اُن کے مسائل بھی جانے اور اُن کے تباہ و برباد شدہ گھروں کا جائزہ بھی لیا اور خود بھی تسلیم کیا کہ سیلابوں نے واقعی معنوں میں پاکستان کے کروڑوں افراد کی زندگیوں کو بے حد نقصان پہنچایا ہے ۔ اور اب ان کی بحالی کی از حد اور فوری ضرورت بھی ہے ۔ اُنہوں نے اس خدشے کا اظہار بھی کیا کہ ان سیلابوں سے شائد پاکستان میں خوراک کا بحران بھی پیدا ہو جائے ، لہذا اس خدشے سے بھی نمٹنے کی قبل از وقت ضرورت ہے ۔ خیال رہے کہ پاکستان امیر ممالک پر زور دے رہا ہے کہ وہ پاکستان سمیت موسمیاتی تبدیلیوں کے شکار دیگر غریب ممالک کی مدد کریں کیونکہ ان کی جانب سے بڑے پیمانے پر گرین ہاؤس گیسوں کے اخراج کی وجہ سے گلوبل وارمنگ ہوئی ہے، تاہم امیر ممالک بظاہر موسمیاتی نقصان کی قیمت ادا کرنے سے گریزاں نظر آتے ہیں۔پاکستان کے ترجمان دفتر خارجہ نے پاکستان کو موصول ہونے والی عالمی امداد کا ایک جائزہ پیش کرتے ہوئے کہا ہے کہ حکومت کی زیر قیادت امدادی کوششوں کو تقویت دینے کے لیے ہمارے دوست اور اتحادی ممالک کی ایک بڑی تعداد امداد کے لیے آگے آئی ہے ۔یقیناً ایسا ہی ہے ۔ لیکن ضروت اس امر کی ہے کہ پاکستان کو ملنے والی غیر ملکی امداد نہائت دیانتداری کے ساتھ سیلاب زدگان کے مستحق ہاتھوں تک پہنچ سکے ۔ پہلے ہی پاکستان کی کئی حکومتیں اِس ضمن میں خاصی بدنام ہو چکی ہیں اور اپنا اعتبار کھو چکی ہیں ۔ اِس بدنامی نے خود پاکستان کو بحثیتِ مجموعی خاصا نقصان پہنچایا ہے ۔ قوموں کے فورم پر کسی ملک اور قوم کو سفارتی سطح پر گزند پہنچ جائے تو پھر اِسے بمشکل ہی درست کیا جا سکتا ہے ۔ جس وقت یو این او کے سیکرٹری جنرل پاکستان کا دَورہ کررہے تھے ، عین اُسی وقت پاکستان میں ہونے والے ضمنی انتخابات ملتوی کرنے کے احکامات جاری کئے جارہے تھے ۔ ان ضمنی انتخابی حلقوں کی تعداد 13ہے جن میں زیادہ تعداد قومی سیٹوں کی ہے ۔ دس قومی اور تین صوبائی اسمبلی کی نشستیں ۔ای سی پی سے جاری بیان میں کہا گیا کہ چیف الیکشن کمشنر راجا سکندر سلطان کی زیر صدارت اجلاس ہوا، جس میں قومی اسمبلی کی 10 اور پنجاب اسمبلی کی 3 نشستوں پر ضمنی انتخابات ملتوی کرنے کا فیصلہ کیا گیا۔دوران اجلاس شرکا کو بریفنگ دی گئی کہ چونکہ پاک فوج، رینجرز اور دیگر سیکیورٹی ادارے سیلاب سے متاثرہ علاقوں میں مصروف ہیں ، اسلئے سندھ، پنجاب اور خیبرپختونخوا کے صوبائی الیکشن کمشنرز نے ضمنی انتخابات ملتوی کرنے کی تجویز دی تھی۔اجلاس میں بریفنگ دی گئی کہ الیکشن کمیشن نے مورخہ 23اگست 2022 کو وزارت داخلہ کو ضمنی انتخابات کے پرامن انعقاد کے لیے پاک فوج، رینجرز اور کنسٹیبلری کی خدمات طلب کی تھیں تاکہ انتخاب کے پرامن انعقاد کو یقیی بنایا جائے لیکن تاحال قومی ایمرجنسی کی وجہ سے الیکشن کے انعقاد کے لیے متعلقہ اداروں کی تعیناتی کی یقین دہانی نہیں کروائی گئی۔فیصلے میں کہا گیا ہے کہ وزارت داخلہ کی جانب سے الیکشن کمیشن کو اطلاع دی گئی کہ پاک آرمی، رینجرز اور ایف سی ملک میں سیلاب زدگان کی امدادی کارروائیوں، اندرونی سیکورٹی اور دہشت گردی کی کارروائیوں کی روک تھام میں مصروف ہیں۔چنانچہ الیکشن کمیشن نے تمام حالات کو نظر میں رکھتے ہوئے یہ فیصلہ کیا ہے کہ انتخابات کا پرامن انعقاد الیکشن کمیشن کی ذمہ داری ہے، لہٰذا ضمنی انتخابات میں پاک فوج، رینجرز اور کانسٹیلبری کی امن و امان کو برقرار رکھنے کے لیے دستیابی ضروری ہے، اس لیے ضمنی انتخابات ملتوی کیے جاتے ہیں۔خیال رہے کہ قومی اسمبلی کے حلقے این اے 157 ملتان، پنجاب اسمبلی کے حلقے 139 شیخوپورہ اور حلقہ 241 بہاولنگر میں ضمنی انتخابات 11 ستمبر کو شیڈول تھے۔کراچی کے تین حلقوں سمیت قومی اسمبلی کے 9 حلقوں پر ضمنی انتخابات 25 ستمبر کو ہونے تھے۔یہ بھی واضح رہے کہ الیکشن کمیشن نے پی ٹی آئی کے مستعفی اراکین قومی اسمبلی کی خالی نشستوں پر 25 ستمبر کو ضمنی انتخابات کے لیے شیڈول جاری کیا تھا۔یہ بھی واضح رہے کہ الیکشن کمیشن نے قو می اسمبلی کے اسپیکر کی جانب سے پی ٹی آئی کے 11 اراکین کے استعفے منظور کرنے کے بعد جاری کیے گئے نوٹی فکیشن پر انہیں ڈی نوٹیفائی کردیا تھا۔ضمنی انتخابات کا شیڈول جاری ہونے کے بعد چیئرمین پاکستان تحریک انصاف (پی ٹی آئی) عمران خان نے اعلان کیا تھا کہ وہ قومی اسمبلی کے تمام 9 حلقوں میں ضمنی انتخاب میں خود حصہ لیں گے۔الیکشن کمیشن نے قومی اسمبلی کے حلقے این اےـ22 مردان 3، این اےـ24 چارسدہ 2، این اےـ31 پشاور 5، این اےـ45 کرم ون، این اےـ108 فیصل آباد 8، این اےـ118 ننکانہ صاحب 2، این اےـ237 ملیر 2، این اےـ239 کورنگی کراچی ون، این اےـ246 کراچی جنوبی ون میں ضمنی انتخابات کا شیڈول جاری کردیا تھا۔اب ضمنی انتخابات ملتوی ہونے کے بعد ساری گیم ہی بدل گئی ہے ۔ مزے کی بات یہ ہے کہ پیپلز پارٹی نے بھی اس التوا پر احتجاج کیا ہے اور پی ٹی آئی نے بھی ۔ نون لیگ مگر بالکل خاموش رہی ہے ۔ پی پی پی کے چیئرمین بلاول بھٹو زرداری نے اس سلسلے میں کہا ہے کہ ” کب تک لاڈلے کو ریلیف دیا جاتا رہے گا؟ ضمنی انتخابات کے لئے میرے سبھی اُمیدوار پوری طرح تیار تھے ، لیکن عین وقت پر ضمنی انتخابات ملتوی کر دئیے گئے ہیں اور اس کا مطلب پی ٹی آئی اور عمران خان کو فیور دینا ہے ۔ ہم اس اقدام اور فیصلے پر احتجاج کرتے ہیں۔”پی ٹی آئی قیادت کا کہنا ہے کہ ضمنی انتخابات کے التوا کا مطلب یہ ہے کہ اتحادی حکومت مقابلہ کرنے سے فرار اختیار کر گئی ہے کیونکہ ان سب کو معلوم ہے کہ وہ پی ٹی آئی کا انتخابی میدان میں مقابلہ نہیں کر سکتی ۔ پی ٹی آئی کے سربراہ عمران خان نے ردِ عمل دیتے ہُوئے کہا کہ اگر یہ ضمنی انتخابات وقت پر ہوتے تو نو، صفر سے انہیں شکست دیتے ۔ جماعتِ اسلامی کے امیر محترم سراج الحق نے کہا ہے کہ ” سیلاب کی وجہ سے ضمنی انتخابات ملتوی کرنے تھے تویہ فیصلہ بہت پہلے ہو جانا چاہئے تھا، اور اب جبکہ پانی اُتر رہا ہے اور سیلابی شدت کم ہو رہی ہے،تو ضمنی انتخابات کا التوا سامنے آگیا ہے ۔تاخیر نے الیکشن کمیشن کے اس فیصلے کو مشکوک بنا دیا ہے ۔” بات تو درست لگتی ہے ۔ اس فیصلے نے بہت سے شکوک و شبہات کو جنم دیا ہے ۔ بادی النظر میں یوں لگتا ہے جیسے یہ التوا دراصل نون لیگ اور اتحادی حکومت کے امیدواروں کو بچانے کے لئے کیا گیا ہے ۔ کئی سروے اداروں کا بھی اندازہ ہے کہ نون لیگ جب سے اقتدار میں آئی ہے اور اس نے جو عوام دشمن فیصلے کئے ہیں ، انہوں نے نون لیگ، پی پی پی اور جے یو آئی ایف کو نا مقبول بنا دیا ہے ۔ اس مبینہ نا مقبولیت کا ایک نتیجہ تو ضمنی انتخابات میں نون لیگ کی شکست کی صورت میں نکلنا ہی نکلنا تھا۔واقعہ یہ ہے کہ نون لیگ نے اقتدار قبول کرکے اور لالچ اختیار کرکے سیاسی طور پر اپنا بہت سا نقصان کر دیا ہے ۔ عوام عمران خان کی عوام دشمن پالیسیوں اور اقدامات کو بھول بھال چکے ہیں اور اب وہ نون لیگ کی عوام دشمن اقدامات کو یاد کرکے وزیر اعظم شہباز شریف ، نواز شریف اور اتحادی حکومت کے سارے شرکت کنندگان کو کوس رہے ہیں ۔ اجتماعی طور پر نون لیگ کو نقصان پہنچ رہا ہے ۔ اس کا خود نون لیگ کو بھی احساس ہے ۔ اِسی لئے وہ ضمنی انتخابات سے فرار ہُوئی ہے ۔ عمران خان بھی اسی لئے نون لیگ اور پی پی پی کو للکار رہے ہیں ۔ وہ بجا ہی تو کہتے ہیں کہ ”13جماعتیں ضمنی انتخابات سے بھاگ گئی ہیں۔” اس للکار سے نون لیگ کے دل دہل رہے ہیں ۔10ستمبر2022ء بروز ہفتہ گوجرانوالہ میں ہونے والا عمران خان کا آخری جلسہ اسی سلسلے کی ایک دلیل اور کڑی ہے ۔عمران خان کے جلسوں کا جواب دینے کے لئے نون لیگ کی نائب صدر محترمہ مریم نواز شریف نے چشتیاں میں ایک بھرپور جلسہ کیا تو ہے لیکن یہ عمران خان کے درجن بھر جلسوں کا جواب نہیں تھا۔ قطعی نہیں۔

ستمبر کا مہینہ طلوع ہوتے ہی شہباز شریف کی حکومت نے پٹرول کی قیمتوں میں نیا اضافہ کرکے عوام کی کمر مزید توڑ دی ہے ۔ اِس دفعہ پھر پٹرول مہنگا کرتے وقت شہباز شریف کی اتحادی حکومت نے عوام سے دھوکہ کیا ہے کہ پٹرول کی مصنوعات میں نیا اضافہ کرنے والی رات یہ خبر نشر کی گئی کہ پٹرول کی قیمتوں میں 15روپے فی لٹر کمی کی جارہی ہے ۔مگر چند گھنٹوں بعد ہی پٹرول کی قیمت میں کمی کرنے کی بجائے اضافہ کرکے عوام بیچاری پرنیا بم پھینک دیا گیا ۔ پچھلی بار بھی شہباز شریف کی اتحادی حکومت نے یہی حربہ اور ہتھکنڈہ استعمال کر کے عوام کو سخت مایوس کیا تھا۔ کسی نے یوں شائد درست ہی کہا ہے کہ آئے روز شدید مہنگائی کر کے شہباز شریف کی اتحادی حکومت جناب عمران خان کی مقبولیت اور عوامی محبت میں اضافہ کررہی ہے ۔ اگرچہ یہ طنز ہے لیکن یہ ہے سچا طنز ۔3ستمبر2022ء کی صبح ایک اور ستم عوام کو ڈراوا دینے کا منتظر تھا۔ تین ستمبر کی صبح تمام اخبارات نے یہ خبر بطور شہ سرخی لگائی کہ پاکستان میں اگلے سال بھی شدید مہنگائی رہے گی اور اس ضمن میں ملک بھر میں حکومتِ وقت کے خلاف مظاہرے بھی ہو سکتے ہیں ۔یہ چنگھاڑتی ہُوئی خبر آئی ایم ایف کے حوالے سے شائع کی گئی ہے ۔ سچ ہی ہو گی کہ آئی ایم ایف ، جو ہمیں ترسا ترسا کر قرض دیتا ہے، ہمیں اور ہماری سیاست و معیشت کو ہم سے زیادہ بہتر جانتا ہے ۔ جس روز آئی ایم ایف کے حو الے سے یہ حوصلہ شکن خبر شائع ہُوئی ، اُسی روز ڈالر کی قیمت بھی بڑھ گئی ۔ اور یوں یہ تصور بھی ختم ہو گیا کہ آئی ایم ایف کا قرض ملے گا تو ڈالر کی قیمت بھی کم ہو گی ۔ اب جبکہ آئی ایم ایف کی پہلی قسط پاکستان کو مل چکی ہے لیکن ڈالر کی اُڑان تھم نہیں سکی ہے ۔ یہ المیہ ہے ۔ اُسی روز ایل پی جی کی قیمتیں بھی بڑھ گئیں اور اُسی روز یہ خبر بھی آئی کہ ملک بھر میں مہنگائی کی شرح 45فیصد ہو گئی ہے ۔ یہ شرح وطنِ عزیز کے پچھلے پچاس سالہ معاشی تاریخ میں بلند ترین اور بدترین کہی گئی ہے ۔ یہ خبر بھی آئی ہے کہ نئی مہنگائی کے منفی اثرات ٹیلیٹی اسٹورز پر بھی پڑے ہیں جہاں کئی خوردنی اشیا کی قیمتوں میں ہوشربا اضافہ ہُوا ہے ۔ ایسے میں شیخ رشید احمد کی یہ بات درست ہی محسوس ہوتی ہے کہ” شہباز شریف کی اتحادی حکومت آئی ایم ایف اور سیلابوں میں گھِر کر رہ گئی ہے” ۔ یہ دونوں عذاب عوام کو بھی بھگتنا پڑ رہے ہیں اور حکومت کو بھی ۔ دونوں ہی اس عذاب کے سامنے بے بس سے ہیں لیکن افسوس کی بات یہ ہے کہ حکومت کے وزرا مزے سے حکومت کررہے ہیں اور انہیں لوگوں کے مصائب کا قطعی احساس نہیں ہے ۔ شائد یہی وجہ ہے کہ عمران خان کے جلسے بھرپور بھی ہو رہے ہیں اور کامیاب بھی کہ حکومت سے ناراض ہو کر عوام خان صاحب کے جلسوں میں جوق در جوق شامل ہو رہے ہیں ۔ عمران خان نے پچھلے ہفتے کے دوران سرگودھا، گجرات اور بہاولپور میں خوب اور رونق بھرے جلسے کئے ہیں ۔ ان جلسوں کی کامیابی میں شہباز شریف کی حکومت کی طرف سے کی گئی مہنگائی بنیادی کردار ادا کررہی ہے ۔ ایسے پُر آشوب اور مایوس کن حالات میں وزیر خزانہ، مفتاح اسماعیل، کی تازہ ترین پریس کانفرنس نے عجب قیامت اور مایوسی ڈھائی ہے ۔ وہ بس دلاسے ہی دے رہے ہیں ۔ ان کے پاس حوصلے اور اُمید کی کوئی بات نہیں ہے ۔ مثال کے طور پر اُنہوں نے اپنی تازہ ترین پریس بریفنگ میں کہا ہے :” ابھی مہنگائی رہے گی ۔سیلاب کی وجہ سے کھانے پینے کی مہنگی ہونے والی اشیا کی قیمتوں میں کمی کے لیے ڈیوٹی ختم کردی ہے اور اشیائے ضروریہ کی قیمتیں مزید کم کرتے ہوئے آئندہ 2 ماہ کے دوران مہنگائی پر قابو لیں گے۔کچھ دیر قبل شوکت ترین نے پریس کانفرنس کی جن کی باتیں اب سمجھ سے بالا تر ہوگئی ہیں، کیا یہ کافی نہیں تھا کہ یہ ملک کو دیوالیہ پن کی جانب دھکیل گئے تھے، وہ کہتے ہیں کہ ہم عالمی مالیاتی ادارے (آئی ایم ایف) کی ستمبر میں چھٹی کرادیتے جبکہ وہ تو پاکستان کی چھٹی کرا رہے تھے۔شوکت ترین تو ملک کو دیوالیہ کر رہے تھے، اس کو ڈیفالٹ سے تو مشکل فیصلے کرکے شہباز شریف اور اس حکومت نے بچایا ہے، یہ لوگ آئی ایم ایف بورڈ میٹنگ سے ایک روز قبل لوگوں کو اکسا رہے تھے کہ پروگرام بحالی روکو، اگر یہ عمران خان کے اوپر کیسز کر رہے ہیں تو ہم ان کو چھوڑیں گے نہیں۔شوکت ترین کی نظر میں عمران خان پاکستان سے بڑا ہوگا، ہماری نظر میں نہیں، ان کی نظر میں ملک کا مفاد سیاست سے بالاتر نہیں، ہمارے لیے ملک کا مفاد مقدس و مقدم ہے، انہوں نے پنجاب اور خیبرپختونخوا (کے پی) کے وزرائے خزانہ کو فون کیا، خیبر پختونخوا کے وزیر نے خط بھی لکھ دیا۔خط لکھنے کے بعد جھوٹ بولا کہ ہم نے لیٹر کسی کو بھیجا نہیں ہے جبکہ خود کہا کہ آئی ایم ایف کے نمبر2 کو بھیج دیں گے اور پھر آئی ایم ایف کی نمبر 2 کا نام لیا جو پاکستان میں عالمی مالیاتی فنڈ کی نمائندہ ہیں۔پی ٹی آئی والے اب جھوٹ پر جھوٹ بولنا چھوڑ دیں، جو لوگ نومبر میں آئی ایم ایف سے معاہدہ کرکے آئے کہ ہر ماہ 2 فیصد ٹیکس بڑھائیں گے، 17 فیصد پیٹرول اور ڈیزل پر ٹیکس لگائیں گے، ہر مہینے 4 روپے پی ڈی ایل لگائیں گے۔کیا پی ٹی آئی حکومت نے ملک کے قرض میں 19 ہزار ارب روپے کا اضافہ نہیں کیا، عمران خان تو ملک کا قرضہ کم کرنے آئے تھے، یہ قرضہ کم کیا ہے ؟عمران خان کہتے تھے، راجا پاکسے ( سری لنکا کے سابق صدر) کی پالیسی پر عمل کروں گا، آج سری لنکا کا حال دیکھیں، وہ تو ملک چھوڑ کر بھاگ گئے تھے، وہاں کے عوام رل رہے ہیں۔سری لنکا کے موجودہ صدر نے 55 ارب روپے قرض ری شیڈول کرنے کے لیے مجھے خط لکھا ہے، وہاں پیٹرول 470 روپے فی لیٹر ہے، 300 ہزار روپے بلیک میں بکتا ہے، لوگ 10،10 دن قطاروں میں لگے ہیں، ہسپتال بند ہیں، کھانا پکانے کے لیے گیس حاصل کرنے کے لیے خواتین دو،دو روز لائنوں میں کھڑی ہوتی ہیں۔ملک تباہ ہے، پی ٹی آئی ان حالات میں بھی سیاست کر رہی ہے۔پاکستان میں اللہ کا کرم ہے کہ شہباز شریف نے ایک دن بھی ملک میں پیٹرول کی قلت نہیں ہونے دی، 200 یونٹ سے کم بجلی استعمال کرنے والے لوگوں کو بلوں میں ریلیف دیا۔آج ملک میں سیلاب سے تباہی پھیلی ہے، 40 لاکھ سے زیادہ خاندانوں کو شہباز شریف 25 ہزار روپے دے رہے ہیں، کوئی یہ کرکے دکھائے، یہ مجھے پتا ہے کہ یہ پیسے میں کہاں سے لے کر آؤں گا، پریشانی میں مبتلا اپنے لوگوں کے لیے 60 سے 70 ارب روپے خرچ کریں گے۔حالیہ سیلاب کے دوران سندھ کی 14 لاکھ ایکڑ پر محیط پوری کپاس کی فصل تباہ ہوگئی ہے، کھجور کی فصل تباہ ہوگئی، چینی کا 20 فیصد اسٹاک برباد ہوگیا اور پی ٹی آئی ان حالات میں بھی سیاست کر رہی ہے۔ شوکت ترین کو سوچنا چاہیے کہ وہ پاکستان کی وجہ سے ہی امیر آدمی بنے ہیں، ملک کی وجہ سے ہی وزیر خزانہ بنے ہیں، میں اس ملک کی وجہ سے وزیر بنا ہوں۔ 50 فیصد بچے اسکول نہیں جا پا رہے، خیبر پختونخوا میں 10 سال سے عمران خان کی حکومت ہے، بتائیں وہاں تعلیم اور ہسپتالوں کی کیا صورت حال ہے، بتائیں پنجاب کے سیلاب سے متاثرہ علاقوں میں کتنی دفعہ گئے”۔ وفاقی وزیر خزانہ مفتاح اسماعیل نے مزید کہا:”پی ٹی آئی والے ہمیں کہتے ہیں کہ روس سے پیٹرول لیں، کیا وہ خود روس سے پیٹرول لے کر آئے تھے، کیا روس کا تیل پاکستان کی ریفائنری میں چلتا ہے، جو مرضی جھوٹ بول دیتے ہیں، یہ سازش ہوگئی، وہ سازش ہوگئی، شرم نہیں آتی 25 ہزار ڈالر مہینے کا امریکا میں فرم کو لابنگ کا دے رہے ہیں اور آکر ہمیں امریکا کا بھاشن دیتے ہیں۔یہ آئی ایم ایف سے ڈیل کرکے آئے اور پھر یہاں اپنے دوستوں کو ایمنسٹی دینے کے لیے معاہدہ توڑ دیا، شوکت ترین بتائیں کیا انہوں نے آئی ایم ایف سے نہیں کہا تھا کہ اگر تحریک عدم اعتماد ناکام ہوگئی تو ہم پیٹرول مہنگا کردیں گے۔ کیا عمران خان نے وزارت خزانہ کے حکام کو نہیں کہا تھا کہ اپریل میں پیٹرول واپس مہنگا کردوں گا، بتائیں کہا پی ٹی آئی نے آئی ایم ایف کو نہیں کہا تھا کہ اپریل میں پٹرول کی قیمت بڑھادیں گے۔ ہمیں اور قوم کو پی ٹی آئی کی حقیقت پتہ چل چکی ہے، یہ لوگ جھوٹ کا چورن بیچ رہے ہیں، ان کو ملک کے مقدس مقاصد کے خلاف جانے میں بھی عار نہیں آئی، کوئی کیسے ایسی حرکت کرسکتا ہے کہ آئی ایم ایف سے ڈیل رک جائے، پھر آکر ہمیں بتاتے ہیں کہ کون امریکا کا ایجنٹ ہے، کس نے سازش کی ہے۔ جہاں دیکھو ان کی منافقت نظر آتی ہے، یہ تحفوں کے نام پر جیولری لیتے ہیں، خیرات کے نام پر فنڈز لے کر سیاسی جماعت کے لیے استعمال کرتے ہیں، ایسے لوگ ہمیں ایمان داری اور حب الوطنی کا سبق دیتے ہیں، عمران خان اپنے ذرائع آمدنی بتائیں، ہم بھی بتادیتے ہیں۔ملک کی معیشت سنبھل گئی ہے، ڈیفالٹ سے بچ گئے ہیں، مانتے ہیں مہنگائی بہت زیادہ ہے، سندھ کی آدھے سے زیادہ پیاز کی فصل خراب ہوگئی ہے، قیمت بڑھ گئی ہے، اب باہر سے پیاز آنا شروع ہوئی، قیمت میں کمی آئے گی، ٹماٹر کی قیمت 4سو روپے فی کلو سے زیادہ ہوگئی ہے، سیلاب کی وجہ سے کھانے پینے کی اشیا بہت مہنگی ہوگئی ہیں، کپاس کی فصل خراب ہوگئی ہے۔ صنعت کے لیے کپاس درآمد کریں گے، کھانے پینے کی چیزوں پر ڈیوٹی ختم کردی ہے، اشیائے ضروریہ کی قیمتیں کم کریں گے، گھی سستا ہو رہا ہے، چینی 70 روپے اور آٹا40 روپے کلو بک رہا ہے، آئندہ 2 ماہ کے دوران مہنگائی کو قابو کریں گے۔ سیلاب سے بہت تباہی ہوئی ہے، 10 لاکھ مویشی ہلاک ہوچکے ہیں، سیلاب سے ملک کا غریب ترین طبقہ متاثر ہوا ہے، اس مشکل وقت میں بھی پی ٹی آئی نے سیاست کرنی ہے تو وہ سیاست کرے لیکن پھر پاکستان کے عوام ان کو معاف نہیں کریں گے، اب یہ جھوٹ بولیں گے تو قوم معاف نہیں کرے گی کیونکہ عوام اب ان کی اصلیت دیکھ چکے ہیں۔ عمران خان کہتے تھے کہ میں ٹماٹر، پیاز کی قیمتیں دیکھنے نہیں آیا، ہم کہتے ہیں کہ ہم قیمتیں دیکھنے آئے ہیں، یہ ہمارا فرض ہے اور اگر ٹماٹر پیاز سیلاب کی وجہ سے مہنگا ہوا ہے تو اس کو سستا بھی کریں گے۔ عمران خان بڑی بڑی باتیں کرتے تھے، کوئی ایک وعدہ بتائیں جو پورا کیا ہو، پروٹوکول نہ لینے کا وعدہ، وزیر اعظم ہاؤس میں یونی ورسٹی بنانے کا وعدہ، اسکول بہتر کرنے کا وعدہ، ہسپتال بہتر کرنے کی بات، قرض کم کرنے کی بات کرتے تھے۔ عمران خان نے اناسی فیصد قرض بڑھا دیا ملک کا جو 70 سالوں میں بڑھا تھا، ملک میں بیروزگاری بڑھادی۔ پی ٹی آئی کی حکومت ملک میں تباہی مچا کر چلی گئی اور بات کرتے ہیں کہ پاکستان کو حقیقی آزادی دلانی ہے، میرے خیال میں قائد اعظم پاکستان کو حقیقی آزادی دلا کر گئے تھے، عمران خان کو ضرورت نہیں ہے۔ اگر عمران خان حقیقی آزادی کی بات کرتے ہیں تو پھر سن لیں کہ عمران خان نے گزشتہ سال 80 ارب ڈالرز کی درآمدات کیں جب کہ اس کے مقابلے میں 31 ارب ڈالر کی برآمدت تھیں، 48 ارب ڈالر کا تجارتی خسارہ کیا ہے، اگر اس میں ترسیلات زر بھی شامل کرلیں تو بھی 17 ارب ڈالر کا تجارتی خسارہ کیا تھا ۔ اگر آدمی حقیقی کی آزادی کی بات کرتا ہے تو پھر 80 ارب ڈالر کی درآمدات نہیں کرتا، 48 ارب کا تجارتی خسارہ نہیں کرتا، 18 ارب ڈالر کا کرنٹ اکاؤنٹ خسارہ نہیں کرتا۔ وہ حقیقی آزادی نہیں ہوتی ہے جب ہر جگہ آپ کو کشکول لے کر جانا پڑتا ہے جس کو اپنے زمانے میں پیکج بولنا شروع کردیا تھا”۔ مفتاح اسماعیل صاحب نے باتیں تو سچی کی ہیں ۔ عمران خان کے کئی جھوٹ بھی بجا طور پر بے نقاب کئے ہیں ۔ خان صاحب نے ملکی قرض میں جو بے تحاشہ اضافے کئے ، اُن کا بھی درست ذکر کیا ہے ۔ سوال مگر یہ ہے کہ خان صاحب کا اصلی چہرہ بے نقاب کئے جانے کے باوجود اُن کے جلسے کامیاب ہو رہے ہیں اور وہ شہباز حکومت کے لئے”خطرے ناک” ثابت ہو رہے ہیں ۔ اس خطرناکی میں اسلئے بھی اضافہ ہو رہا ہے کیونکہ شہباز شریف کی اتحادی حکومت نے مہنگائی ساتویں آسمان تک پہنچا دی ہے ۔عوام ، حکومت کے اس بیانئے کو قبولنے کیلئے تیار نہیں ہیں کہ سیلابوں نے ملکی معیشت کو بے حد نقصان پہنچایا ہے ۔یہ بھی سوال عوام پوچھتے ہیں کہ ان سیلابوں کے متاثرین کی مدد کے لئے حکمران طبقے نے اپنی جیب سے کیا کچھ خرچ کیا ہے ؟ جب تک عوام کو معاشی ریلیف نہیں ملتا، شہباز حکومت مزید غیر مقبول اور عمران خان کا بیانیہ مزید مقبول تر ہوتا جائیگا۔ یاد رکھ لیا جائے ۔

ملک بھر کے سیاسی حالات میں کشیدگی پیدا ہورہی ہے ۔ اس کشیدگی میں کمی واقع ہونے کی بجائے دن رات اضافہ ہی ہورہا ہے ۔ یہ تشویش کی بات ہے ۔ ملک کے سنجیدہ حلقے ان حالات پر اپنی پریشانیاں بھی ظاہر کررہے ہیں اور ان سے باہر نکلنے کی سبیل پیدا کرنے کے لئے کوشاں بھی ہیں ۔ دونوں متحارب دھڑے( پی ڈی ایم اور پی ٹی آئی ) ایک دوسرے کو نیچا دکھانے اور شکست دینے کے لئے آمنے سامنے ہیں ۔ سابق وزیر اعظم جناب عمران خان پر بھی کئی مقدمات قائم کئے جا چکے ہیں ۔ اُن پر قائم کیا گیا ہر مقدمہ ہی سنگین اور سخت ہے ۔ 25اگست2022ء کو عمران خان اسلام آباد کی ایک انسدادِ دہشت گردی کی عدالت میں جب حاضر ہوئے تو عدالت کے باہر اور اندر ایک ہنگامہ برپا تھا۔ خان صاحب اپنی گاڑی سمیت عدالت کے احاطے میں داخل ہونا چاہتے تھے جبکہ حکومتی و عدالتی اہلکار اُنہیں گاڑی سمیت اندر جانے کی اجازت نہیں دے رہے تھے ۔ اس کشمکش اور دھکم پیل میں خاصی بد مزگی بھی پیدا ہو گئی ۔ واک تھرو گیٹ بھی ٹوٹ پھوٹ گیا اور لوگوں کو دھکے بھی مارے گئے ۔ سنجیدہ حلقوں کا بجا طور پر کہنا ہے کہ عمران خان کو عدالت کے احاطے میں یہ تماشہ لگانے سے گریز کرنا چاہئے تھے ۔ مگر خان صاحب تو چاہتے ہی یہ ہیں کہ ملک بھر میں ہنگامے پھوٹ پڑیں اور وہ فتحیاب ہو کر پھر سے وزارتِ عظمیٰ کے سنگھاسن پر براجمان ہو سکیں ۔ ایسا ہوتا فی الحال ممکن نظر نہیں آ رہا ۔ عمران خان نے گذشتہ ایک ہفتے کے دوران اسلام آباد ، راولپنڈی اور ہری پور میں خاصے بڑے جلسے کئے ہیں ۔ ان جلسوں میں حکومت کے خلاف اُن کی زبان نہائت سخت تھی ۔ اس کے مقابل وزیر اعظم شہباز شریف نہائت دھیما لہجہ اختیار کئے ہُوئے ہیں ۔ شائد وہ دھیما لہجہ اختیار کر کے حکومت اور عمران خان کے درمیان کوئی بڑا محاذ کھولنے سے احترازکررہے ہیں ۔ وزیر اعظم کی حیثیت میں وہ ملک میں امن و امان کے بجا طور پر متمنی ہیں ۔ جبکہ عمران خان چاہتے ہیں کہ یہ مرکزی حکومت چھُٹی کرے اور نئے انتخابات کروانے کا اعلان کرے ۔ شہباز شریف اس طرف آنے کا مگر نام ہی نہیں لے رہے ۔ یوں عمران خان اور حکومت کے درمیان کشمکش اور کشیدگی روز افزوں ہے ۔ عمران خان پر قائم ہونے والے مقدمات کا عمران خان نے شہباز شریف کی حکومت سے یوں بدلہ لیا ہے کہ وزیر داخلہ رانا ثناء اللہ خان کے خلاف بھی ایک کیس کا اندراج ہو گیا ہے ۔ اس کیس کے کروانے میں مبینہ طور پر وزیر اعلیٰ پنجاب جناب چودھری پرویز الٰہی نے بنیادی کردار ادا کیا ہے کہ آجکل چودھری پرویز الٰہی اور عمران خان آپس میں بڑے حلیف اور اتحادی بن چکے ہیں ۔وزیر داخلہ ، رانا ثناء اللہ، کے خلاف یہ مقدمہ 25اگست2022ء کو قائم ہُوا ہے ۔ اس مقدمے کے اندراج کے بعد پنجاب کے صوبائی وزیر داخلہ کرنل (ر) ہاشم ڈوگر نے سماجی رابطے کی ویب سائٹ ٹویٹر پر لکھا کہ گجرات کے تھانہ انڈسٹریل ایریا میں وفاقی وزیر داخلہ رانا ثنا اللہ کے خلاف معزز عدلیہ اور سرکاری افسران کو ڈرانے دھمکانے کے خلاف پولیس نے ایف آئی آر درج کر لی ہے۔انہوں نے لکھا کہ انتہائی سنگین الزامات ہیں اور آئین اور قانون کے تحت کاروائی عمل میں لائی جائے گی۔ ایف آئی آر کے مطابق شہری کی شکایت پر وزیر داخلہ رانا ثنااللہ کے خلاف انسداد دہشت گردی کے سیکشن 7 (دہشت گردی کی سرگرمیوں پر سزا) جبکہ ضابطہ فوجداری کے سیکشن 353 (سرکاری ملازم کو اس کے فرض کی ادائیگی سے روکنے کے لیے حملہ یا مجرمانہ عمل کرنا)، 186 (سرکاری ملازمین کے سرکاری کاموں میں رکاوٹ ڈالنا)، 189 (سرکاری ملازم کو زخمی کرنے کی دھمکی دینا) اور 506 (مجرمانہ دھمکی کی سزا) کے تحت درج کیا گیا ہے۔گزشتہ سال 15 اپریل اور رواں برس 29 جنوری کو اپنی تقاریر کے دوران عدلیہ اور سرکاری افسران کو دھمکیاں دینے پر حکومت پنجاب کی طرف سے وفاقی وزیر داخلہ رانا ثنااللہ کے خلاف دہشت گردی کا مقدمہ درج کیا گیا ہے۔شکایت کنندہ نے مؤقف اختیار کیا ہے کہ 15 اپریل 2021 اور 29 جنوری 2022 کو اپنی تقاریر میں وفاقی وزیر داخلہ رانا ثنااللہ نے عدلیہ کو اپنا فرض ادا کرنے سے روکنے اور پنجاب پولیس کے افسران کے بچوں کو مارنے کی دھمکی دی تھی۔ایف آئی آر میں رانا ثنااللہ کا بیان بھی شامل کیا گیا ہے جو جیو ٹی وی کے پروگرام نیا پاکستان پر نشر ہوا تھا۔ایف آئی آر کے مطابق وفاقی وزیر داخلہ کے بیان کا مقصد عدلیہ، چیف سیکریٹری پنجاب، کمشنر اور ملک کے عوام میں خوف و ہراس پھیلانا تھا، ان کا مقصد سرکاری ملازمین کو اپنے فرائض کی ادائیگی اور قانونی ذمہ داریوں کو پورا کرنے سے روکنا تھا۔ کیس کے مطابق: وفاقی وزیر کی تقاریر نے عدلیہ، بیوروکریسی، پولیس، انتظامیہ اور قوم میں خوف و ہراس پھیلایا اور استدعا کی گئی ہے کہ رانا ثنااللہ کے بیان کی تحقیقات کی جائیں اور انہیں سزا دی جائے تاکہ سرکاری اہلکاروں کے خلاف بولنے والے دوسرے شہریوں کے لیے ایک مثال بن سکے۔ پاکستان مسلم لیگ قاف کے رہنما، وزیر اعلیٰ پنجاب کے صاحبزادے اور سابق وفاقی وزیر مونس الٰہی نے سماجی رابطے کی ویب سائٹ ٹویٹر پر مذکورہ مقدمہ قائم ہونے کے بعد رانا ثناء اللہ کو مخاطب کرتے ہوئے لکھا کہ ”آپ ہمارے وزیراعظم عمران خان کے خلاف جھوٹے مقدمے بناتے ہو۔ آپ کے خلاف پاکستانی عوام نے سچا مقدمہ بنایا ہے۔ آپ کی گرفتاری عنقریب ہے”۔ بعض لوگوں کا کہنا ہے کہ اس کیس میں مونس الٰہی کو فریق نہیں بننا چاہئے ۔ پہلے ہی بہت سے لوگ اعتراض کررہے ہیں کہ مونس الٰہی کس حیثیت میں وزیر اعلیٰ پنجاب کی کابینہ اجلاسوں میں شرکت کررہے ہیں؟ حیرانی کی بات ہے کہ ابھی گجرات میں رانا ثناء اللہ خان کے خلاف پنجاب حکومت کی طرف سے بنائے گئے کیس کو ایک دن بھی نہیں گزرا تھا کہ دوسرے دن ہی پی ڈی ایم قیادت کے تین سینئر افراد کے خلاف توہینِ عدالت کی درخواست دائر کر دی گئی ۔تفصیلات کے مطابق: اسلام آباد ہائیکورٹ میں مریم نواز، رانا ثنا اللہ، مولانا فضل الرحمن کے خلاف توہین عدالت کی درخواست دائر کر دی گئی ہے۔درخواست میں استدعا کی گئی کہ مریم نواز اور دیگر کے خلاف توہین عدالت کی کارروائی شروع کی جائے۔اسلام آباد ہائیکورٹ میں مسلم لیگ ن کے رہنماوں کیخلاف توہین کی درخواست مقامی وکیل علی اعجاز بٹر نے دائر کی۔ مسلم لیگ نون کے دو رہنماوں عطا اللہ تارڑ اور مریم اورنگزیب کو بھی درخواست میں فریق بنایا گیا ہے۔درخواست میں موقف اپنایا گیا کہ سوشل میڈیا کے ذریعے معلوم ہوا کہ مریم نواز اور دیگر کو پاکستان کے اداروں اور عدلیہ کا احترام نہیں۔ بدقسمتی سے یہ لوگ حکومتی معاملات بھی چلا رہے ہیں۔درخواست میں کہا گیا کہ فریقین نے اعلی عدلیہ کے ججز کے بارے میں بار بار توہین آمیز زبان استعمال کی۔ ان بیانات کے ذریعے نظام انصاف کی ساکھ پر سوال اٹھا کرعوام کا عدلیہ سے اعتماد اٹھانے کی کوشش کی گئی۔ درخواست کے ساتھ مریم نواز کی 25 جولائی کی پریس کانفرنس کا ٹرانسکرپٹ بھی جمع کرایا گیا ہے۔درخواست میں استدعا کی گئی ہے مریم نواز اور دیگر کے خلاف توہین عدالت کی کارروائی جلد از جلد شروع کی جائے۔یہ درخواست بھی دراصل اتحادی حکومت کو دباؤ میں لانے اور بدلہ لینے کی ایک کوشش قرار دی جا رہی ہے ۔ ان درخواستوں کا ممکنہ طور پر یہ نتیجہ نکل سکتا ہے کہ پنجاب حکومت و عمران خان اور مرکزی حکومت یعنی شہباز شریف کی حکومت کے مابین کشیدگی اور مخالفت مزیدبڑھ جائے ۔ حالانکہ ملک کے اس وقت حالات ایسے ہیں کہ کوئی بھی یہ کشیدگی اور مخالفت مول نہیں لے سکتا ۔ ملک کی معاشی حالت دگرگوں اور پتلی ہو چکی ہے ۔ عالمی اداروں کی طرف سے قرض مل تو نہیں رہا لیکن لارے لپارے ضرور لگائے جا رہے ہیں ۔ روپے کے مقابلے میں ڈالر کی قیمت پھر اوپر چڑھ رہی ہے ۔ وطنِ عزیز کو مہلک اور تباہ کن سیلابوں نے جس طرح چاروں اطراف سے گھیر رکھا ہے، یہ مناظر سب ہی کیلئے پریشان کن ہیں ۔ ایسے میں اگر ہمارے مقتدر سیاستدان باہمی لڑائیاں لڑتے رہیں گے تو مالی حالاست کو بہتر بنانا ایک خواب بن کر رہ جائیگا۔ سیلابوں نے تو ہمارا بھرکس نکال دیا ہے ۔ملک کا بیشتر حصہ سیلابوں میں ڈُوبا پڑا ہے۔ایک ہزار سے زائد افراد اپنی زندگیوں سے محروم اور ہزاروں مکانات مکمل تباہ ہو چکے ہیں۔لاکھوں پاکستانی بے آسرا اور بے چھت ہو کرکھلے آسمان تلے بے یارو مددگار پڑے ہیں ۔ نوے فیصد فصلیں تباہ ہو گئی ہیں۔اور ہمارے حکمران کیا کررہے ہیں ؟ انٹرنیشنل ڈونرز کی طرف سے آنے والے امدادی ڈالروں کا انتظار؟مصیبتوں کے مارے ان لاتعداد سیلاب زدگان کی مدد امداد کرنے کے برعکس ہم دیکھ رہے ہیں کہ قومی اسمبلی کے اسپیکر، راجہ پرویز اشرف، ڈھائی درجن افراد کے ساتھ پیرس اور کینیڈا کی سیر کررہے ہیں ۔ساتھ بیوی بچے بھی گئے ہیں ۔اور وزیر اعظم صاحب عوام سے اپیلیں کررہے ہیں کہ ملکی خزانے میں پیسے نہیں ہیں ، اسلئے عوام ”دل کھول کر” سیلاب زدگان کی مالی مدد کریں۔ کمال ہے ! بیوی بچوں کے ساتھ پیرس اور کینیڈا کی سیاحتی عیاشی کیلئے ہمارے حکمرانوں کے پاس پیسے ہیں ، لیکن مصیبت زدگان کیلئے کچھ نہیں ؟وزیر اعظم ، شہباز شریف، قطر میں جا کر مالی امداد حاصل کرنے کی کوشش میں ہیں ۔ جماعتِ اسلامی صرف ایک ایسی جماعت ہے جو سیلاب زدگان کی دامے درمے مدد کررہی ہے ۔ باقی سب دینی و سماجی و سیاسی جماعتیں مصیبت کے ماروں کا تماشہ دیکھ رہی ہیں۔ پچھلے ایک ہفتے کے دوران میں عمران خان نے اسلام آباد، راولپنڈی ، ہری پور اور جہلم میں بھرپور جلسے کئے ہیں ۔27اگست2022ء کو جہلم میں ہونے والا اُن کا جلسہ بھی خوب تھا۔ اس جلسے کو کامیاب بنانے کیلئے پی ٹی آئی کے سابق وفاقی وزیر فواد چودھری نے بڑی محنت کی تھی۔ عمران خان کے ان جلسوں پر کروڑوں روپیہ خرچ ہُوا ہے ۔ لیکن مجال ہے خان صاحب اور اُن کی پارٹی نے سیلاب کے مصیبت زدگان کی مالی امداد کیلئے ایک روپیہ بھی عطیہ کیا ہو ۔ پی ٹی آئی قیادت اور کارکنان سیلاب کے ماروں کی دستگیری کیلئے ایک قدم آگے بڑھانے سے بھی صریح قاصر رہے ہیں ۔ عمران خان کی قیادت میں پی ٹی آئی بس زبانی جمع خرچ ضرور کررہی ہے ۔یوں بیشتر لوگ پی ٹی آئی سے ناراض ہو رہے ہیں ۔ ووٹر جائز طور پر استفسار کررہے ہیں کہ کیا پی ٹی آئی اُسی وقت عوام کی خدمت کیلئے باہر نکل سکتی ہے جب یہ اقتدار میں ہو اور اس کے پاس خرچ کرنے کو وافر مقدار میں سرکاری وسائل موجود ہوں ؟ اور اگر سرکاری وسائل نہ ہوں اور اقتدار کی موجیں پاس نہ ہوں تو عمران خان اور اُن کی جماعت عوام کی خدمت کرنا گناہ سمجھتی ہے ؟سچی بات یہ ہے کہ ہلاکت خیز سیلابوں کے دوران پی ٹی آئی نے خاموشی اختیار کرکے عوام کو بے حد مایوس کیا ہے ۔ عمران خان کو تقریروں ہی سے عوام کا دل بہلانے سے باز آجانا چاہئے ۔ اُن پر لازم ہے کہ وہ سیلاب زدگان کی دامے درمے قدمے سخنے امداد کیلئے عملی مظاہرہ بھی کریں ۔ دیکھا جائے تو عمران خان کے برعکس نون لیگ کے قائد جنان محمد نواز شریف بہتر انداز میں عوامی جذبات کی ترجمانی کررہے ہیں ۔ جیسا کہ معلوم ہُوا ہے کہ نواز شریف نے نون لیگی وزیر خزانہ مفتاح اسماعیل کے عوام دشمن اقدامات اور عوام دشمن پالیسیوں کے خلاف سخت ناراضی کا اظہار کیا ہے ۔ اگرچہ مفتاح اسماعیل وزیر اعظم شہباز شریف کے ڈارلنگ ہیں لیکن اُن کے عوام دشمن فیصلوں نے مہنگائی میں چونکہ بے پناہ اضافہ کیا ہے، اسلئے نواز شریف اور مریم نواز بھی ان فیصلوں کے خلاف اظہارِ ناراضی کررہے ہیں ۔ لندن سے آمدہ اطلاعات کے مطابق ، نواز شریف نے چند دن پہلے ہی شہبازشریف کے وزیر خزانہ مفتاح اسماعیل کے کئے گئے معاشی فیصلوں کے خلاف اپنی ناراضی کا اظہار کیا ہے ۔ ایک صحافی اور اینکر پرسن نے بھی نواز شریف سے لندن میں مل کر میاں صاحب کی اس ناراضی کی آن دی ریکارڈ تصدیق کی ہے ۔ حیرانی کی بات مگر یہ ہے کہ اچانک میاں نواز شریف ، شہباز شریف سے مبینہ اپنی ناراضی سے مُکر گئے اور اس سلسلے میں ٹویٹ داغ دیا کہ ” شہباز شریف سے میری ناراضی کو غلط طور پر منسوب کیا جارہا ہے ۔ شہباز شریف تو بہت اچھا کام کررہے ہیں۔” سب سُن اور دیکھ کر حئران ہی تو رہ گئے ہیں ۔ تو کیا نواز شریف اور شہباز شریف رَل مل کر پاکستانی عوام سے ”گُڈ کاپ، بیڈ کاپ ” کی نُورا کُشتی کھیل رہے ہیں؟؟

عمران خان نے شائد یہ راز پا لیا ہے کہ حکومت کے حواس پر قابو پا کر اپنے سیاسی مقاصد پورے کئے جا سکتے ہیں ۔چنانچہ ہم دیکھ سکتے ہیں کہ خان صاحب کے دباؤ آئے روز اتحادی حکومت پر بڑھتے جا رہے ہیں ۔ اور یوں حکومت کی طرف سے بھی جواب میں ردِ عمل آ رہا ہے ۔ گویا کہا جا سکتا ہے کہ حکومت عمل اور ردِ عمل کے درمیان گھر کر رہ گئی ہے ۔ حکومت کے اعصاب پر عمران خان چھائے ہُوئے ہیں ۔ اٹھارہ اگست کو بھی عمران خان نے اسلام آباد میں ”آزادی اظہار ” کے ایک سیمینار سے خطاب کرتے ہُوئے اسٹیبلشمنٹ اور اتحادی حکومت کو آڑے ہاتھوں سے لیا ۔ ویسے اس فورم پر عمران خان کا خطاب عجب مضحکہ خیز تھا کہ خان صاحب اپنے پونے چارسالہ اقتدار کے دوران آزادی اظہار کی دھجیاں اڑاتے رہے ۔ اُن کے دورِ حکومت میں ملک بھر کا میڈیا عملاً پابجولاں رہا۔ لاتعداد صحافی بے روزگار بنا دئیے گئے ۔ بہت سے اغوا کئے گئے ۔ کئی ایک گولی کا نشانہ بنائے گئے ۔ اس کے باوجود عمران خان کا دعویٰ ہے کہ وہ آزاد صحافت سے ڈرتے نہیں ہیں ۔ اس ”مستقل مزاجی” پر فدا ہونا چاہئے ۔ اٹھارہ اگست کو اسلام آباد میں جس فورم سے عمران خان نے خطاب کیا، اس میں بھی خان صاحب نے یکساں طور پر اسٹیبلشمنٹ اور اتحادی حکومت کو رگیدنے کی کوشش کی ۔ خان صاحب نے کہاکہ یہ ہماری اسٹیبلشمنٹ تھی جو مجھے نون لیگ اور پیپلز پارٹی کے لیڈروں کی کرپشن کے قصے کہانیاں سنایا اور بتایا کرتی تھی ، اور اب یہی اسٹیبلشمنٹ اِنہی مبینہ کرپٹ افراد کو حکومت میں لے آئی ہے ۔ عمران خان نے یہ بھی کہا کہ اب بھی وقت ہے کہ اسٹیبلشمنٹ اپنی پالیسیوںپر نظرِ ثانی کرے ۔ یعنی دوسرے معنوں میں خان صاحب یہ کہنا چاہتے ہیں کہ اسٹیبلشمنٹ مجھے دوبارہ گود لے اور اقتدار کے ایوانوں میں پہنچا دے ۔ ایسا کرنا شائد اب ممکن نہیں رہا کہ اسٹیبلشمنٹ اور خان صاحب کے درمیان فاصلے بہت بڑھ چکے ہیں اور ناراضیاں شدت اختیار کر چکی ہیں ۔ عمران خان خاموش ہُوئے تو نون لیگی قیادت نے خان ساحب کے الزامات کا جواب دینا فوری طور پر مناسب سمجھا ۔ اس کے لئے وزیراطلاعات محترمہ مریم اورنگزیب سامنے آئیں اور خان صاحب کی کہی گئی کئی باتوں کا ترنت جواب دینے کی کوشش کی ۔ مریم اورنگزیب نے کہا کہ عمران خان ہمت کریں اور قوم کو بتائیں کہ وہ کونسی سرکاری ایجنسیاں تھیں جو اُنہیں نون لیگ اور پیپلز پارٹی کی لیڈر شپ کی کرپشنوں کی کہانیاں سنایا کرتی تھیں؟ اُنہوں نے یہ بھی سوال اٹھایا کہ عمران خان پر لازم ہے کہ وہ قوم کو جرأت کر کے یہ بھی بتائیں کہ ایجنسیوں کے کون کون لوگ تھے جو اُنہیں دونوں جماعتوں کے بارے میں یہ خفیہ باتیں بتایا کرتے تھے؟مریم اورنگزیب صاحبہ نے اپنے ترنت جواب میں عمران خان کی مبینہ کرپشنوں کی کئی داستانوں کا ذکر بھی کیا اور اپنے سننے اور دیکھنے والوں کو یہ بھی بتایا کہ عمران خان اور اُن کے کئی فرنٹ مین نے کس طرح اور کتنا پیسہ لُوٹا۔ ان میں ، بقول اُن کے، کچھ خواتین بھی شامل تھیں ۔ خاص بات مریم اورنگزیب نے یہ کہی کہ عمران خان کرپشن کرنے والوں کو تیس فیصد ادا کرتے تھے اور خود کرپشن کا ستر فیصد رکھ لیتے تھے ۔ یہ انتہائی سنگین الزام ہے ۔ اُمید کی جاتی ہے کہ مریم اورنگزیب ان الزامات کے ساتھ کبھی ثبوت بھی فراہم کریں گی ۔وزیر اطلاعات نے یہ بھی کہا کہ عمران خان نے ملک بھر میں عجب تماشہ لگایا ہُوا ہے ۔ اب اس تماشے کو بند ہونا چاہئے ۔ لیکن ہمارا خیال ہے کہ عمران خان اتحادی حکومت پر اپنے تابڑ توڑ حملے جلد بند نہیں کریں گے ، تاوقتیکہ حکومت نئے الیکشن کے انعقاد کا اعلان نہ کر دے ۔ اور یہی عمران خان چاہتے ہیں ۔ لیکن اب حالات ایسے تشکیل پا رہے ہیں کہ حکومت جلد انتخابات نہیں کروانا چاہتی ۔ اس بارے میں شائداُسے اسٹیبلشمنٹ کا اشارہ بھی حاصل ہے ۔عمران خان کو اس بات کا بھی دکھ ہے کہ اسٹیبلشمنٹ نے اتحادی حکومت کے ساتھ معاملات سیدھے کیوں کررکھے ہیں ۔مریم اورنگزیب کہتی ہیں کہ عمران خان کے ایک نمایاں ساتھی نے افواجِ پاکستان میں بغاوت کرانے کی قابلِ مذمت کوشش کی اور اب یہ شخص اپنے کئے کا بھگتان بھی بھگت رہا ہے اور یہ بھگتان ساری دنیا دیکھ بھی رہی ہے ۔ سچی بات تو یہ نظر آتی ہے کہ عمران خان نے اتحادی حکومت کو ردِ عمل دینے کا عادی سا بنا دیا ہے ۔ اس کی شائدبڑی وجہ یہ ہے کہ عمران خان کا بیانیہ (خواہ وہ جیسا کیسا بھی ہے)عوام میں مقبولیت اختیارکر چکا ہے ۔ اور یہ مقبول بیانیہ ہی اتحادی حکومت کے لئے دردِ سر بنا ہُوا ہے ۔ اسی نے وزیر اعظم شہباز شریف کو بھی پریشان کررکھا ہے جن کی حکومت میں مہنگائی نے منہ زوری اختیار کررکھی ہے اور اتحادی حکومت ہاتھ پر ہاتھ دھرے ٹک ٹک دیدم ، دم نہ کشیدم کی عملی تصویر بن کر رہ گئی ہے ۔شہباز شریف کی قیادت میں اتحادی حکومت برسر اقتدارآئی تو عوام نے تمنا کی تھی کہ ملک میں مہنگائی، گرانی اور بے روزگاری کا کچھ تو خاتمہ ہوگا۔وزیر اعظم شہباز شریف کو اقتدار سنبھالے تقریباً پانچواں مہینہ گزر رہا ہے مگر یہ عوامی خواہش پوری نہیں ہو سکی ہے ۔اَس پر عوام میں مایوسیاں اور غصے ساتھ ساتھ بڑھ رہے ہیں ۔ اس کارن خصوصی طور پر نون لیگ کی مقبولیت زوال اور نامقبولیت کی طرف بڑھ رہی ہے ۔ شہباز شریف مگر ان نقصانات سے بالا رہ کر اپنے اقتدار سے لطف اندوز ہو رہے ہیں ۔ یوں شنید ہے کہ نواز شریف اور شہباز شریف میں ناراضیاں اور فاصلے بڑھ رہے ہیں ۔ نون لیگ میں واضح طور پر دو دھڑے بن چکے ہیں ۔ ایک دھڑا نواز شریف کی سوچ کا عکاس ہے اور دوسرا شہباز شریف کی سوچ پر عمل پیرا ہے ۔ اس تقسیم کو واضح طور پر محسوس کیا جارہا ہے ۔ اور یوں ملک میں ان آوازوں میں اضافہ ہورہا ہے کہ نواز شریف لندن سے وطن واپس آکر نون لیگ کی ڈوبتی ناؤ کو کنارے لگائیں۔ محسوس کیا جارہا ہے کہ شہباز شریف کی حکومت کو دو واقعات نے سخت دھچکے پہنچائے ہیں ۔ دونوں واقعات پٹرول کی قیمتوں میں ہوشربا اضافے سے تعلق رکھتے ہیں ۔ اقتدار میں آتے ہی شہباز شریف نے پٹرول کی مصنوعات میں کمر شکن اضافہ کیا تو اس اقدام کا یوں بھاری نقصان اٹھانا پڑا کہ نون لیگ پنجاب میں ضمنی انتخابات میں اکثریتی طور پر ہار گئی ۔ نون لیگ کو پھر بھی ہوش نہ آیا ۔ اور اب پھر اُس نے پٹرول کی قیمت میں سات روپے فی لٹر کا اضافہ کرکے مہنگائی کا بم گرا دیا ہے ۔ اس اقدام سے ملک بھر کے عوام نون لیگی وزیر اعظم کے خلاف سخت ناراضی اور غصے کا اظہار کررہے ہیں ۔حکومت کی طرف سے جاری کردہ اعدادو شمار کے مطابق اٹھارہ اگست کو ملک میں مہنگائی بیالیس فیصد سے بھی بڑھ گئی ہے ۔ یہ ایک نیا ریکارڈ ہے ۔ ڈالر کی قیمت میں بھی دو روپے کا اضافہ ہُوا ہے ۔یوں عوام اور کاروباری افراد کا غصہ یکساں طور پر اوپر بڑھ رہا ہے ۔اس غصے کو نون لیگ کی حریف جماعت پی ٹی آئی پوری طرح کیش کروا رہی ہے ۔ سچی بات یہ ہے کہ مہنگائی نے تمام ریکارڈ توڑ دئیے ہیں ۔ عوام بلبلا رہی ہے اور حکمرانوں کے اللے تللے ختم نہیں ہو رہے ۔اس ضمن میں پی ٹی آئی کی طرف سے نون لیگ اور اتحادی حکومت کے خلاف پروپیگنڈہ پورے عروج پر ہے ۔ یہ پروپیگنڈہ اتنا بے بنیاد بھی نہیں ہے ۔ عوام کو نون لیگی وزیر اعظم کے اس بیانئے سے کوئی خاص سروکار نہیں ہے کہ ”ہم نے فیصلے کرکے ریاست بچائی ہے ، اور ملک کو دیوالیہ نہیں ہونے دیا۔”یہ بیانیہ عوام کو متاثر نہیں کررہا ۔ اوپر سے ملک میں سیلابوں نے جو تباہیاں مچائی ہیں ، اس نے بھی اتحادی حکومت کے وزیر اعظم کیلئے بڑے مسائل پیدا کئے ہیں ۔ملک بھر میں درجنوں لوگ سیلابوں نے ہلاک کر دئے ہیں ، ہزاروں مکانات زمین بوس ہو گئے ہیں ، سڑکیں برباد ہو گئی ہیں ، فصلیں خراب ہو گئی ہیں ، کسانوں کے مال مویشی یا تو سیلابوں میں بہہ گئے ہیں یا بیمار ہو چکے ہیں ۔ یہ مناظر اتحادی حکومت کے وزیر اعظم کے لئے واقعی پریشان کن ہیں ۔ اور ملک پہلے ہی مالی مسائل کا شکار ہے ۔حیرانی کی بات مگر یہ ہے کہ حکومت کے سامنے سیلابوں کے متاثرین کی دستگیری کرنے کی بجائے یہ ہدف ہے کہ پی ٹی آئی کے رہنما اور عمران خان کے چیف آف اسٹاف شہباز گل کے مبینہ فوج مخالف بیان کی بنیاد پر پی ٹی آئی کو رگڑا دیا جائے ۔ سارے وزرا پوری تندہی کے ساتھ پی ٹی آئی کے خلاف بروئے کار ہیں ۔ اس مقصد کی خاطر آئے روز پریس کانفرنسیں کررہے ہیں ۔ اتحادی حکومت کے ان وزیروں مشیروں کو یقینِ کامل ہے کہ یہ پریس کانفرنسیں پی ٹی آئی کو عوام کی نظروں میں گرا دیں گی ۔ ایسا ہونا فی الحال ممکن نظر نہیں آ رہا ۔ عمران خان نے ملک بھر میں جلسے کرنے کا جو اعلان کیا ہے ، یہ اقدام نون لیگ اور اتحادی حکومت کے ان مقاصد کو سیلاب کی طرح بہا لے جائیگا۔ شہباز شریف کی حکومت پر الزام لگ رہا ہے کہ اُس نے شہباز گل پر تشدد کروایا ہے ۔ اگرچہ یہ تشدد فی الحال ثابت تو نہیں ہو سکا ہے لیکن اس کا تاثر خاصا ابھرا ہے ۔ حکومت اس کی تردید کرنے پر زور دے رہی ہے لیکن پی ٹی آئی کا زبردست پروپیگنڈہ کامیاب ہوتا نظر آ رہا ہے ۔ حیرانی کی بات ہے کہ اس پورے منظر میں پیپلز پارٹی مہر بہ لب ہے جیسے اُسے تازہ مناظر سے کوئی دلچسپی ہی نہیں ہے ۔ حکومت معاشی میدان میں جو عوام دشمن فیصلے اور اقدام کر رہی ہے، ان کی موجودگی میں یہ توقع رکھنا ہی عبث ہے کہ عوام اتحادی حکومت کے پی ٹی آئی دشمن بیانئے کو کوئی خاص اہمیت دے گی ۔ نون لیگ اور اتحادی حکومت نے اگر عوام کے ووٹ لینے ہیں تو اُسے عوام کو مہنگائی ، گرانی اور بے روزگاری کے سیلابوں اور طوفانوں سے نجات دلانے کے لئے عملی اقدامات کرنا ہوں گے ۔شہباز شریف کی خاموشیاں بھی عوام میں بددلی پیدا کررہی ہیں ۔ عوام بجا طور پر یقین کئے بیٹھے ہیں کہ شہباز شریف عوامی مصائب پر خاموش رہ کر دراصل اسٹیبلشمنٹ کی خدمت کررہے ہیں ۔ یہ خدمت نہ تو پہلے نون لیگ کے لئے فائدہ مند ثابت ہُوئی تھی اور نہ اب ثمر آور ثابت ہوگی ۔ تاریخ کا یہ سبق یاد رکھ لیا جائے ۔ حیرانی کی بات یہ ہے کہ فریقین اسٹیبلشمنٹ پر تنقید بھی کررہے ہیں اور اندر خانے اسٹیبلشمنٹ کی دعائیں اور اشیرواد حاصل کرنے کی کوششیں بھی جاری ہیں ۔ یوں ہماری سیاسی جماعتوں کی منافقت اور دوغلا پن ایک بار پھر اُبھر کر سامنے آ رہا ہے ۔ سچی بات یہ ہے کہ یہ اسٹیبلشمنٹ ہی ہے جس نے عمران خان کے دَور میں بھی دُنیا سے عمران خان کے تعلقات استوار کروائے ، حالانکہ عمران خان نے اپنی سنگین غلطیوں سے امریکہ، سعودی عرب اور چین سے تعلقات خراب کر دئیے تھے ۔یو اے ای بھی پاکستان سے ناراض ہو چکا تھا۔ پھر جنرل قمر جاویدباجوہ صاحب نے دوڑ دھوپ کرکے عمران خان کے تعلقات ان ممالک سے بہتر بنانے میں بنیادی کردار ادا کیا۔ حالات اب بھی ویسے ہی ہیں ۔ یہ جنرل باجوہ صاحب ہیں جوسعودی عرب سے مکالمہ کرکے شہبازشریف کی حکومت کیلئے مالی امداد حاصل کرنے میں کامیاب ہُوئے ہیں ۔ سعودی عرب اور یو اے ای نے جناب جنرل قمر جاوید باجوہ کو اپنے ملک کے اعلیٰ ترین ایوارڈوں سے بھی نوازا ہے ۔ ان ایوارڈوں سے پاکستان کا نام بھی روشن ہُوا ہے اور افواجِ پاکستان کا بھی ۔ یہ بھی ثابت ہُوا ہے کہ افواجِ پاکستان اور اس کے سربراہ کو مشرقِ وسطیٰ کے ممالک اور خاص طور پر سعودی عرب اور یو اے ای میں عزت و اکرام اور احترام کی نگاہ سے دیکھا جاتا ہے ۔عالمی اور سفارتی سطح پر جو کامیابیاں جنرل قمر جاوید باجوہ نے سمیٹی ہیں، یہ کامیابیاں شہباز شریف اور عمران خان کی حکومتوں کے سفارتکاروں کا نصیب نہیں بن سکی ہیں ۔ یوں ہمیں اور ہمارے حکمرانوں کو یہ حقیقت تسلیم کرنی چاہئے کہ امورِ مملکت چلانے میں ہماری ملٹری اسٹیبلشمنٹ کا کردار کس قدر اہم اور بنیادی ہے ۔ اس کردار کو کم کیا جا سکتا ہے لیکن شرط یہ ہے کہ ہماری سویلین حکومتیں اور اُن کے کارپرداز اپنی اہلیت ثابت کریں ۔

ایک دن پہلے ، بروزاتوار،چودہ اگست کا یومِ آزادی بھی شاندار طریقے سے گزر گیا۔ یہ ہمارا پچھترواںیومِ آزادی تھا ۔تمام صوبائی اور مرکزی حکومت نے بڑے احسن انداز میں یہ یومِ آزادی منایا۔ کئی نئی باتیں بھی سامنے آئی ہیں۔ مثال کے طور پر نئے میوزک کے ساتھ قومی ترانہ پڑھا گیا۔ پاکستان کے تمام حصوں سے چنیدہ بچوں کو قومی اسمبلی میں بٹھایا گیا اور اُن سے پاکستان کے حق میں تقاریر کروائی گئیں۔ یوں نئی نسل میں جذبہ حب الوطنی بھی اجاگر کرنے کی کوشش کی گئی اور نئی نسل کو یہ بھی بتایا گیا کہ قومی اسمبلی کیسے کام کرتی ہے اور اُن کے چُنے گئے نمائندگان قومی اسمبلی میں کیسے بیٹھتے ہیں ۔ یہ ایک اچھا اور قابلِ تحسین اقدام اور آئیڈیا تھا۔اِس بار ملک کے کئی صحافیوں، فنکاروں، ڈاکٹروں ، اہلِ ہنر اور اپنے شعبوں میںنام اور ناموری حاصل کرنے والوں کے لئے قومی تمغوں کا اعلان بھی کیا گیا۔ ہماری طرف سے ان سب تمغہ یافتگان کو مبارکباد۔اِس یوم آزادی کے موقع پر ایک اہم پہلو یہ بھی سامنے آیا کہ چیف آف آرمی اسٹاف جنرل قمر جاوید باجوہ برطانیہ میں تھے اور اُنہوں نے وہاں برطانیہ کے مشہور فوجی ٹریننگ کے ادارے کی سالانہ پریڈ کی صدارت کی ۔ یہ پاکستان، پاکستانی عوام اور افواجِ پاکستان کے لئے یقیناً ایک بڑا اعزاز اور اکرام ہے ۔برطانوی عسکری ادارے میں جنرل موصوف نے جو خطاب کیاہے، اس کی بھی تحسین کی گئی ہے ۔اِ س یومِ آزادی کے موقع پر کئی سیاسی جماعتوں نے لاہور اور اسلام آباد میں اپنی اپنی توفیق اور طاقت کے مطابق جلسے کئے اور تقاریر کیں ۔اسلام آباد اور راولپنڈی کے سنگم پر ٹی ایل پی نے جلسہ کیا اور لوگوں کو اپنے سلوگن کی طرف مائل کرنے کی کوشش کی ۔ اس بار ٹی ایل پی کے اس جلسے میں مرحوم خادم حسین رضوی کے صاحبزادے نے اپنے بیان کا جادو جگانے کی کوشش تو کی لیکن بات نہ بن سکی ۔ صاحبزادہ صاحب کے پاس نہ تو والد صاحب کی طرح کا علم اور تجربہ ہے اور نہ ہی اُن کی شخصیت میں کشش پائی جاتی ہے ۔ بس وہ باپ کی گدی پر بیٹھ کر انجوائے کررہے ہیں ۔ اُن کے تازہ خطاب کا ایک فقرہ بہرحال بڑا اچھاسامنے آیا ہے :” یہ ملک ایک کھلاڑی کو وزیر اعظم بنانے کے لئے نہیں بنایا گیا تھا۔”ٹی ایل پی کے جلسے کے ساتھ ہم نے وزیر اعظم شہباز شریف کی تقریر بھی تیرہ اگست کی رات ہی کو سُنی۔اُن کی تقریر پندرہ منٹ کو محیط تھی ۔ اس میں مگر کوئی دلچسپ عنصر تھا نہ کوئی قوم کے لئے ولولہ اور پیغام۔ بس الفاظ کی جگالی کی گئی تھی جسے سامعین نے لاپراہی سے سُنا۔ پوری قوم تو توقع کررہی تھی کہ شہباز شریف قوم کو یومِ آزادی کے موقع پر کوئی خوشخبری سنائیں گے مگر ایسا نہ ہو سکا۔ یوں اُن کی تقریر سُن کر عوام کے جذبات پر اوس سی پڑ گئی ۔ وزیر اعظم شہباز شریف کو سوچنا چاہئے تھا کہ اُن کے قوم سے خطاب کے بعد ٹی ایل پی کے لیڈر اور پی ٹی آئی کے چیئرمین کی تقریریں بھی ہونی ہیں، اسلئے اُن کا خطاب زور دار ہونا چاہئے ۔ ہم نے مگر دیکھا کہ اُن کا خطاب زور دار اور ولولہ انگیز نہیں تھا۔ لوگ کھلے عام وزیر اعظم اور عمران خان کے خطبات کا تقابل کرتے رہے ۔ عمران خان کا خطاب کہیں زیادہ بہتر تھا۔ سوا گھنٹے سے زیادہ وقت پر محیط۔ عمران خان کے حریف اور حلیف، سبھی،خانصاحب کی سیاسی توانائیوں اور سیاسی تحرک پر حیران بھی ہیں اور کسی قدر پریشان بھی۔اقتدار سے بوجوہ محروم کئے جانے کے باوجود حریفوں کے خلاف ان کی للکار ماند اور مدہم نہیں پڑی ہے۔ اس اعتبار سے عمران خان کو اپنے حریفوں اور اپنے مخالفین پر تفوق حاصل ہے۔ اس برتری اور تفوق کا احساس عمران خان کو بھی ہے۔ محاورے کے مطابق: خانصاحب مگر آجکل گرم پانیوں میں گھرے ہوئے ہیں۔ان گرم اور گہرے پانیوں سے جلد نکلنا سہل اور آسان نہیں ہے۔ایک تو الیکشن کمیشن کے حالیہ فیصلے نے انہیں پریشان کررکھا ہے۔لا تعداد وساوس اور خدشات کے طوفانوں نے خان صاحب کو اپنے حصار میں لے رکھا ہے۔یہ گھیراؤ خاصا وسیع،متنوع اور گمبھیر ہے۔ان کے خلاف ریفرنس بھی دائر ہو چکے ہیں جن کے مقاصد بظاہر یہ ہیں کہ عمران خان کو مبینہ قانونی خلاف ورزیوں کی بنیاد پر سیاست اور پارٹی سے آوٹ کیا جائے۔ایسا کرنا مگر آسان نہیں ہے کہ خانصاحب کا ادعا ہے کہ وہ وطن عزیز کی سب سے بڑی سیاسی پارٹی کے سربراہ ہیں اور یہ کہ ان کی پارٹی کی جڑیں چاروں صوبوں،گلگت بلتستان اور آزاد کشمیر میں بھی گہری ہیں۔یہ محض دعوی ہی نہیں، حقیقت بھی ہے۔ماضی قریب میں بھی طاقتوروں اور ہمہ مقتدرین نے کئی سیاسی جماعتوں اور ان کے سربراہوں کو سیاست اور اقتدار سے رخصت کرنا چاہا۔اس ہدف کے حصول کی خاطر ان جماعتوں اور ان کے سربراہوں کے خلاف سنگین الزامات عائد کئے گئے اور ان الزامات کی بکثرت تکرار بھی کی گئی۔ پاکستان پیپلز پارٹی اورنون لیگ کو بیخ و بُن سے اکھاڑنے اور انہیں معدوم کرنے کی کیا کیا کوششیں بروئے کار نہیں لائی گئیں؟ نواز شریف، شہباز شریف،محترمہ بے نظیر بھٹو اور آصف علی زرداری کے خلاف کیا کچھ بھد اور گرد نہیں اڑائی گئی؟وقتی طور پر یہ جماعتیں اور ان کے سربراہ پس پردہ بھی چلے گئے اور ان کا رسوخ بھی کم ہوتا نظر آیا لیکن آج ہم اپنے ارد گرد دیکھتے ہیں تو دونوں جماعتیں پھر سے تمام طاقت و توانائی کے ساتھ میدان سیاست میں ہیں۔نواز شریف کی مقبولیت کم کی جا سکی ہے نہ آصف علی زرداری کی اہمیت۔یوں سوال کیا جا سکتا ہے کہ کہاں گئیں ان قوتوں کی کوششیں جو انہیں معدوم کرنا اور مٹانا چاہتی تھیں؟سبق اور درس یہ ہے کہ اگر تمام تر حربوں اور ہتھکنڈوں کے باوصف نون لیگ اور پیپلز پارٹی کو ختم نہیں کیا جا سکا ہے تو پی ٹی آئی کو بھی ختم نہیں کیا جا سکے گا۔پی ٹی آئی سے یقینی طور پر کئی غلطیاں سر زد ہوئی ہیں۔ ان غلطیوں کی جڑ میں یہ احساس کارفرما تھا کہ ہم کسی کے خاص محبوب اور لاڈلے ہیں۔ اور ہم ہی اکلوتا آپشن ہیں۔ وقت نے مگر ثابت کیا کہ کوئی کسی کا مستقل لاڈلا نہیں ہوتا اور نہ ہی مستقل محبوب۔ یہ وقت اور سیاسی و معاشی جبر ہیں جو کبھی کسی کو اور کبھی کسی کو کسی کا محبوب اور لاڈلا بناتا ہے مگر یہ وقت ہی ہے جو اس بت کو پاش پاش بھی کرتا ہے اور کبر ونخوت کو بکھیر کر رکھ دیتا ہے۔ بعض لوگوں کا واہمہ اورخیال تھاکہ عمران خان اقتدار سے فارغ ہو کر بکھر جائیگا اور اس کی توانائیاں کمزوریوں میں بدل جائیں گی کہ ان کے سہارے اور بیساکھیاں توڑ دی گئی تھیں۔اقتدار سے محرومی کے وقت، اپنی بے پناہ غلطیوں کے سبب، عمران خان ملک بھر میں نامقبولیت اور ناپسندیدگی کے پاتال میں گرے پڑے تھے۔ اقتدار سے محرومی نے ان کے لئے وہ کام کیا جو کسی کبڑے کی کمر پر لات رسید کرنے سے کبڑا پن ختم ہو گیا تھا۔ اقتدار سے محرومی کے بعد خان صاحب ایک نئے ولولے سے اٹھے ہیں اور اپنے حریفوں کے حواس پر چھا گئے ہیں۔ان کے آئے روز کے جلسے جلوس اور پریس کانفرنسیں دیکھ اور سن کر خانصاحب کے حریفوں کے اعصاب اور عضلات میں اینٹھن شروع ہو جاتی ہے۔اس ہفتے جبکہ سارا ملک 14 اگست کے حوالے سے یوم آزادی کے جشن منانے کی پُر جوش تیاریاں کررہا تھا، عمران خان نے 13 اگست کو لاہور کے ہاکی اسٹیڈیم میں پی ٹی آئی کا اجتماع رکھ دیا ۔یہ جلسہ تیرہ اگست کی رات ہُوا اور خوب ہُوا۔بہت کامیاب جلسہ تھا۔عمران خان اپنے مخالفین پر حسبِ معمول خوب برسے ۔ اپنے آئندہ کے عزائم کا اعلان بھی کیا اور اپنے چاہنے والوں کے دل بھی گرمائے ۔اُنہوں نے حسبِ معمول نیوٹرلز کا ذکر تو نہیں کیا لیکن وہ اُنہیں بھولے بھی نہیں۔اس شاندار جلسہ میں خان صاحب نے بڑی جرأت سے اعلان کیا کہ وہ اب ہر ہفتے ملک بھر کے مختلف شہروں میں جلسے کریں گے اور یہ جلسے تب تک جاری رہیں گے جب تک شہباز شریف کی اتحادی حکومت گرا نہیں دیتے ۔اس حوالے سے اُنہوں نے اپنا شیڈول بھی پڑھ کر لوگوں کو سنایا۔ سامعین نے بھرپور تالیاں بجا کر اُن کے اس شیڈول کی ہمنوائی کی۔ اندازہ یہی ہے کہ اتحادی حکومت کے اعصاب پر خان صاحب کا یہ شیڈول بم بن کر گرا ہوگا کہ اتحادی حکومت کے پاس خان صاحب کے مقابلے کیلئے کوئی لائحہ عمل نہیں ہے ۔عمران خان کو آجکل اپنے چیف آف اسٹاف،ڈاکٹر شہباز گل، کی گرفتاری کے کارن بڑی پریشانی ہے۔شہباز گل کی گرفتاری بوجوہ عمل میں آئی ہے۔عمران خان اس حراست پر غصے میں بھی ہیں لیکن انہوں نے گل صاحب کی مبینہ گفتگو کی مذمت نہیں کی۔جو کچھ ہوا ہے، ایسا ہونا ہی تھا کہ شہباز گل مبینہ طور پر کئی سنگین غلطیوں کے مرتکب ہوئے ہیں۔ بلکہ وزیر داخلہ،رانا ثناء اللہ کے بقول،اس بار گھوڑے نے بم کو لات مار دی ہے۔خانصاحب کے معتمد خاص شہباز گل کا ہاتھ اگرچہ بیلنے میں آچکا ہے مگر خان صاحب اپنے ہدف پر نگاہیں جمائے ہوئے ہیں۔انہوں نے جلسہ ملتوی کیا ہے نہ موخر۔ اجتماع یا جلسے کا مقام بس تبدیل کیا ہے، یہ ثابت کرنے کے لئے کہ یو ٹرن لینا ایک بڑے لیڈر کا طرہ امتیاز ہوتا ہے۔خان صاحب لاہور نے ہاکی اسٹیڈیم میں 13 اگست کو جلسہ کرکے دراصل جشن آزادی کے دو دن مسلسل عوام اور میڈیا کی پوری توجہ اپنی طرف منتقل اور منعطف کی۔ اس منظر سے شاید درجن بھر اتحادی جماعتیں دیکھتی ہی رہ گئیں۔ لاریب خان صاحب ایک بڑے اسٹریٹجسٹ بھی ہیں۔ ان کے مخالفین اسٹریٹجی بنانے میں ان کی گرد کو بھی نہیں چھو سکتے۔ خانصاحب لاہور میں ایک بار پھر بڑا جلسہ کرنے میں کامیاب بھی ہو گئے ہیں کہ اس بار اس جلسے کے انعقاد میں وزیر اعلی پنجاب، چودھری پرویز الہی،کا دستِ تعاون بھی پوری طرح کار فرما اور بروئے کار تھا۔ یوں کہا جا سکتا ہے کہ تیرہ اگست کا پی ٹی آئی کا یہ جلسہ خان صاحب کے حریفوں کو عمران مخالف اسٹریٹجی تشکیل دینے پر پھر مجبور کر دے گا۔واقعہ یہ ہے کہ یہ جلسہ اور اجتماع بھی عمران خان کے انتھک اور بضد ہونے کا ثبوت ہے۔ انہوں نے اس جلسے سے قبل اوپر تلے جو پریس کانفرنسیں کی ہیں، جس سے اُن کے عزائم اور اہداف عیاں ہیں۔ خاص طور پر 10 اگست کو ان کی نیوز کانفرنس ہمہ مقتدرین کے لئے خاصی جارحانہ تھی۔ ان پریس کانفرنسوں میں عمران خان نے حسب معمول کوئی نئی بات نہیں کی بلکہ پرانی باتوں کو پھر سے دہرایا ہے۔یہ بھی ان کی خاص حکمت عملی ہے کہ اپنی پرانی باتوں کو بار بار دہرایا جائے اور اپنے عشاق سامعین کے ذہنوں میں انہیں راسخ کر دیا جائے۔مخالفین کہتے ہیں کہ عمران خان بار بار جھوٹ بولنے اور بے بنیاد باتیں دہرانے میں اپنا ثانی نہیں رکھتے۔تسلیم کرنا چاہئے کہ عمران خان نے اس اسلوب سے بھی کامیابیاں سمیٹی ہیں۔ان کے مبینہ جھوٹ کا بھی مخالفین کے پاس توڑ کم کم ہے۔عمران خان نے 13 اگست کے جلسے کیلئے قبل از وقت اپنے اعلانات کو ظاہر نہ کرکے اسرار اور سسپنس قائم کر رکھا ۔ یہ سسپنس ان کے سیاسی حریفوں کو کئی دنوں تک مسلسل کرب میں مبتلا کئے رہا۔ یہی خانصاحب کی کامیابی ہے۔اس جلسے سے قبل اتحادی جماعتوں کے مقتدرین نے بھی باری باری پریس کانفرنسیں کیںتاکہ خان صاحب کے اثر اور سحر کو مدہم کیا جا سکے۔یہ تیر مگر ہدف پر نہیں بیٹھے۔ عمران خان نے مخالفین کے خلاف اپنی سوچی سمجھی اسٹریٹجی میں مذہب کا رنگ بھرنے کے نئے اور موثر اقدامات کئے ہیں۔ بہت سے لوگ ان اقدامات سے بھی پریشان ہیں۔ اگر مذہب کا نام لے کر جنرل ضیاء الحق، جماعت اسلامی اور مولانا فضل الرحمن و دیگر مذہب پسند اقتدار واختیار پر قبضہ جمانے کی کوشش کر سکتے ہیں تو” حضرت مولانا” عمران خان کیوں نہیں؟؟تیرہ اگست کے جلسے میں بھی عمران خان نے کئی مذہبی اصطلاحات استعمال کیں اور اپنے سننے والوں کو کلمہ شریف کے معنی سمجھانے کی کوشش کرتے رہے ۔اُنہوں نے تیرہ اگست کے جلسے میں مولانا فضل الرحمن ، شہباز شریف اور آصف علی زرداری کے نام بھی حسبِ عادت بگاڑ کر لئے ۔ ایسا کرکے عمران خان دراصل اپنے مخالفین کا مضحکہ اڑاتے ہیں اور خوش ہوتے ہیں ۔ حیرانی کی بات ہے کہ ان بیہودہ الفاظ و القابات سے اُن کے سامعین اور فالوورز حظ اٹھاتے ہیں ۔ یہ شرمناک منظر ہوتا ہے ۔اتنا ضرور کہا جائیگا کہ عمران خان نے اسلام آباد کی بجائے لاہور میں جلسہ کرکے بہترین حکمتِ عملی کا مظاہرہ کیا۔ اس جلسے میں وزیر اعلیٰ پنجاب چودھری پرویز الٰہی کا خطاب بھی خوب تھا مگر اس میں دلکشی بالکل بھی نہیں تھی ۔

لگتا ہے ملک بھر کی سیاست میں انگارے سے بھر گئے ہیں ۔ جملہ فریقین الگ الگ دھڑوں میں کھڑے ہو کر اپنے اپنے سیاسی مفادات سمیٹنے میں مگن اور مصروف ہیں ۔ قومی اور عوامی مفادات جائیں بھاڑ میں ۔یوں بھی لگتا ہے جیسے ایک طرف چیئرمین پی ٹی آئی اکیلا کھڑا ہے اور اُن کے مقابلے میں ملک بھر کی 13سیاسی جماعتیں متحد ہو کر اِس ایک شخص کو چِت کرنا چاہتی ہیں ۔ اِس سیاسی دنگل کو ایک انگریزی معاصر کے کارٹونسٹ نے بھی شرارتی لکیروں کے نام سے قارئین کے سامنے پیش کیا ہے ۔ درجن سے زائد یہ سیاسی جماعتیں عرفِ عام میں ”پی ڈی ایم” کے نام سے جانی پہچانی جارہی ہیں ۔ اِس سیاسی اتحاد کی مرکزی حکومت کے وزیر اعظم جناب شہباز شریف ہیں اور اس اتحاد کے سربراہ حضرت مولانا فضل الرحمن ہیں ۔پی ڈی ایم اور پی ٹی آئی ایک دوسرے کے مقابل کھڑی ہیں اور ایک دوسرے کو شکستِ فاش دینا چاہتی ہیں ۔ عمران خان بے پناہ انرجی کے ساتھ اپنے متحدہ حریفوں کو ہر روز جلسوں اور جلوسوں میں للکار رہے ہیں ۔ اُن کے سوشل میڈیا کے لشکر اُن کی آواز بن کر ”پی ڈی ایم” کے متحدہ غبارے سے ہوانکالنے کی اپنی بھرپور کوشش کررہے ہیں ۔ عمران خان کے سوشل میڈیا کے لشکروں کی پیدا کردہ فضا سے کئی نا مناسب، دلشکن اور ناقابلِ رشک مثالیں بھی سامنے آ رہی ہیں ۔ خانصاحب مگر ان آوازوں کو کم اور مدہم کرنے پرتیار نہیں ۔ وہ اِسی میں اپنی کامیابیاں اور فتوحات دیکھ رہے ہیں ۔جب سے عمران خان ”پی ڈی ایم” کی متحدہ کوششوں سے اقتدار سے فارغ کئے گئے ہیں، تب سے ”پی ڈی ایم” کے خلاف عمران خان کی تنقید اور مخالفت میں زیادہ شدت دیکھی جا رہی ہے ۔ عمران خان ہر اُس شخص، گروہ یا ادارے کے خلاف تلوار سونت کر نکلے ہُوئے ہیں جس کے بارے میں اُنہیں یہ شبہ ہے کہ اس نے اُنہیں اقتدار سے نکال باہر کرنے میں کوئی کردار ادا کیا تھا۔ عمران خان ان سب کے خلاف برہنہ شمشیر بنے ہُوئے ہیں ۔دوسری طرف جب سے الیکشن کمیشن آف پاکستان نے عمران خان کے خلاف آٹھ سالہ پرانے مقدمے کا فیصلہ سنایا ہے ، نون لیگ اور پی ڈی ایم نے عمران خان کو سیاست سے ہی باہر نکالنے کی سبھی کوششیں بروئے کار لانے کا عہد اور فیصلہ کر لیا ہے ۔ اِسی مقصد کی خاطر پی ڈی ایم نے متفقہ اور متحدہ آواز بن کر عمران خان کے خلاف الیکشن کمیشن آف پاکستان میں ریفرنس دائر کر دیا ہے ۔ یہ ریفرنس 5اگست2022ء کو فیصل آباد سے منتخب ہونے والے نون لیگی رکن قومی اسمبلی ، محسن نواز رانجھا صاحب ، نے دائر کیا ہے ۔ الیکشن کمیشن آف پاکستان میں اس ریفرنس بارے 18اور23اگست2022ء کو سماعت ہوگی ۔”پی ڈی ایم” عمران خان کے خلاف پاکستان کی عدالتِ عظمیٰ میں بھی کچھ مقدمات لے جانا چاہتی ہے ۔”پی ڈی ایم” کی مرکزی اتحادی حکومت نے یہ بھی فیصلہ کیا ہے کہ عمران خان کا نام ای سی ایل میں ڈالا جائے۔یہ خبر سن کر خان صاحب نے کہا ہے کہ اگر ایسا ہُوا تو وہ اللہ کا شکر ادا کریں گے۔ گویا یوں کہا جا سکتا ہے کہ مرکزی حکومت اور عمران خان کے متحدہ حریف خان صاحب کا چاروں اطراف سے گھیراؤ کرنا چاہتے ہیں ۔عمران خان مگر بظاہر اس متحدہ گھیراؤ سے خائف نہیں ہیں ۔ اس کا اندازہ ہم اُن کے اس اعلان سے کر سکتے ہیں کہ ”مَیں اکیلا ہی قومی اسمبلی کی9سیٹوں پر ہونے والے ضمنی انتخابات لڑوں گا۔” یہ 9سیٹیں حال ہی میں خالی ہُوئی ہیں جب ”پی ڈی ایم” کے اسپیکر قومی اسمبلی،راجہ پرویز اشرف ، نے پی ٹی آئی کے مستعفی ہونے والے ارکانِ اسمبلی کے استعفے منظور کئے تھے اور ان منظور شدہ استعفوں کو الیکشن کمیشن نے بھی منظور کرتے ہُوئے ان کے بارے میں نوٹسز جاری کر دئیے تھے۔یوں ایک نیا ےُدھ سیاست کے میدانوں لگنے والا ہے ۔ پی ٹی آئی بھی خاموش بیٹھی ہے نہ ہاتھ پر ہاتھ دھرے ۔پی ٹی آئی پہلے ہی الیکشن کمیشن اور الیکشن کمشنر آف پاکستان کے خلاف محاز آرائی کو فروغ دے رہی ہے ۔ وہ الیکشن کمشنر کو استعفیٰ دینے پر مجبور کررہی ہے ۔ اور اب پی ٹی آئی نے بھی الیکشن کمیشن کے سربراہ کے خلاف ریفرنس دائر کر دیا ہے ۔ لیکن پھر خود ہی ریفرنس واپس بھی لے لیا ۔ یہ عجب حکمتِ عملی ہے ۔ پی ٹی آئی کے حلقوں کا کہنا ہے کہ الیکشن کمشنر کے خلاف ریفرنس ضرور دائر کیا جائیگا، ابھی واپس اسلئے لیا گیا ہے کہ اس میں کچھ ترمیمات و اضافے کرنا مطلوب ہیں ۔اِس دوران پچھلے ہفتے کے دوران اچانک ملکی معیشت میں بہتری کے آثار نمایاں ہونے لگے ۔ ڈالر کی اونچی پرواز کو تیزی سے زوال آنے لگا اور پاکستانی روپیہ رفتہ رفتہ تگڑا ہوتا دیکھا گیا ہے ۔ امریکی ڈالر کی قیمت تقریباً250روپے کے برابر ہو چکی تھی ۔ اس سے ہر کوئی پریشان ہورہا تھا۔ وزیر خزانہ اور وزیر اعظم بھی کم پریشان نہیں تھے ۔ پھر اگست کا مہینہ طلوع ہوتے ہی ہم نے یہ حیرت انگیز منظر دیکھا کہ ڈالر کی قیمت گرنے لگی اور روپیہ طاقتور ہونے لگا ۔ 7اگست2022ء کی صبح جس وقت یہ سطور لکھی جارہی ہیں، ڈالر گرتا گرتا 220روپے تک آ چکا ہے ۔ اُمید ہے کہ ڈالر کی قیمت مزید گرے گی ۔ اور یوں ہم نے دیکھا ہے کہ ملک کی اسٹاک مارکیٹ میں بھی تیزی آئی ہے اور سونے کی قیمتیں بھی کم ہُوئی ہیں ۔ اِس سے ملکی معیشت میں بہتری اور حوصلے کے آثار پیدا ہُوئے ہیں ۔ملکی مارکیٹ مندی کے مہیب سایوں سے قدرے باہر نکلی ہے ۔ یوں کہا جا سکتا ہے کہ وزیر اعظم شہباز شریف کی وفاقی حکومت کو بھی سنبھلنے اور فخر کرنے کے مواقع میسر آئے ہیں ۔ لیکن پاکستان کے سب سے بڑے صوبے میں سیاسی حالات یوں دگرگوں ہیں کہ یہاں نون لیگ کا اقتدار سے خاتمہ ہو چکا ہے ۔ نون لیگ کو حالیہ ایام میں اُس وقت زیادہ دھچکا لگا جب پنجاب میں 20سیٹوں کے ضمنی انتخابات میں اکثریتی سیٹوں پر نون لیگ کو شکست کا سامنا کرنا پڑا ۔ آج پنجاب میں نون لیگ کے برعکس قاف لیگ اور پی ٹی آئی کی متحدہ حکومت ہے ۔ یہ منظر نون لیگ کے اعصاب پر بھاری پڑ رہا ہے ۔ خاص طور پر چودھری پرویز الٰہی کے وزیر اعلیٰ بننے پر ۔ مگر یہ دیکھ کر سب کو حیرت ہو رہی ہے کہ چودھری پرویز الٰہی نے عمران خان کے مشورے پر جو22رکنی کابینہ بنائی ہے ، اس میں قاف لیگ کا ایک رکن بھی شامل نہیں ہے ۔ اس منظر نے پنجاب اسمبلی میں قاف لیگ کے ارکان کے دلوں میں شکر رنجی کے جذبات بھر دئیے ہیں ۔ وہ بیچارے تو وزارتوں کے خواب آنکھوں میں سجائے منتظر بیٹھے تھے ۔ کہا جا سکتا ہے کہ قاف لیگ کے جن ارکانِ اسمبلی کی طاقت سے چودھری پرویز الٰہی وزیر اعلیٰ بنے ہیں ، اُنہیں وزیر نہ بنانا ایک صریح زیادتی ہی تو ہے ۔ لیکن قاف لیگ میں چودھری پرویز الٰہی کے دھڑے کو اس کا کوئی قلق اور ملال نہیں ہے ۔ ذرائع کہتے ہیں کہ اگلے روز اِسی ضمن میں جب چودھری پرویز الٰہی کے فرزندِ ارجمند چودھری مونس الٰہی اپنے اور والد صاحب کے محسن، جناب عمران خان، سے ملے تو اُنہوں نے مبینہ طور پر خان صاحب سے یوں کہا:”چودھری پرویز الٰہی کو وزیر اعلیٰ پنجاب بنا کر آپ نے پہلے ہی بڑی مہر بانی کی ہے، اب قاف لیگ کے کسی رکن کو وزیر بنانے کی طلب نہیں ہے ۔” یہ عجب معاملہ ہے ۔ ساتھ ہی قاف لیگ کے وزارت سے محروم ہونے والوں کو حوصلہ دیتی ایک خبر بھی آئی ہے ، جس میں یہ کہا گیا ہے کہ چودھری پرویز الٰہی نے کہا ہے کہ ”دوسرے فیز” میں قاف لیگیوں کو بھی وزارتیں دی جائیں گی ۔ دیکھتے ہیں یہ ”دوسرا فیز’ ‘ وزارت کے منتظر قاف لیگیوں کیلئے کب طلوع ہوتا ہے ؟اندازے اور قیافے لگائے جا رہے ہیں کہ پنجاب کی سیاست میں کوئی نیا جوار بھاٹا اُٹھنے والا ہے ۔ حقیقت یہ ہے کہ پنجاب کی سیاست سُلگ رہی ہے ۔ ماحول تیزی سے خراب ہو رہا ہے ۔ اس کا اندازہ ہم اس ایک مثال سے بھی لگا سکتے ہیں کہ وزیر اعلیٰ پنجاب ، چودھری پرویز الٰہی، کی کابینہ نے جس روز وزارتوں کا حلف اُٹھانا تھا، نون لیگی گورنر پنجاب ، جناب بلیغ الرحمن، بہانہ بنا کر جنوبی پنجاب کے سیلاب زدگان کی مدد امداد کرنے لاہور سے ہی چلے گئے ۔ یہ انداز اسلئے بھی اختیار کیا گیا ہے کیونکہ جب سابق وزیر اعلیٰ پنجاب ، حمزہ شہباز، اور اُن کی کابینہ کے حلف اُٹھانے کی باری آئی تھی تو پی ٹی آئی کے گورنر پنجاب ، عمر سرفراز چیمہ، کوئی نہ کوئی بہانہ بنا کر حمزہ شہباز اور نون لیگیوں سے حلف نہیں لے رہے تھے ۔ اب ادلے کے بدلے کے مصداق، نئی صورتحال کا وزیر اعلیٰ پنجاب چودھری پرویز الٰہی، پی ٹی آئی اور قاف لیگ کو سامنا کرنا پڑا ہے ۔ یہ اچھی اور قابلِ رشک تصویر نہیں ہے ۔ یوں لگتا ہے کہ وزیر اعلیٰ پنجاب چودھری پرویز الٰہی کی نگرانی میں چلنے والے پنجاب میںیہ سیاسی رنجشیں مزید بڑھیں گی اور سُلگتی ہُوئی صورتحال کسی بھی وقت بھڑک کر شعلہ جوالہ بن سکتی ہے ۔ ایسے میں خبر آئی کہ وزیر اعظم شہباز شریف نے پنجاب کے نون لیگی گورنر ( بلیغ الرحمن) سے کہا ہے کہ وہ نئی پنجاب کابینہ سے حلف لے لیں ۔ یہ فرمان دراصل نون لیگ کی کمزوری کو بھی عیاں کرتا ہے کہ نون لیگ لڑائی میں مزید شدت پیدا کرنے سے گریز اختیار کرتے ہُوئے اس لڑائی کو مزید شدید کرنے سے کترا رہی ہے ۔ شہباز شریف کے اس گریز پا حکم کا ایک ترجمہ یہ بھی کیا گیا ہے کہ شہباز شریف کی مرکز ی اتحادی حکومت پنجاب کی حکومت سے کوئی پھڈا مول لینے کی بجائے ”جیئو اور جینے دو” کے ”سنہری اصول” پر چل کر سرکاری اور اقتداری معاملات کو آگے بڑھانا چاہ رہی ہے ۔ یہ اگرچہ مستحسن اقدام ہے لیکن ساتھ ہی یہ اقدام شہباز شریف کی کمزور شخصیت کی بھی چغلی کھاتا ہے ؛ چنانچہ ہم نے دیکھا ہے کہ نون لیگی گورنر پنجاب، جناب بلیغ الرحمن ، نے 6اگست2022ء بروز ہفتہ وزیر اعلیٰ پنجاب چودھری پرویز الٰہی کی 21رکنی کابینہ سے لاہور کے تاریخی گورنر ہاؤس میں حلف لے لیا۔ اچھی اور مستحسن بات ہے کہ وزیر اعظم شہباز شریف نے کسی تصادم سے بچنے کو ترجیح دی ہے ۔ ملک پہلے ہی سیاسی تصادموں سے اَدھ موا ہو رہا ہے ۔ اس ضمن میں شہباز شریف بجا کہتے ہیں کہ پہلے ملک کو بچانا اور محفوظ کرنا چاہئے ، سیاست تو بعد میں بھی ہوتی رہے گی ۔ وزیر اعظم کا یہ صلح جویانہ بیان قابلِ تعریف ہے لیکن سوال یہ ہے کہ آیا اُن کا حریف دھڑا (پی ٹی آئی ) بھی اس صلح کے پیغام کو قبول کرنے پر تیار ہے َ؟ فی الحال اس کے تو کوئی آثار نظر نہیں آ رہے ۔ پاکستان میں یہ سیاسی سرگرمیاں ایسے ماحول میں ہُوئی ہیں جب 5اگست2022ء کو ملک بھر میں ایک بار پھر ”یومِ استحصالِ کشمیر” پورے جوش و جذبے کے ساتھ منایا گیا ۔ مقبوضہ کشمیر کے کشمیری بھائیوں ، بہنوں اور نوجوانوں کو پاکستان کے 22کروڑ عوام نے یکجہت اور یکمشت ہو کر یہ پیغام دیا ہے کہ ہم سب اُن کی تحریکِ آزادی کے دل و جان سے حامی ہیں ۔ آج جب ہم پاکستان میں 75واں یومِ آزادی کا جشن منانے کی تیاریاں کررہے ہیں ، مقبوضہ فلسطین پر ظالم اور قاہر اسرائیل نے ایک بار پھر نہتے فلسطینیوں پر حملہ کر کے کئی بے گناہ فلسطینیوں کو شہید کر ڈالا ہے ۔ یہ حملہ 6اگست کو کیا گیا ہے ۔ پاکستان اور پاکستانیوں نے اس ظلم کی شدید الفاظ میں مذمت کی ہے ۔ نجانے اللہ تعالیٰ کب کشمیری اور فلسطینی مسلمانوں کو بھارتی اور اسرائیلی قبضے سے نجات عطا فرمائے گا؟؟ ہماری دعا ہے کہ اللہ تعالیٰ جلد ہی وہ یومِ سعید کشمیریوں اور فلسطینیوں پر طلوع فرمائے ۔ آمین ۔

مون سون کی بے پناہ بارشوں نے جہاں زرعی زمینوں اور موسم کو فائدہ پہنچایا ہے ، خشک سالی ختم ہُوئی ہے ، وہیں ان بارشوں نے ملک کے کئی حصوں میں تباہیاں پھیلا دی ہیں ۔ اب تک ان سیلابی تباہ کاریوں کے نتیجے میں ملک بھر میں 200افراد کے جاں بحق ہونے کی خبریں آ چکی ہیں ۔ وفاقی حکومت نے جاں بحق ہونے والوں کے لواحقین کیلئے دس لاکھ روپے اور سیلاب زدگان خاندانوں کے لئے پانچ لاکھ روپے فی خاندان مالی امداد دینے کا اعلان کیا ہے ۔ اللہ کرے وزیر اعظم شہباز شریف اپنے کہے پر جلد از جلد عمل بھی کر دیں ۔ دیکھا گیا ہے کہ ہمارے حکمران عوام سے کئے گئے وعدے جلد بھول بھی جاتے ہیں ، جیسا کہ عمران خان نے وزیر اعظم بن کر عوام سے کئے گئے اپنے سارے وعدے بھلا دئیے ۔ نتیجہ یہ نکلا ہے کہ اب جبکہ برطانوی اخبار ”فنانشل ٹائمز” نے عمران خان بارے ایک تہلکہ خیز رپورٹ شائع کی ہے تو خان صاحب کے سبھی مخالفین نے خوشی اور اطمینان کا اظہار کیا ہے ۔ سچی بات یہ ہے کہ ”فنانشل ٹائمز” کے تحقیق نگار رپورٹر، سائمن کلارک، نے بڑی محنت اور احتیاط کے ساتھ یہ عمران مخالف رپورٹ تیار کی ہے ۔ اس رپورٹ نے خان صاحب اور پی ٹی آئی کی مقبولیت کے قلعے میں شگاف ڈال دیا ہے ۔ نون لیگ اور اتحادی حکومت عمران خان اور پی ٹی آئی کو پریس کانفرنسوں میں چیلنج کررہی ہے کہ اگر برطانوی اخبار کی رپورٹ حقائق پر مبنی نہیں ہے تو عمران خان اور اُن کے حواری ”فنانشل ٹائمز” پر ہتک عزت کا مقدمہ دائر کرکے کروڑوں پونڈز کما سکتے ہیں ۔ ایسی ہمت ابھی تک مگر خان صاحب بوجوہ نہیں دکھا سکے ۔ اس منظر سے ساری دال ہی کالی نظر آ رہی ہے ۔ فارن فنڈنگ کے حوالے سے عمران مخالف یہ رپورٹ ایسے ایام میں سامنے آئی ہے جب چودھری پرویز الٰہی صاحب عدالتی فیصلے کے نتیجے میں وزیر اعلیٰ پنجاب بننے میں کامیاب ہوچکے ہیں اور جب چودھری خاندان میں تقسیم اور پھوٹ پڑ چکی ہے ۔ اس تقسیم کی بڑی وجہ یہ ہے کہ چوہدری شجاعت حسین کا خاندان حکومتی اتحادیوں کی حمایت کر رہا ہے جبکہ چوہدری پرویز الٰہی نے اپنی امیدیں پاکستان تحریک انصاف کے ساتھ وابستہ کر لی ہیں۔پاکستان کی سیاست میں کئی دہائیوں تک اہم کردار ادا کرنے والے گجرات کے چوہدری خاندان میں اختلافات شدت اختیار کر چکے ہیں۔ تجزیہ نگاروں کا خیال ہے کہ چوہدری خاندان میں انتشار کی وجہ سے پاکستان میں اسٹیبلشمنٹ کی ایک اہم حامی جماعت ،مسلم لیگ قاف ،بھی دو حصوں میں تقسیم ہو چکی ہے۔ ان کے بقول لگتا یوں ہے کہ اگلے عام انتخابات میں اسی خاندان کے افراد ہی آمنے سامنے ہوں گے۔چوہدری فیملی کے قریبی ذرائع بتاتے ہیں کہ اس خاندان کے کچھ خیر خواہوں نے سیاسی رقابتوں کے ہاتھوں تباہ ہوتی ہوئی خاندانی وحدت کو بچانے کے لئے بہت کوششیں کیں لیکن وہ کارگر ثابت نہ ہو سکیں۔ ایک سینئر تجزیہ نگار نے بتایا کہ چوہدری خاندان کے اختلافات ان کے لئے بھی بہت دکھ اور تکلیف کا باعث ہیں۔ان کے بقول پرویز الٰہی، چوہدری شجاعت سے کچھ عرصہ پہلے ملنے گئے تھے ،انہوں نے چوہدری شجاعت سے کہا تھا کہ وہ ان کے والد کی طرح ہیں۔ اور چوہدری شجاعت نے بھی چوہدری پرویز الٰہی کے لئے خیرسگالی کے جذبات کا اظہار کیا تھا۔ لیکن حمزہ شہباز کی حمایت میں لکھے جانے والے چوہدری شجاعت کے خط کے بعد اب لگتا ہے کہ حالات پوائینٹ آف نو ریٹرن تک پہنچ گئے ہیں۔ شنید ہے کہ پنجاب اسمبلی میں وزیراعلیٰ کے انتخاب والے دن جب مونس الٰہی، چوہدری شجاعت سے ملنے گئے تو انہیں چوہدری شجاعت نے مشورہ دیا کہ جیسے تم میرے ساتھ احترام سے بات کر رہے ہو،اس طرح اپنے بھائی (درحقیقت کزن) چوہدری سالک سے بھی بات کر لو لیکن اس وقت تک شاید دیر ہو چکی تھی ۔چوہدری خاندان کی باہمی رنجشیں بہت سے لوگوں کے لئے شدید حیرانگی کا باعث ہیں۔ آج سے کچھ عرصہ پہلے تک کسی کے وہم و گمان میں بھی نہیں تھا کہ یہ رنجشیں خاندان کو اس حال تک پہنچا دیں گی۔چوہدری خاندان کی تاریخ پر نگاہ رکھنے والے ماہرین بتاتے ہیں کہ چوہدری ظہور الٰہی سیاست میں زیادہ دلچسپی رکھتے تھے اور وہ اپنی وضعداری، معاملہ فہمی اور مہمان نوازی کے لئے بہت معروف تھے دوسری طرف ان کے بھائی چوہدری منظور الٰہی کی دلچسپی کاروباری امور کی طرف زیادہ تھی۔ طبیعت کے فرق کے باوجود دونوں بھائیوں نے ساری زندگی ایک دوسرے کا خیال رکھا اور کبھی ایک دوسرے کو شکایت کا موقعہ نہیں دیا۔پرویز الٰہی، چوہدری منظور الٰہی کے بیٹے ہیں اور شجاعت حسین کے کزن ہیں۔ پچھلی چار پانچ دہائیوں میں چوہدری شجاعت حسین اور چوہدری پرویز الٰہی نے بھی خاندانی قربت اور وفا شعاری کی اسی روایت کو آگے بڑھایا۔ لیکن جب معاملات بچوں کے ہاتھوں میں آئے تو ان میں بزرگوں جیسی قربت پیدا نہ ہو سکی۔ ایک تجزیہ نگار کے بقول چوہدری شجاعت کے بچے اپنے آپ کو چوہدری ظہور الٰہی کی خاندانی میراث کا حقیقی وارث سمجھتے ہیں اور اس میراث کے تمام ثمرات کو پرویز الٰہی اور مونس الٰہی کی طرف جاتا ہوا دیکھنا انہیں قبول نہیں ہے۔ ان کو مونس الٰہی کے فیصلوں کا چوہدری پرویز الہٰی کے ذریعے باقی تمام خاندان پر نفاذ بھی پسند نہیں۔ اس لئے ان میں بھی ایک طرح کا ردعمل پیدا ہوگیا ہے۔ ”کئی بار خاندان کی عزت بچانے کے لئے چوہدری خاندان کے بڑوں نے اپنے خاندانی اختلافات کی تردید بھی کی لیکن اب ان کے بچے جوان ہو گئے ہیں۔ اور وہ اپنی باتوں پر اصرار کرنے لگ گئے ہیں۔ ان کے سامنے بزرگوں کی ایک نہ چل سکی۔”چوہدری خاندان میں بہت قریبی رشہ داری ہے، چوہدری پرویز الٰہی کی بہن چوہدری شجاعت کی اہلیہ ہیں اور چوہدری شجاعت حسین کی ہمشیرہ چوہدری پرویز الٰہی کی اہلیہ ہیں۔ حالیہ اختلافات کی شدت نے اس خاندان کو بہت دکھ دیا ہے۔ کچھ فیملی ممبرز میں بول چال بھی نہیں ہے۔ وہ وضعداری جو چوہدری فیملی کے بزرگ دشمنوں کے ساتھ بھی نبھاتے تھے، اب وہ ان کے اپنے خاندان میں بھی باقی نہیں رہی۔ چوہدری پرویز الٰہی کے حامی اور چوہدری شجاعت کے بھائی چوہدری وجاہت حسین نے چوہدری شجاعت کے بیٹے چوہدری سالک پر الزام لگایا ہے کہ وہ زرداری سے ڈالر مانگ رہے ہیں۔ رہی سہی کسر چوہدری شجاعت حسین کے گھر کے باہر ہونے والے قاف لیگ کے احتجاجی مظاہروں میں لگنے والے نعروں اور چوہدری شجاعت کے خلاف انٹرنیٹ پر چلوائی جانے والی پوسٹوں نے پوری کر دی ہے۔ایک واقفِ حال بتاتے ہیں کہ چوہدریوں کے خاندان میں حالات کافی عرصے سے خراب تھے لیکن وہ اتنی شدت سے منظر عام پر نہیں آئے تھے۔ ان کے بقول سابق وزیراعظم عمران خان کے خلاف تحریک عدم اعتماد کے موقعے پر اس خاندان میں تقسیم بہت واضح ہوگئی۔ ان کے بقول چوہدریوں کا گھر پاکستان کی سیاست کا مرکز بنا ہوا تھا۔ سارے بڑے لیڈر یہاں آکر چوہدریوں کی حمایت کے متمنی تھے۔ شہباز شریف بھی چودہ سالوں بعد چل کر ان کے گھر گئے۔ پی ڈی ایم نے چوہدری پرویز الٰہی کو پنجاب میں چیف منسٹر بنانے کا اعلان بھی کر دیا پھر طاقتور حلقوں کو خیال آیا کہ پرویز الٰہی ادھر چلے گئے تو عمران خان اکیلے رہ جائیں گے اور طاقت کا توازن درست نہیں رہے گا سو ایک بہت اہم شخصیت کی ٹیلی فون کال آئی اور پرویز الٰہی جنہوں نے چند ہی دن پہلے ایک انٹرویو میں عمران خان کے خلاف توہین آمیز خیالات کا اظہار کیا تھا وہ عمران خان کے پاس چلے گئے۔ شجاعت فیملی نے اپنے عہد کا پاس کیا، یوں دونوں کی راہیں جدا ہو گئیں۔”قدرت نے چوہدریوں کی سیاست کو بڑی کامیابیوں سے نوازا تھا۔ پاکستان کی وزارت عظمی، پنجاب کی وزارت اعلیٰ اور کئی وفاقی و صوبائی وزارتیں اس گھر کے حصے میں آئیں۔ کئی ترقیاتی منصوبے چوہدریوں نے مکمل کروائے۔ پاکستان میں چوہدریوں کی سیاست وضعداری، معاملہ فہمی، رواداری اور مہمان نوازی کے رنگ بھی لئے ہوئے تھی۔ ایک تجزیہ نگار کے بقول: زیڈ اے بھٹو مخالف نو ستاروں کی تحریک کے دوران سارے پیسے ،سارے دسترخوان اور سارے انتظامات چوہدری ظہور الٰہی کے ذمے تھے۔ انہوں نے کبھی اس کا ذکر بھی کسی سے نہیں کیا۔یہ بھی یاد رکھنا چاہیئے پچھلی کچھ دہائیوں میں چوہدریوں نے اپنی سیاست کو اسٹیبلشمنٹ کے ایجنڈے کو آگے بڑھانے کے لئے استعمال کیا۔ پرویز الٰہی نے کہا تھا کہ وہ جنرل مشرف کو دس مرتبہ بھی وردی میں صدر بنوانے کو تیار ہیں۔ چوہدری مونس الٰہی زندگی میں کامیابی حاصل کرنے اور سیاست میں آگے جانے کے لئے بہت زیادہ پرجوش ہیں جبکہ چوہدری سالک کا مزاج دھیما اور وضعدارانہ سا ہے۔ یہ دونوں اپنے اپنے مفادات کے تحفظ کے لئے سرگرداں ہیں۔ لیکن ان کے الفاظ میں اب ان کی سیاست کا آخری دور ہے۔ عمران خان اور پی ٹی آئی کے تعاون سے پرویز الٰہی پنجاب کے وزیراعلیٰ تو بن گئے ہیں لیکن انہیں پی ٹی آئی کا مزاج قبول نہیں کررہا۔ گجرات پانی میں ڈوبا ہوا ہے۔ وہاں لوگوں کو کوئی پوچھنے والا نہیں۔ اب وہاں بھی قاف لیگ پی ٹی آئی کی مدد کے بغیر الیکشن نہیں جیت سکے گی۔تجزیہ نگاروں کا کہنا ہے کہ جماعتیں خاندان کی بنیاد پر بننی چاہیئں نہ چلنی چاہیئں۔ سیاسی جماعتوں کو پروفیشنل اور سیاسی انداز میں ہی کام کرنا چاہئیے۔ کچھ تجزیہ نگاروں کا خیال ہے کہ چوہدری خاندان کے بعد اب اگلی باری شریف خاندان کی ہو سکتی ہے جہاں مریم نواز اور حمزہ شہباز کے اختلافات میڈیا کی خبروں کا حصہ بنتے رہے ہیں۔پاکستان کا اہم میڈیا بھی گجرات کے چودھریوں کی خاندانی و سیاسی تقسیم پر اظہارِ خیال کررہا ہے ۔ مثال کے طور پرجولائی 2022ء کے تیسرے ہفتے گجرات میں چودھریوں کی سیاست بارے ایک انگریزی معاصر نے یوں اظہارِ خیال کیا: ”چونکہ گزشتہ ایک دہائی سے گجرات میں پارٹی امور پر پرویز الٰہی کیمپ کا راج ہے، اس لیے پارٹی کے مقامی عہدیداروں میں سے کسی نے بھی مسلم لیگ (ق) کے سربراہ چودھری شجاعت حسین کے مسلم لیگ نون کے حمزہ شہباز کی امیدواری کی حمایت کرنے والے خط کے حق میں بات نہیں کی۔تاہم چودھری شجاعت اور ان کے حواریوں کو گجرات میں اپنے خاندان کے روایتی حریفوں کے کیمپوں سے کچھ نئے اتحادی مل سکتے ہیں کیونکہ گجرات کے نوابزادہ، کائرہ اور پگانوالا خاندانوں سے تعلق رکھنے والے مسلم لیگ نون اور پیپلز پارٹی کے کچھ رہنماؤں نے حمزہ شہباز کے لیے شجاعت حسین کی حمایت کی تعریف کی ہے۔دوسری جانب پی ٹی آئی اور مسلم لیگ (ق) کے کارکنوں نے پارٹی سربراہ اور ڈپٹی اسپیکر کی جانب سے مسلم لیگ (ق) کے ووٹ منسوخ کرنے کے فیصلے کے خلاف مظاہرے کیے۔مسلم لیگ (ق) کے کچھ کارکنوں نے گجرات کے چوہدریوں کی رہائش گاہ ظہور الہٰی ہاؤس کے سامنے احتجاج بھی کیا اور پارٹی سربراہ اور وفاقی کابینہ کے رکن ان کے بیٹے سالک حسین کے خلاف نعرے بازی کی۔اگرچہ چوہدری شجاعت حسین نے 2008 میں پی پی پی کے چوہدری احمد مختار (مرحوم) کے ہاتھوں شکست کھانے کے بعد اپنے آبائی حلقے گجرات سٹی این اے 69 سے کوئی الیکشن نہیں لڑا، تاہم ان کے بڑے بیٹے شافع حسین اگلے عام انتخابات میں اس شہر سے الیکشن لڑنے کے لیے لابنگ کر رہے ہیں۔البتہ سالک حسین چکوال کی ایک قومی اسمبلی کی نشست سے اس وقت ضمنی انتخاب جیت گئے تھے جب پرویز الہٰی نے گجرات اور چکوال اضلاع سے جیتی ہوئی قومی اسمبلی کی دونوں نشستیں چھوڑ دی تھیں، تاکہ وہ (کنجاہ) گجرات سے اپنی پنجاب اسمبلی کی نشست برقرار رکھیں۔پرویز الہٰی نے گزشتہ دو انتخابات این اے 69 سے لڑے تھے جو اب ان کے بیٹے مونس الہٰی کے پاس ہے۔بنیادی طور پر این اے 69 وہ حلقہ ہے جہاں مرحوم چوہدری ظہور الہٰی اور پھر ان کے بیٹے چوہدری شجاعت حسین نے 1970 سے الیکشن لڑا تھا اور اب پرویز الہٰی اور مونس الہٰی یہاں خاندانی سیاست کی قیادت کر رہے ہیں۔دلچسپ بات یہ ہے کہ سابق وفاقی وزیر چوہدری احمد مختار اور چوہدری احمد سعید گجرات کے پگانوالا خاندان اور سروس گروپ 2013 تک اس حلقے میں چوہدریوں کے اہم سیاسی حریف رہے تھے۔تاہم ظہور الہٰی کو شکست دینے والے سابق ایم این اے میاں مشتاق حسین پگانوالا کی موت اور پھر احمد مختار اور احمد سعید کے انتقال نے چوہدریوں کے حریف کیمپوں کو کمزور کر دیا تھا۔تجزیہ کاروں کا کہنا ہے کہ سالک حسین اور شافع حسین کے آبائی شہر سے انتخابی سیاست کرنے کی صورت میں شجاعت کیمپ کو گجرات میں پرانے دشمنوں کی حمایت حاصل ہو سکتی ہے جبکہ پرویز کیمپ کو پہلے ہی مسلم لیگ (ق) اور تحریک انصاف کی بیشتر شخصیات کی حمایت حاصل ہے۔کچھ لوگ گجرات کے آئندہ انتخابات میں کزن بمقابلہ کزن مقابلے کے قوی امکانات دیکھ رہے ہیں۔وزیراعظم کے مشیر قمر زمان کائرہ، پیپلز پارٹی کی سابق ایم این اے ثمینہ پگانوالا اور مسلم لیگ (ن) کے ضلعی صدر طاہر الملک، گجرات میونسپل کارپوریشن کے سابق میئر حاجی ناصر محمود اور سابق ایم پی اے سٹی سے مسلم لیگ (ن) کے حاجی عمران ظفر نے مسلم لیگ (ق) کے سربراہ کے فیصلے کا خیر مقدم کرتے ہوئے اسے ملک کو بحران سے بچانے کے لیے ایک دانشمندانہ قدم قرار دیا ہے۔دیکھنے والی بات یہ ہے کہ چودھری شجاعت حسین کے خاندانی و سیاسی حریف، چودھری پرویز الٰہی کے عدالت کی طاقت سے وزیر اعلیٰ بننے کے بعد گجرات میں چودھریوں کی سیاست کیا رُخ اختیار کرتی ہے ؟ بظاہر تو اِس وقت تک سارے سیاسی حالات چودھری پرویز الٰہی اور اُن کے پُر جوش صاحبزادے چودھری مونس الٰہی کے حق اور موافقت میں ہیں ۔

تقریباً پونے چار ماہ قبل وفاق میں ، عمران خان کی حکومت کے خاتمے کے بعد، پنجاب میں بھی حکومت بدل گئی ۔ پی ڈی ایم کی طاقت اور اسٹریٹجی سے پنجاب میں پی ٹی آئی کے وزیر اعلیٰ، عثمان بزدار، منصب سے ہٹا دئیے گئے اور اُن کی جگہ نون لیگ کے نوجوان سیاستدان اور وزیر اعظم جناب شہباز شریف کے صاحبزادے، جناب حمزہ شہباز، وزیر اعلیٰ منتخب ہو گئے ۔ پی ٹی آئی نے مگر اس انتخاب اور تبدیلی کو دل سے قبول نہ کیا۔ جناب عمران خان کی زبردست قیادت میں پی ٹی آئی نے اکیلے ہی مرکز اور پنجاب کی اتحادی حکومتوں پر زور دار دباؤ ڈالے رکھا۔ عمران خان نے دونوں باپ بیٹا، شہباز شریف و حمزہ شہباز، پر یکساں اور مستقل دباؤ رکھا۔ پنجاب بھر میں دونوں کے خلاف زور دار جلسے جلوس کئے ۔ ان جلسوں میں عمران خان نے عدلیہ، اسٹیبلشمنٹ ، الیکشن کمیشن اور شہباز و حمزہ حکومتوں کے خلاف جو زبان استعمال کی، اسے پاکستان کے کروڑوں عوام نے سنا اور حیران ہی رہ گئے ۔ مبینہ طور پر یہ عمران خان کے دباؤ ہی کا نتیجہ تھا کہ پی ٹی آئی کی ایک عدالتی درخواست کے فیصلے میں سپریم کورٹ نے پنجاب کے اُن25ارکانِ صوبائی اسمبلی کو ڈی سیٹ کر دیا جنہوں نے عمران خان کے اُمیدوار کے خلاف ووٹ دے کر عثمان بزدار کو اقتدار سے محروم کر دیا تھا۔ اس فیصلے کے نتیجے میں پنجاب کے 20حلقوں میں صوبائی ضمنی انتخابات ہُوئے اور نون لیگ نہائت بری طرح اکثریتی سیٹوں سے ہار گئی ۔ پی ٹی آئی نے 20میں سے15سیٹیں جیت لیں۔ اس فتح نے نون لیگی اور پی ڈی ایم قیادت پر سناٹا طاری کر دیا۔ پی ٹی آئی کی اس فتح سے لا محالہ عمران خان کے حوصلے مزید بلند ہُوئے ۔ الیکشن کمیشن کے خلاف اُن کی زبان مزید سخت ہوتی دیکھی گئی ۔ یہ زبان اتنی سخت کیوں استعمال کی جارہی ہے، اس کی وجوہ سے اہلِ علم پوری طرح آگاہ ہیں ۔ واقفانِ حال کا کہنا ہے کہ ضمنی انتخابات میں نون لیگ اور پی ڈی ایم کی شکست کا مطلب یہ ہے کہ نون لیگ نے مرکز اور پنجاب میں اقتدار سنبھالا تو تھا لیکن کمر شکن مہنگائی میں کمی کرنے کی بجائے مزید اضافہ کر دیا۔ نون لیگی وزیر خزانہ، مفتاح اسماعیل، ہر روز نئی مہنگائی کے بم گرا رہے ہیں ۔ اور جینا ایک عذاب بن کر رہ گیا ہے ۔ اس کی ساری ذمہ داری خاص طور پر نون لیگ اور اس کی قیادت پر ڈالی گئی ؛ چنانچہ غصے سے بھری عوام نے اس کا بدلہ لیا اور ضمنی انتخابات میں نون لیگی اُمیدواروں کو شرمناک شکست سے دو چار کر دیا۔ اس شکست سے لندن میں بیٹھے نون لیگی قائد، نواز شریف، بھی بلبلا اُٹھے ۔ نواز شریف کو اب یہ خیال سونے نہیں دیتا کہ اگر آج مرکزی حکومت کے عام انتخابات ہو جائیں تو ممکن ہے نون لیگ کا وہی حشر ہو جو ابھی چند ہفتے قبل پنجاب کے ضمنی انتخابات میں ہُوا ہے ۔ نواز شریف، شہباز شریف، آصف علی زرداری اور مولانا فضل الرحمن کی پریشانیوں میں 23جولائی2022ء کو اُس وقت اضافہ ہُوا جب حمزہ شہباز شریف کو ایک عدالتی فیصلے نے دو تین دن کے لئے ”ٹرسٹی وزیر اعلیٰ” بننے پر مجبور کیا ۔عدالت نے یہ حکم بھی سنایا کہ حمزہ شہباز خود کو ابھی منتخب وزیر اعلیٰ بھی نہیں کہلا سکتے۔ حیرانی کی بات ہے حمزہ شہباز نے یہ لقب،فیصلہ اور عہدہ من و عن قبول بھی کر لیا ۔ حمزہ شہباز شریف عدالتی فیصلے کے مطابق آج بتاریخ 25جولائی2022ء بروز پیر تک ”ٹرسٹی وزیر اعلیٰ” ہیں ۔ وہ مگر کوئی اپنی پسند کی تعیناتی بھی نہیں کر سکتے کہ یہی عدالت کا حکم ہے ۔ نون لیگ کو شکستوں کا یہ منہ بار بار اسلئے دیکھنا پڑ رہا کہ مبینہ طور پر وہ اپنی فطری بزدلی کا مظاہرہ کررہی ہے ۔ شہبازشریف ایک کمزور اور نا مقبول وزیر اعظم ثابت ہو رہے ہیں ۔ جن لوگوں نے اُنہیں وزیر اعظم نہ بننے کا مشورہ دیا تھا، ٹھیک ہی دیا تھا۔ اور عمران خان کی آواز اور للکار نون لیگ سمیت پی ڈی ایم کی درجن بھر جماعتوں کے دل دہلا رہی ہے ۔ عمران خان کا اداروں پر دباؤ اتنا بڑھا ہے کہ وزیر اعظم پنجاب کے آئی جی کو بھی منصب سے علیحدہ کرنے پر مجبور ہو گئے ۔ اب عمران خان الیکشن کمیشن اور اس کے سربراہ کے خلاف دن رات آواز بلند کررہے ہیں اور الیکشن کمیشن میں اتنی ہمت بھی نہیں کہ وہ فارن فنڈنگ کیس میں عمران خان بارے کوئی فیصلہ سنا سکے ۔ حالانکہ نون لیگ سمیت پی ڈی ایم میں شامل ساری جماعتوں نے گزشتہ روز اپنے مشترکہ اعلامئے میں اس کا مطالبہ بھی کیا ہے ۔ ایسے ایام میں آج پاکستان کی عدالتِ عظمیٰ ٹرسٹی وزیر اعلیٰ پنجاب ، حمزہ شہباز شریف، بارے فیصلہ سنانے جا رہی ہے ۔ نون لیگی اقتدار پر کئی تلواریں بیک وقت لٹک رہی ہیں جنہوں نے نون لیگ کے مستقبل پر تاریک سائے ڈال دئیے ہیں۔ با خبر تجزیہ نگاروں کا کہنا ہے کہ اقتدار کی ہوس نے نون لیگ کو کمزور سے کمزور تر کر دیا ہے ۔اس کمزوری کا ایک منظر اُس وقت بھی پاکستانی عوام نے اپنی آنکھوں سے دیکھا جب نون لیگی وفاقی وزیر احسن اقبال کو پچھلے دنوں برسرِ مجلس بھیرہ میں پی ٹی آئی کی ایک نوجوان جارح فیملی نے سب کے سامنے بے عزت کیا اور وفاقی وزیر اور نون لیگی قیادت منہ سے ایک لفظ ادا نہ کر سکی ۔ مناب معلوم ہوتا ہے کہ اس واقعہ کا ذکر بھی بالتفصیل یہاں کیا جائے تاکہ نون لیگی سینئر قیادت کی ذہنی کیفیت سامنے آ سکے : یہ افسوسناک واقعہ 9 جولائی2022ء کو اُس وقت پیش آیا جب وفاقی وزیر منصوبہ بندی، پروفیسر احسن اقبال،لاہور اسلام آباد موٹر وے پر سفر کرتے ہوئے کچھ دیر کیلئے بھیرہ اسٹاپ کے ایک ریسٹورنٹ پر رُکے تھے۔ ریسٹورنٹ میں پہلے سے موجود ایک سیاسی جماعت کے نوجوان لڑکیوں اور لڑکوں نے احسن اقبال کو دیکھتے ہی اُن کے خلاف ”چو رچور” کے نعرے بلند کرنا شروع کر دئیے ۔ احسن اقبال شرافت اور صبر کی تصویر بنے بیہودہ نعرہ زنوں کے سامنے کھڑے رہے ۔ کوئی شدید ردِ عمل دیا نہ مشتعل ہُوئے ۔ وائرل ہونے والی ویڈیو میں صاف طور پر دیکھا جا سکتا ہے کہ وفاقی وزیر احسن اقبال صاحب تحمل اور شریفانہ لہجے میں دل آزار اور بد اخلاق نعرے لگانے والوں کو سمجھانے کی کوشش کررہے ہیں مگر وہ باز نہیں آ رہے ۔کئی نجی ٹی ویوںنے اُسی شام اِس دلخراش منظر کو بطورِ خصوصی خبر کئی منٹ تک اپنی اپنی اسکرینوں پر چلایا ۔ ساتھ جو کمنٹس دئیے گئے، وہ اِس کے سوا تھے ۔ کئی نجی ٹی ویوں نے اِس واقعہ پر ٹاک شوز بھی کئے ہیں کہ ٹی وی والوں کو کوئی نہ کوئی تماشہ چاہئے ۔اِس دل آزار منظر پر تبصرہ کرنے کیلئے ایک نجی ٹی وی نے پنجاب کے سابق صوبائی وزیر، فیاض الحسن چوہان،کو دعوتِ خطاب دی تو موصوف نے فرمایا:” یہ تو کچھ بھی نہیں ۔ ابھی ایسے مناظر اور بھی سامنے آئیں گے ”۔ ساتھ ہی سابق وفاقی وزیر، فواد چودھری، نے احسن اقبال مخالف مذکورہ واقعہ بارے ٹویٹ کرتے ہُوئے کہا:” پی ڈی ایم کے یہ وزرا برقع پہن کر باہر نکلا کریں گے ”۔ آنجناب نے مزید فرمایا:” یہ مخالفانہ نعرے نہیں ہیں ۔ یہ عوامی شعور بڑھ جانے کا مظہر ہے ۔”یہ عوامی شعور بڑھنے کی نشانی نہیں بلکہ یہ عدم برداشت کی مثال ہے ۔اور اگر کسی روز ”اِسی بڑھے ہُوئے عوامی شعور” نے پی ٹی آئی کی سینئر قیادت کو بھاری بھر کم سرکاری سیکورٹی حصار سے باہر گھیر لیا اور برسر عام اِسی نوعیت کے نعرے لگا دئیے تو پھر اِس جماعت کا ردِ عمل کیا ہوگا؟ نون لیگی وفاقی وزیر نے تو صبر اور تحمل کا مظاہرہ کیا ہے ، خانصاحب شائد ایسے تحمل اور بردباری کا رویہ اختیار نہ کر سکیں گے ۔ پروفیسر احسن اقبال کے خلاف ہونے والے اس واقعہ کے خلاف سوشل میڈیا پر سخت ردِ عمل آیا ہے ۔حقیقت یہ ہے کہ احسن اقبال صاحب نے اس بد تمیزی کے خلاف حسبِ معمول شرافت، شائستگی اور صبر سے کام لیا ہے ۔ ایک سیاسی جماعت کے بھڑکانے پر نفرت کے مارے جب ایک شخص نے نارووال میں احسن اقبال پر ( جبکہ وہ طاقتور وفاقی وزیر داخلہ بھی تھے) قاتلانہ حملہ کیا تھا، تب بھی احسن اقبال نے مجرم کے خلاف زبان سے کوئی سخت لفظ ادا نہیں کیا تھا۔ وہ شدید زخمی ہو کر کئی دنوں تک ہسپتال میں زیر علاج رہے لیکن یہ مہلک حرکت کا ارتکاب کرنے والے کے خلاف کوئی زبان درازی کی نہ کوئی دشنام کیا۔ بس قانون کا راستہ اختیار کیا۔ قاتلانہ حملہ کرنے والا گرفتار ہُوا ۔ نجانے وہ رہا ہو چکا ہے یا اب بھی پسِ دیوارِ زنداں ہے ؟ لیکن احسن اقبال صاحب نے یہ سنگین اقدام کرنے والے کے بارے میں بھی عفوو درگزر سے کام لیا۔ لاہور کے ایک دینی مدرسے میں جب نواز شریف پر ایک بیہودہ شخص نے جوتا پھینکا ، تب بھی نواز شریف نے ملزم کو معاف کر دینے والا رویہ اختیار کیا۔ سیالکوٹ میں نون لیگی رہنما، جناب خواجہ آصف ، کے چہرے پر ایک شخص نے بد اخلاقی کا مطاہرہ کرتے ہُوئے سیاہی پھینکی، تب بھی خواجہ صاحب نے مجرمانہ ذہنیت رکھنے والے اُس شخص کو معاف کر دیا تھا۔ نون لیگی رہنماؤں کے اس معاف کر دینے والے مستحسن روئیے سے مخالفین اور معاندین کے حوصلے بڑھے ہیں ۔ اس کا تازہ نتیجہ احسن اقبال کے خلاف روئیے کی شکل میں سامنے آیا ہے ۔ساری نون لیگی قیادت بحثیتِ مجموعی اپنی اکلوتی مخالف جماعت کے بارے میں شائستہ رویہ اپنائے ہُوئے ہے ۔ اس روئیے نے مذکورہ جماعت کے وابستگان کو مزید شہ دی ہے ۔ جلسے جلوسوں اور اپنے انٹرویوز میں خان صاحب نون لیگ، پیپلز پارٹی اور جے یو آئی ایف کی سینئر قیادت کے بارے میں دانستہ جو قابلِ گرفت لہجہ اختیار کئے ہُوئے ہیں،یہ درجہ بدرجہ اُن کے پیروکاروں تک سرائت کرتا جارہا ہے ۔ اِس نے معاشرے میں ایک کھلی تقسیم اور نفرت کے جذبات کو جنم دیا ہے ۔ خان صاحب مگر اپنی ڈگر اور ضِد پر قائم ہیں ۔ وہ مخالفین اور موجودہ حکومت کو”مَیں نہ مانوں ” کی روش پر ڈٹے ہُوئے ہیں ۔ اور جب کسی مخالف کی طرف سے اُنہیں اُنہی کے لہجے میں جواب آتا ہے تو خان صاحب اور اُن کے فالوورز واویلا کرنا شروع کر دیتے ہیں ۔ مثال کے طور پر : اگلے روز پنجاب میں نوجوان نون لیگی رہنما ، قانون دان اور صوبائی وزیر داخلہ، عطاء اللہ تارڑ، نے جناب عمران خان کو پریس کانفرنس میں کھری کھری سنا ڈالیں تو اِس کی حدت اور شدت بنی گالہ کے درو دیوار کے پار تک پہنچی تھی ۔ اب بھی احسن اقبال کے خلاف مذکورہ بیہودگی بارے ردِ عمل دیتے ہُوئے تارڑ صاحب نے کہا ہے :” نوٹ کر لیا ہے ۔ جواب ضرور دیا جائیگا۔” اِسے آپ انتقام بھی کہہ سکتے ہیں اور غصے میں دیا گیا ردِ عمل بھی ۔ اگرچہ عفو و درگزر ہی قوموں کی بقا کا ضامن ہوتا ہے اور انتقام و بدلہ بازی قوموں کو تباہ کر ڈالتا ہے ۔ احسن اقبال نے بھی بدتمیزی کرنے والی فیملی کو معاف کر دیا ہے۔ مسئلہ مگر یہ ہے کہ ہمارے ہاں اکثر اوقات معاف کر دینے والوں کو بزدلی کا طعنہ دیا جاتا ہے۔ اور جنہیں معاف کیا جاتا ہے ، وہ خیال کر بیٹھتے ہیں کہ معافی لینا ہمارا استحقاق ہے ۔ مجھے ذاتی حیثیت میں معلوم ہے کہ بھیرہ اسٹاپ پر احسن اقبال کے خلاف روا رکھے گئے بیہودہ اور دل آزار سلوک کے نتیجے میں احسن اقبال کے انتخابی حلقے (نارووال) میں ووٹروں کے اندر سخت غصہ پایا جاتا ہے ۔ احسن اقبال نارووال سے مسلسل پانچ بار مخالفین کے مقابل بھاری اکثریت سے انتخابات جیت چکے ہیں ۔ یوں ہم اندازہ لگا سکتے ہیں کہ حلقے میں اُن کی عوامی پذیرائی اور محبوبیت کا کیا عالم ہوگا۔ اس کے باوصف مگر احسن اقبال صاحب نے اپنے ووٹروں اور سپورٹروں کو پی ٹی آئی اور اس کی قیادت کے خلاف کوئی بھی قابلِ اعتراض لفظ ادا کرنے کی اجازت نہیں دی ہے ۔ احسن اقبال نے مذکورہ بد سلوکی کے بعد فورہ طور پر جو ٹویٹ کی ہے، اُس میں بھی کسی انتقام اور بدلے کی بُو محسوس نہیں ہوتی ۔ بعد ازاں اُنہوں نے جو پریس کانفرنس کی، اس میں بھی ہلڑ بازی اور بد تمیزی کرنے والوں کے بارے میں افسوس کا اظہار تو یقیناً کیا مگر خان صاحب سے بدلہ لینے کی بات نہیں کی ۔ اِس مستحسن روئیے کی تعریف کی جانی چاہئے ۔ کاش، یہ رویہ پی ٹی آئی میں بھی بدرجہ اتم پایا جاتا۔

پنجاب کے ضمنی انتخابات کی کمپین کے دوران وزیر اعلیٰ پنجاب حمزہ شہباز نے اپنے ووٹروں کی ہمدردیاں حاصل کرنے کیلئے بجلی کے100 یونٹ استعمال کرنے والوں کے بل خود پنجاب حکومت کی طرف سے ادا کرنے کا اعلان کیا تھا۔ مگر عمران خان کے دباؤ پر وزیر اعلیٰ حمزہ شہباز کو یہ فیصلہ واپس لینا پڑا۔یہ الیکشن کمیشن کا مطالبہ بھی تھا۔ اس کے بعد وزیر اعظم جناب محمد شہباز شریف نے پٹرول اور ڈیزل کی قیمتیں کم کر دی ہیں ۔ پٹرول کی قیمت میں اٹھارہ روپے فی لٹر اور ڈیزل کی قیمت میں چالیس روپے فی لٹر کمی کر دی ۔اس فیصلے کی عوامی سطح پر بہت پذیرائی کی گئی ہے ۔ عوام نے کچھ مالی ریلیف بھی محسوس کیا ہے۔ لیکن پی ٹی آئی نے یہ کہہ کر اس فیصلے کی مخالفت کی ہے کہ تیل کی مصنوعات میں یہ کمی دراصل ضمنی انتخابات میں دھاندلی کے مترادف ہے ۔ پی ٹی آئی ویسے بھی ضمنی انتخابی کمپین کے دوران مسلسل یہ الزامات عائد کرتی رہی کہ حکومت ان انتخابات میں دھاندلی کرے گی۔ عمران خان صاحب بھی اپنے ہر جلسے میں مرکزی حکومت اور الیکشن کمیشن پر جانبداری کی تہمتیں عائد کرتے رہے ۔ اس روش کو پسند نہیں کیا گیا ہے ۔خاص طور پر اس پیش منظر میں جب الیکشن کمیشن اور اس کے سربراہ کی طرف سے صاف و شفاف ضمنی انتخابات کرانے کا مصمم عزم ظاہر کیا جاتا رہا ۔ پی ٹی آئی مگر مَیں نہ مانوں کی تصویر بنی رہی۔ بہرحال گذشتہ روز 17 جولائی2022ء کو پنجاب میں ضمنی انتخابات کیلئے 20 نشستوں کی بازی لگی۔ یہ سر دھڑ کی بازی تھی لیکن بعض کے نزدیک یہ دولتمندوں کا من پسند تماشہ اور شغل تھا۔ کوئی غریب پاکستانی ، جس کیلئے دال روٹی کمانا مشکل ہو رہا ہے، بھلا الیکشن کے بھاری اخراجات کیسے اور کیونکر اٹھا سکتا ہے ؟واضح رہنا چاہئے کہ ان ضمنی انتخابات کا نتیجہ محض پاکستان تحریک انصاف (پی ٹی آئی) کی مقبولیت یا پنجاب میں پاکستان مسلم لیگ (ن) کی حمایت پر مہنگائی کے اثرات کے حوالے سے ایک ریفرنڈم نہیں ہوگا بلکہ یہ لاہور اور اسلام آباد میں مستقبل کی سیاست کا بھی تعین کرے گا۔جس لمحے یہ کالم رقم کیا جارہا ہے، اتوار کے روز پنجاب کے چودہ اضلاع میں ضمنی انتخابات کے انعقاد کیلئے نون لیگ اور پی ٹی آئی کے کرتا دھرتا پاگل ہو رہے ہیں۔ ہر کوئی ایک دوسرے پر سبقت لے جانے اور فتح پانے کی کوشش اور جنون میں مبتلا ہے ۔18جولائی کوجب یہ کالم شائع ہوگا، نتیجے کی شکل میں متحارب پارٹیوں میں سے کسی ایک قرار آ چکا ہوگا۔اس صورتحال میں ایک چیز ہے جو سیاسی تقسیم، معاشی بحران اور عمران خان کے تند و تیز بیانات سے زیادہ نقصاندہ ہے۔ یہ چیز وہ غیر فطری اتحاد ہے جو سیاسی جماعتوں بالخصوص مسلم لیگ (ن) کو مجبوراً قبول کرنا پڑا ہے۔ رزلٹ آنے سے پہلے ان حلقوں کی اندرونی صورتحال کا جائزہ لینا ضروری ہے۔ ضمنی انتخابات کے اکثر حلقوں میں مسلم لیگ (ن) کا امیدوار اس کا روایتی حریف ہے، یہی وجہ ہے کے مسلم لیگ (ن) مہنگائی کے علاوہ دیگر وجوہات کی وجہ سے بھی مشکل کا شکار ہے۔ایک جانب جہاں عمران خان نے جارحانہ انداز اختیار کیا ہوا ہے وہیں دوسری جانب مسلم لیگ (ن) اقتدار کے مزے اڑا رہی ہے۔ صحافیوں اور مقامی افراد کا بتانا ہے کہ ضمنی انتخاب والے حلقوں میں لوڈشیڈنگ کم ہورہی ہے، یوٹیلیٹی اسٹورز کی اشیا فروخت کرتے ٹرک بھی علاقے میں موجود پائے گئے اور وہاں ترقیاتی کام بھی ہورہے ہیں۔ اس کے علاوہ اگر کوئی کام ہورہا ہے تو شاید وہی ہے جس کا الزام پی ٹی آئی نامعلوم افراد پر لگا رہی ہے۔اتوار کے دن تک پی ٹی آئی کی لہر چل رہی ہے، اگرچہ اس نے ان انتخابات کے لیے الیکٹیبلز کو چنا ہے تاہم ان میں کچھ نظریاتی لوگ بھی ہیں۔ پی ٹی آئی جلسے تو بڑے کرتی رہی ہے لیکن اس حوالے سے خدشات برقرار ہیں کہ آیا یہ ووٹروں کو پولنگ اسٹیشنوں تک لاسکتی ہے یا نہیں، خاص طور پر جب دوسری طرف سے اس کام کو مشکل بنانے کی تیاری کی جارہی ہو۔ہم یہاں ان نشستوں میں سے کچھ کا ذکر کرتے ہیں جن پر 17 جولائی کو ضمنی انتخابات ہُوئے۔ لاہور میں 4 حلقوں میں انتخاب ہورہا ہے اور اگر مبصرین کی رائے پر یقین کیا جائے تو ایک نشست پر مسلم لیگ (ن) کے اسد کھوکر باآسانی جیت سکتے ہیں البتہ دیگر 3 نشستوں پر سخت مقابلے کی امید ہے۔اس وقت سب سے دلچسپ نشست پی پی 158 ہے۔ یہ عمران خان کے پرانے ساتھی علیم خان کی نشست تھی۔ کہا جارہا ہے کہ علیم خان اس سیٹ پر اپنے بھروسے کے فرد شعیب صدیقی کے لیے ٹکٹ کے خواہاں تھے لیکن مسلم لیگ (ن) نے ان پر اپنی جماعت کے فرد رانا احسن شرافت کو ترجیح دی جنہیں 2018ء کے انتخابات میں یہاں سے شکست ہوئی تھی۔ علیم خان کو مسلم لیگ (ن) کے امیدوار کے لیے مہم چلاتے نہیں دیکھا گیا اور کچھ ایسی افواہیں بھی ہیں کہ وہ امیدوار کے انتخاب سے ناراض ہیں۔پی ٹی آئی نے اس حلقے کے لیے میاں محمود الرشید کے داماد اکرم عثمان کو ٹکٹ دیا ہے۔جن صحافیوں نے اس حلقے کا دورہ کیا ہے ، ان کے مطابق مہنگائی کے باعث حلقے میں پی ٹی آئی کی مقبولیت میں اضافہ ہوا ہے۔ یہی وجہ ہے کہ کابینہ سے ایاز صادق کے استعفے کو مسلم لیگ (ن) کی گھبراہٹ سے تعبیر کیا جارہا ہے۔ یہ سمجھا جارہا ہے کہ مسلم لیگ (ن) اس علاقے میں مہم چلانے کے لیے اپنے سینیئر رہنماؤں کی خدمات حاصل کرنا چاہتی ہے۔دیگر 2 حلقوں پی پی 167 اور پی پی 170 میں مسلم لیگ (ن) کے ٹکٹ پر پی ٹی آئی کے سابق منحرف اراکین نذیر چوہان اور امین ذوالقرنین (عون چودھری کے بھائی) کھڑے ہیں۔ بتایا جاتا ہے کہ پی ٹی آئی کی مقبولیت اور مسلم لیگ (ن) کے کیمپ میں موجود عدم اطمینان کے باعث یہ دونوں ہی مشکل میں ہیں۔ یہ بھی کہا گیا ہے کہ نذیر چوہان نے تو عوامی سطح پر اس بات کی شکایت کی ہے کہ انہیں حکمران جماعت کی جانب سے مدد نہیں مل رہی۔ امین ذوالقرنین پی ٹی آئی کے ظہیر عباس کھوکھر کا مقابلہ کر رہے ہیں جو پہلے بھی ایم پی اے رہ چکے ہیں اور سیاسی طور پر اثر و رسوخ رکھنے والے خاندان سے تعلق رکھتے ہیں۔لاہور سے آگے بڑھ کر راولپنڈی پر نظر ڈالتے ہیں جہاں پی پی 70 میں راجہ صغیر احمد اور کرنل (ر) شبیر اعوان کے درمیان مقابلہ ہورہا ہے۔ راجہ صغیر 2018ء کے انتخابات میں بحیثیت آزاد امیدوار 44 ہزار ووٹ حاصل کرکے فتح یاب ہوئے تھے اور پھر انہوں نے پی ٹی آئی میں شمولیت اختیار کرلی تھی، یہ بھی منحرفین میں شامل تھے۔ اب وہ مسلم لیگ (ن) کے ٹکٹ پر انتخاب لڑ رہے ہیں۔ ان کا مقابلہ کرنے والے شبیر اعوان ماضی میں پاکستان پیپلز پارٹی (پی پی پی) میں تھے جنہوں نے 2013ء میں پی ٹی آئی میں شمولیت اختیار کرلی تھی۔ اپنی مشہور زمانہ ویڈیو میں سابق ڈی جی آئی ایس آئی ظہیر الاسلام انہی کی حمایت میں بات کرتے ہوئے نظر آرہے تھے۔کہا جارہا ہے کہ مسلم لیگ (ن) کے راجہ ظفر الحق اپنی پارٹی کے امیدوار کی حمایت نہیں کررہے کیونکہ 2018ء میں یہاں سے ان بیٹا کا امیدوار تھا۔شیخوپورہ کے پی پی 140 میں پی ٹی آئی کے سابق رکن میاں خالد محمود اب مسلم لیگ (ن) کے ٹکٹ پر لڑرہے ہیں۔ وہ ماضی میں مسلم لیگ (ق) میں بھی رہ چکے ہیں۔ اس مرتبہ ان کا مقابلہ پی ٹی آئی کے خرم وِرک سے ہے۔ اگرچہ اس علاقے میں مسلم لیگ (ن) مضبوط ہے لیکن پھر بھی شہری علاقہ ہونے کی وجہ سے یہاں پی ٹی آئی کو کچھ امید ضرور ہے۔ یہ اطلاعات بھی موجود ہیں کہ مسلم لیگ (ن) کی مقامی قیادت خالد محمود کے حق میں نہیں ہے۔اسی طرح ایک نشست فیصل آباد کی پی پی 97 بھی ہے۔ 2018ء میں یہاں سے اجمل چیمہ بحیثیت آزاد امیدوار جیتے تھے اور بعد میں پی ٹی آئی میں شامل ہوگئے تھے۔ وہ ویسے تو پی ٹی آئی میں ہی شامل تھے لیکن انہوں نے انتخاب آزاد لڑا تھا کیونکہ ٹکٹ کسی اور کو دیا گیا تھا۔ ان کا مقابلہ پی ٹی آئی کے علی افضال ساہی سے ہے جو 2018ء میں تقریباً 5 ہزار ووٹوں کے فرق سے دوسرے نمبر پر تھے۔ 2018ء میں مسلم لیگ (ن) کے امیدوار کا تیسرا نمبر تھا اور اس مرتبہ انہیں اجمل چیمہ کی حمایت میں بیٹھ جانے پر قائل کرلیا گیا ہے۔ کہا جارہا ہے کہ یہاں تحریک لبیک پاکستان (ٹی ایل پی) کو بھی کچھ حمایت حاصل ہے۔جھنگ میں 17 جولائی کو 2 نشستوں پر ضمنی انتخابات ہورہے ہیں۔ پی پی 125 میں مسلم لیگ (ن) کے ٹکٹ پر فیصل حیات جیوانہ پی ٹی آئی کے اعظم چیلا کا مقابلہ کریں گے۔ یہ حلقہ زیادہ تر دیہی علاقے پر مشتمل ہے۔ فیصل حیات نے بحیثیت آزاد امیدوار 50 ہزار ووٹ لے کر 2018ء کے انتخابات میں فتح حاصل کی تھی اور پھر پی ٹی آئی میں شامل ہوگئے تھے۔ یہ بھی منحرف اراکین میں شامل تھے۔ دوسری جانب اعظم چیلا 2018ء میں بھی تحریک انصاف کے امیدوار تھے۔اس کے ساتھ موجود پی پی 127 میں مہر اسلم بھروانہ 2018ء میں آزاد حیثیت میں جیتے تھے اور پھر پی ٹی آئی میں شامل ہوگئے تھے۔ منحرف ہونے کے بعد انہوں نے مسلم لیگ (ن) کا ٹکٹ حاصل کرلیا اور اب مہر نواز بھروانہ کا مقابلہ کررہے ہیں جو 2018ء میں بھی پی ٹی آئی کے امیدوار تھے۔ 2018ء کے انتخابات میں اس حلقے میں جیت کا فرق ایک ہزار ووٹوں سے بھی کم کا تھا۔ ڈیزل کی قیمتیں بڑھنے اور کھاد کی کمیابی کی وجہ سے کہا جارہا ہے کہ دیہی حلقوں میں مہنگائی ایک اہم عنصر ثابت ہوسکتی ہے۔لودھراں میں بھی 2 حلقوں میں انتخاب ہورہا ہے۔ پی پی 228 میں مسلم لیگ (ن) کے امیدوار نذیر احمد بلوچ ہیں جو پی ٹی آئی سے منحرف ہوئے ہیں۔ یہ ایک معروف مقامی گھرانے سے ہیں اور ان کا مقابلہ پہلی مرتبہ انتخاب لڑنے والے پی ٹی آئی کے امیدوار عزت جاوید خان سے ہے جنہیں ایک کمزور امیدوار کے طور پر دیکھا جارہا ہے۔ تاہم 2018ء میں مسلم لیگ (ن) کے ٹکٹ پر لڑنے والے سید رفیع الدین بخاری جنہیں صرف 3 ہزار ووٹوں سے شکست ہوئی تھی، اس مرتبہ آزاد حیثیت میں انتخاب لڑرہے ہیں۔یہاں ایک دوسرا پیچیدہ عنصر مقامی الیکٹیبل گروہ کا ہے جن کی قیادت وفاقی وزیر عبدالرحمٰن کانجو کررہے ہیں۔ یہ لوگ نذیر بلوچ کے حوالے سے پس و پیش کا شکار ہیں کیونکہ وہ جہانگیر ترین کے ساتھی ہیں۔ اس کے علاوہ صدیق بلوچ جو انتخابات میں جہانگیر ترین کا مقابلہ کرچکے ہیں اور کانجو گروپ کے ساتھ ہیں۔ وہ نذیر بلوچ کی حمایت نہیں کررہے۔اس کے ساتھ والے حلقے پی پی 224 میں ایک دلچسپ صورتحال ہے۔ اگرچہ اس مرتبہ امیدوار تو وہی پہلے والے ہیں مگر مختلف ٹکٹ کے ساتھ۔ زوار حسین وڑائچ جو پہلے پی ٹی آئی کے ساتھ تھے اب مسلم لیگ (ن) کے ٹکٹ پر انتخاب لڑرہے ہیں جبکہ اس مرتبہ پی ٹی آئی کے ٹکٹ پر انتخاب لڑنے والے عامر اقبال شاہ پہلے مسلم لیگ (ن) کے ساتھ تھے۔ زوار حسین وڑائچ نے 2002ء میں سیاست میں قدم رکھا تھا جبکہ عامر شاہ ایک معروف گھرانے سے تعلق رکھتے ہیں اور ماضی میں ترین خاندان کو شکست دے چکے ہیں۔ اس علاقے میں آرائیوں کے بھی خاصے ووٹ ہیں اور کہا جارہا ہے کہ وہ اور کانجو گروپ اس مرتبہ اقبال شاہ کے ساتھ ہیں۔مظفرگڑھ میں پی پی 272 سے پی ٹی آئی کے منحرف رکن قومی اسمبلی باسط بخاری کی اہلیہ انتخاب میں حصہ لے رہی ہیں۔ اس سے قبل باسط بخاری کی والدہ اس حلقے سے ایم پی اے تھیں۔ ان انتخابات میں باسط بخاری کے بھائی بھی امیدوار ہیں جبکہ پی ٹی آئی نے سردار معظم جتوئی کو ٹکٹ دیا ہے۔ یہاں امکان ہے کہ خاندانی اختلافات ووٹ کو تقسیم کردیں گے۔ معظم جتوئی ایک مضبوط امیدوار کے طور پر دیکھے جارہے ہیں اور انہیں پی پی پی کی قدآور شخصیت قیوم جتوئی کی حمایت بھی حاصل ہے۔اس کے ساتھ والے حلقے میں پی ٹی آئی کے یاسر جتوئی کے مقابلے میں مسلم لیگ (ن) کے سبطین شاہ ایک مضبوط امیدوار ہیں لیکن حلقے میں عمران خان کے ایک بڑے جلسے نے لوگوں کو حیرت میں ڈال دیا ہے۔اتوار 17جولائی کا دن ہماری ملکی سیاست کے لیے متعدد صورتوں میں ایک تناؤ کا دن بن گیا ہے۔ خدا کرے یہ دن بخریت اور امن و امان سے گزر جائے ۔

پچھلے تقریباً تین ماہ سے پاکستان کے سب سے بڑے صوبے ، پنجاب، میں آئینی بحران بپا تھا۔ یہ بحران اُس وقت پیدا ہُوا جب سابق وزیر اعظم جناب عمران خان کی حکومت عدم اعتماد تحریک کی کامیابی کے بعد ختم کر دی گئی اور اس کے ساتھ ہی پنجاب میں پی ٹی آئی کی حکومت اور اس کے وزیر اعلیٰ پنجاب جناب عثمان بزدار کی حکومت کا بھی خاتمہ ہو گیا ۔عثمان بزدار کی حکومت کے خاتمے کے بعد نون لیگ اور اس کے اتحادیوں کی حکومت پنجاب میں تشکیل پائی اور اس کے نتیجے میں جناب حمزہ شہباز وزیر اعلیٰ پنجاب منتخب ہو گئے ۔ اُن کی راہ میں مگر اسپیکر پنجاب اسمبلی ، چودھری پرویز الٰہی ، اور گورنر پنجاب ، عمر سرفراز چیمہ صاحب، مسلسل روڑے اٹکاتے رہے ۔ اس لئے کہ عمران خان کی طرف سے دونوں کو ایسا ہی رویہ اختیار کرنے کا اشارہ دیا گیا تھا ۔ اِسی اشارے کے کارن اسپیکر پنجاب اسمبلی اور گورنر پنجاب نے نئے منتخب وزیر اعلیٰ جناب حمزہ شہباز کا حلف لینے سے انکار کر دیا ۔ پنجاب اسمبلی کی عمارت میں مارکٹائی کے قابلِ افسوس مناظر بھی ساری دُنیا نے دیکھے ۔بعد از بسیار خرابی ،یہ آئینی فریضہ بھی اسپیکر قومی اسمبلی جناب راجہ پرویز اشرف، کو ادا کرنا پڑا ۔ ابھی یہ رکاوٹ ختم نہیں ہُوئی تھی کہ پنجاب کے پی ٹی آئی کے گورنر صاحب نے نئے وزیر اعلیٰ پنجاب حمزہ شہباز کی راہ میںنئی عدالتی رکاوٹیں یوں کھڑی کرنا شروع کر دیں کہ نئے وزیر اعلیٰ کے خلاف عدالتوں کے دروازے کھٹکھٹائے گئے اور حمزہ شہباز کو مسلسل اذیت میں مبتلا رکھا گیا ۔ اس کا نتیجہ یہ نکلا کہ نئے منتخب وزیر اعلیٰ پنجاب اپنی کابینہ بھی تشکیل دینے میں ناکام رہے ۔ اس رکاوٹ میں صدرِ مملکت کے احکامات بھی نئے مسائل پیدا کررہے تھے جنہوں نے وزیر اعظم کے احکامات کے برعکس نئے گورنر جناب بلیغ الرحمن کو نیا گورنر پنجاب ماننے سے انکار کررکھا تھا ۔ خدا خدا کرکے مخصوص آئینی ایام گزرنے کے بعد نئے گورنر کی تعیناتی عمل میں آئی تو وزیر اعلیٰ پنجاب حمزہ شہباز نے بھی سُکھ کا سانس لیا ۔لیکن ابھی نئے وزیر اعلیٰ پنجاب کی سیاسی آزمائشیں ختم نہیں ہو رہی تھیں ۔ بظاہر حمزہ شہباز کے حق میں دئیے گئے لاہور ہائیکورٹ کے ایک فیصلے کو اسپیکر پنجاب اسمبلی چودھری پرویز الٰہی نے سپریم کورٹ میں چیلنج کیا تو ایک نیا دروازہ کھل گیا ۔ سپریم کورٹ کے تین رکنی بنچ نے سارے دن کی سماعت کے بعد آخر کار اپنا یہ پنچائت نما فیصلہ سنایا کہ 22جولائی 2022ء کو پنجاب اسمبلی دوبارہ وزیر اعلیٰ پنجاب کا انتخاب کرے ، یوں کہ اُس دن اسمبلی میں جتنے بھی ارکان موجود ہوں، جو اُمیدوار ان ارکان کی اکثریتی ہاں جیت جائے ، وہی وزیر اعلیٰ پنجاب کہلا سکے گا۔ تب تک حمزہ شہباز کو ”قائمقام وزیر اعلیٰ” کے نام سے یاد نہیں کیا جائیگا۔ اس فیصلے کو اسپیکر پنجاب اسمبلی چودھری پرویز الٰہی نے بھی تسلیم کیا اور حمزہ شہباز نے بھی ۔ مذکورہ تاریخ (22جولائی) آنے تک پنجاب میں 20 نشستوں پر ضمنی انتخابات بھی ہو چکے ہوں گے ۔ بظاہر یہ فیصلہ پی ٹی آئی اور چودھری پرویز الٰہی کے حق میں نظر آتا ہے لیکن دونوں فریقین نے اسے کھلے دل کے ساتھ تسلیم کیا ہے ۔ یہ ایک مستحسن منظر نامہ ہے ۔ سپریم کورٹ کے معزز جج صاحبان کا بجا کہنا ہے کہ تین مہینے کا قضیہ ہم نے ایک ہی دن کے تین سیشن میں نمٹا دیا ہے ۔ اب ہم سب 22جولائی کا انتظار کریں گے ۔ تب تک فریقین اپنا اپنا زور بھی لگالیں گے اور جوڑ توڑ بھی کر لیں گے ۔ ہمیں یقین ہے کہ کسی مزید جھگڑے اور قضئے کے 22جولائی کی شام کوئی پُر امن اور مستحسن فیصلہ سامنے آئیگا ۔اور سارے متنازع معاملات حل ہو جائیں گے ۔ سارے پنجاب کے بارہ کروڑ عوام کی بھی یہی خواہش اور تمنا ہے کہ ہمارے حکمرانوں نے اپنے اقدامات سے غریب عوام کو سُولی پر لٹکا رکھا ہے۔ عوام دعائیں کررہے ہیں کہ حکمران اور مراعات یافتہ طبقات اپنی باہمی آویزشوں سے نجات حاصل کرکے عوامی بھلائی کی طرف بھی توجہ دیں۔اللہ کرے عوام کی دعائیں مستجاب ہو جائیں ۔
٭عمران خان کاپھر جلسہ: جب سے عمران خان اقتدار سے فارغ ہُوئے ہیں ، وہ حکومت اور اسٹیبلشمنٹ کے خلاف جلسے کرنے میں مگن اور مصروف ہیں ۔اُنہوں نے موجودہ حکومت کے خلاف نام نہاد لانگ مارچ بھی کرکے دیکھ لیا لیکن یہ لانگ مارچ بُری طرح فلاپ ہُوا ۔ اُن کے اپنے لوگ بھی اس لانگ مارچ میں مطلوبہ تعداد میں شریک نہ ہو سکے ۔ اس عمل نے خان صاحب کو بہت حد تک مایوس بھی کیا اور بددل بھی ۔ وہ مگر ہمت نہیں ہارے ہیں ۔ وہ وزیر اعظم جناب شہباز شریف کی اتحادی حکومت (جسے وہ امپورٹڈ حکومت کہتے ہیں) کو دل و جان سے تسلیم کرنے پر تیار نہیں ہیں ۔یہ بالکل ایسا ہی ہے جیسے عمران خان کی حکومت کو اپوزیشن یہ کہتے ہُوئے تسلیم کرنے پر تیار نہیں تھی کہ یہ ”سلیکٹڈ” حکومت ہے ۔نجانے یہ انکار کا سلسلہ کہاں جا کر رکے گا؟ اس دوران عوام بیچارے مہنگائی اور گرانی کے ہاتھوں پِس کررہ گئے ہیں لیکن اس کی پرواہ نہ پچھلی حکومت کو تھی نہ موجودہ حکومت کو ہے ۔ خان صاحب کی حکومت بھی مہنگائی اور گرانی کا الزام پچھلی حکومتوں پر ڈالتے تھے اور شہباز شریف کی حکومت کے کارپرداز بھی اپنی ناکامیوں اور نااہلیوں کا ذمہ خان صاحب کی حکومت کے فیصلوں پر ڈال کر اپنی جان چھڑانے کی کوشش کررہے ہیں ۔ عوام مگر سب سمجھتے ہیں کہ یہ حکمران طبقات ہیں جن کی عیاشیوںاور لالچوں نے غریب پاکستانی کا بھرکس نکال رکھا ہے ۔ حکمرانوں کو مگر اس کی کوئی پروا نہیں ہے کہ عوام کیوں بلک اور کرلا رہے ہیں ۔ وہ اپنی حاکمانہ مصروفیات سے لطف اندوز ہو رہے ہیں ۔ شہباز شریف کی اتحادی حکومت کے عوام دشمن اقدامات اور فیصلوں سے عمران خان کو حکومت کے خلاف عوام کو بھڑکانے اور اپنے سیاسی مقاصد حاصل کرنے کے بھرپور مواقع مل رہے ہیں اور وہ انہیں بر وقت بروئے کار بھی لا رہے ہیں ۔ اُن کے آئے روز کے عوامی جلسے اس کے گواہ ہیں ۔ ان جلسوں میں عمران خان کے بیانات اور تقریریں دو دھاری تلوار ثابت ہو رہی ہیں ۔ ایک طرف تو وہ اتحادی حکومت کے لتّے لیتے ہیں اور دوسری طرف وہ نیوٹرلز پر سخت تنقید کررہے ہیں ۔ وہ نام لینے سے گریزاں ہیں اور صرف نیوٹرلز کی اصطلاح استعمال کرکے اپنا تنقیدی اور مخالفانہ پیغام متعلقہ حلقوں تک پہنچانے کی بھرپور کوشش کررہے ہیں ۔ 2جولائی2022ء کو اسلام آباد میں پی ٹی آئی اور عمران خان کے تازہ جلسے میں بھی یہی پیغام پہنچانے کی بھرپور کوشش کی گئی ۔ یہ جلسہ اسلام آباد کی پریڈ گراؤنڈ میں ہُوا ہے ۔ اس گراؤنڈ میں 30ہزار لوگوں کے بیٹھنے کی گنجائش ہے ۔ یوں کہا جا سکتا ہے کہ یہ جلسہ عمران خان کے اعلانات کے مطابق ”تاریخ کا سب سے بڑا جلسہ ” نہیں تھا۔ لیکن عمران خان کے چاہنے والوں نے البتہ اس میں بھرپور شرکت کی ۔ ملک بھر کے مختلف شہروں میں پی ٹی آئی کے وابستگان نے سکرینیں لگا کر اپنے لیڈر کا خطاب شوق سے سنا ۔ اس جلسے میں بھی عمران خان کا رُوئے سخن حسبِ معمول موجودہ حکومت اور نیوٹرلز کی جانب تھا۔ اس جلسے میں عمران خان نے موجودہ حکومت کو ”چوروں” کا گروہ قرار دیا اور نیو ٹرلز سے مطالبہ کیا کہ ”چوروں سے ملک کو بچا لے ۔” عمراںن خان کا یہ بیانیہ اب گھسا پٹا کہا جاتا ہے ۔ اس تقراری بیانئے میں اب عوام کی کوئی دلچسپی نہیں رہی لیکن عمران خان مسلسل اپنے سابقہ بیانئے پر ڈٹے ہیں ۔ اُن کا خیال ہے کہ یہی بیانیہ موجودہ حکومت کو گرائے گا اور نئے انتخابات کا رَن پڑے گا۔ یہ ایک مشکل خواہش ہے لیکن خان صاحب کو توقع ہے کہ اِسی کے باطن سے اُن کے خوابوں کا آدرش نکلے گا۔ آئیے دیکھتے ہیں مستقبل قریب میں عمران خان کی توقعات کہاں تک اور کب پوری ہوتی ہیں؟ اُمید پر دُنیا قائم ہے!
٭ جناب ایاز امیر پر حملہ:یوں تو اب وطنِ عزیز پاکستان میں عمومی طور پر کہا جاتا ہے کہ اس سر زمین پر کوئی صحافی محفوظ نہیں ہے ۔ اس ضمن میں بہت سی مثالیں دی جا سکتی ہیں ۔ پچھلی عمران خان کی حکومت کے دوران ملک بھر میں درجنوں ایسی مثالیں سامنے آئیں جن میں یہ بات سامنے آئی کہ کتنے ہی پاکستانی صحافی جان سے بھی گئے ، زخمی بھی کئے گئے ، اغوا بھی ہُوئے ، زندانوں میں بھی ڈالے گئے اور کتنے ہی ملازمتوں سے محروم کر دئیے گئے ۔ اس منظر نامے کی بازگشت عالمی اداروں میں بھی سنائی دی گئی ہے اور کہا گیا ہے کہ پاکستان صحافت اور صحافیوں کیلئے ایک غیر محفوظ ملک ہے ۔اب یہ بات پورے وثوق سے کہی جا سکتی ہے کہ پاکستان میں ہر صحافی کسی نہ کسی کا ہدف بن چکا ہے۔ ایسے خوف کے ماحول میں صحافت کیا خاک ہو سکتی ہے ؟ جب ہر جانب خوف اور دہشت کے سائے آس پاس منڈلا رہے ہوں ؟ اور زندگی کا ہر لمحہ غیر محفوظ بن چکا ہو؟ اس خوف کی تازہ مثال یکم جولائی 2022کو اُس وقت سامنے آئی ہے جب ملک کے ممتاز اینکر ، کالم نگار ، مقرر اور تجزیہ نویس جناب ایاز امیر پر شدید حملہ ہُوا ہے ۔ امیر صاحب نرے صحافی ہی نہیں ہیں بلکہ وہ پاکستان آرمی کے سابق ا فسر بھی ہیں اور سابق رکن اسمبلی بھی رہ چکے ہیں ۔ یوں کہا جا سکتا ہے کہ اُن کا شمار ملک کے ممتاز صحافیوں کے ساتھ ساتھ ملک کے بزرگ سیاستدانوں میں بھی کیا جاتا ہے ۔ جناب ایاز امیر اپنے دفتری فرائض کی ادائیگی کے بعد ”دنیا” ٹی وی کے دفتر ( لاہور میں میکلوڈ روڈ پر واقع) سے شام کے وقت اپنے ڈرائیور کے ساتھ باہر نکلے ہی تھے کہ تین آدمیوں نے مبینہ طور پر اُن پر حملہ کر دیا ۔ اُن کا ڈرائیور بھی حملے کی زد میں آیا اور خود ایاز امیر صاحب کا کپڑے پھٹ گئے ، اُن کا پرس بھی چھین لیا گیا اور موبائل فون بھی ۔ ایاز امیر صاحب کہتے ہیں کہ یہ حملہ اسقدر اچانک ہُوا کہ اُنہیں سنبھلنے کا موقع ہی نہ ملا ۔ حملہ آوروں نے مبینہ طور پر ماسک پہن رکھے تھے ۔ یوں اُن کی پہچان بھی دشوار بن گئی تھی ۔ یہ حملہ عین اُس وقت ہُوا ہے جب چند روز قبل ہی ایاز امیر نے اسلام آباد کی ایک تقریب میں شعلہ بار تقریر کی تھی ۔ اس تقریب کا اہتمام پی ٹی آئی نے کیا تھا اور اس کی صدارت بھی عمران خان کررہے تھے ۔ جن جن لوگوں نے ایاز امیر صاحب کی مذکورہ تقریر سُنی ہے ، اُن کا کہنا ہے کہ ایاز امیر صاحب نے اپنے خطاب میں بعض ایسی باتیں بھی کہی تھیں جو بعض اداروں اور شخصیات کو ناپسندیدہ ہو سکتی ہیں ۔ ممکن ہے ایاز امیر کے الفاظ سے بعض لوگ ناراض ہو گئے ہوں اور نوبت یہ آ گئی ہو ۔ لیکن ابھی تک حملہ آوروں کا کھُرا نہیں ناپا جا سکا ہے ۔ یہ بات شک ہی میں ہے کہ اصل ذمہ دار تھا کون؟ ایاز امیر پر حملے کی یہ خبر جنگل کی آگ کی طرح پلک جھکتے ہی سارے ملک میں پھیل گئی ۔ جس نے بھی سنا، افسوس ہی کا اظہار کیا ۔ وزیر اعظم پاکستان ، وزیر اعلیٰ پنجاب ، کابینہ کے کئی ارکان ، ملک بھر کی صحافتی برادری اور نامور سیاستدانوں نے اس اقدام کی مذمت کی ہے اورایاز امیر کے ساتھ یکجہتی کا اظہار بھی کیا ہے ۔ وزیر اعلیٰ پنجاب جناب حمزہ شہباز نے فوری طور پر ملزمان کو گرفتار کرنے کے احکامات بھی جاری کر دئیے ہیں لیکن یہ الفاظ لکھنے تک ایک بھی ملزم نہیں پکڑا جا سکا ہے ۔ پہلے بھی یہی حال ہوتا تھا ۔ صحافیوں پر حملے ہوتے تھے لیکن کبھی حملہ آور نہیں پکڑے گئے ۔ اس بار بھی ایسا ہی ہُوا ہے ۔ ہم بہرحال جناب ایاز ایسے سینئر اور معزز اخبار نویس پر حملے کی مذمت کرتے ہیں اور قانون نافذ کرنے والے اداروں سے مطالبہ بھی کرتے ہیں کہ حملے کے ذمہ داران کو کسی بھی مزید تاخیر کے بغیر گرفتار کر کے قرار واقعی سزا دی جائے ۔

پاکستان کی ساری معیشت قرضوں پر چل رہی ہے ۔ سارے ملک کے سارے شہری عالمی قرض خواہوں کی گرفت میں ہیں ۔ پاکستان کی انہی کمزوریوں کے باعث عالمی ساہوکار اداروں کے نخرے اور جبر بھی روز افزوں ہیں ۔حیرانی کی بات ہے کہ سابق وزیر اعظم جناب عمران خان موجودہ وزیر اعظم جناب شہباز شریف کی اسلئے بھی مخالفت کررہے ہیں کہ یہ حکومت آئی ایم ایف کی ”ملک دشمن” شرائط مان چکی ہے ۔ حالانکہ خانصاحب اور اُن کی حکومت بھی آئی ایم ایف کے سامنے در بدر ہو رہی تھی ۔خان صاحب کی کذب بیانیوں کے پس منظر میں گذشتہ روزاسلام آباد میں پاکستان مسلم لیگ(ن) کے سینیٹرز سے خطاب کرتے ہوئے وزیر اعظم شہباز شریف نے کہا :”گزشتہ حکومت نے بین الاقوامی مالیاتی فنڈ (آئی ایم ایف) کے ساتھ یہ معاہدہ کیا کہ وہ قیمتوں کو بڑھائے گی، گزشتہ خان صاحب کی حکومت نے آئی ایم ایف کے ساتھ یہ بھی معاہدہ کیا کہ پیٹرولیم لیوی ٹیکس میں بھی 30 روپے کا اضافہ کیا جائے گا۔تحریک انصاف کی حکومت نے جو معاہدہ کیا بعد میں ان تمام شرائط کی دھجیاں بکھیر دیں جن کی مثال یہ ہے کہ مارچ میں دنیا بھر میں تیل کی قیمتیں بڑھ رہی تھیں مگر تحریک انصاف کی حکومت نے قیمتوں کو کم کیا۔ ساڑھے تین برس کی حکومت میں ان کو یہ یاد نہیں آیا کہ غریب عوام کو ریلیف دیں مگر رواں برس مارچ میں جب انہوں نے دیکھا کہ شکست ان کا مقدر ہے تو پھر اچانک تیل کی قیمتیں کم کردیں۔رواں سال اپریل میں جب میں نے حلف اٹھایا تو سب سے پہلے یہ شاک لگا کہ گزشتہ حکومت نے فنڈ مہیا نہیں کیے تھے۔۔ ہمسایہ ممالک ہم سے آگے نکلے گئے اور ہم وہیں کے وہیں ہیں لیکن میں خدا کا شکر ادا کرتا ہوں کہ پرسوں چین نے ایسے حالات میں ہمیں 2.3 ارب ڈالر کا قرض دیا ہے۔ پاکستان کو جن مشکلات کا سامنا ہے وہ بے پناہ ہیں اور وہ اس لیے ہیں کہ 75 برس گزرنے کے باوجود اب بھی ہم کشکول لے کر پھرتے ہیں۔ میں چین، سعودی عرب، متحدہ عرب امارات، قطر سمیت دیگر دوست ممالک کی بات ہمیشہ کرتا ہوں جنہوں نے ہمیشہ مشکل حالات میں پاکستان کا مالی طور پر، سیاسی طور پر اور سفارتی محاذ پر ساتھ دیا۔ وہ اقوام جو ہم سے بہت پیچھے تھیں اب وہ ہم سے بہت آگے نکل چکی ہیں وہ اس لیے کہ انہوں نے اپنے راستے کا تعین کیا، وہ یکجا ہوگئے، اتحاد اور تنظیم کے ساتھ آگے بڑھے”۔وزیر اعظم جناب شہباز شریف نے مزیدکہا:” اب ماضی میں جھانکنے اور رونے سے کچھ نہیں ہوگا، ہمیں آج بھی اگر ہمیں فیصلہ کرنا ہے کہ ہمیں اپنے حالات کی اصلاح کرنی ہے، قوم کی تقدیر بدلنی ہے تو ہمیں خود فیصلے کرنے ہوں گے۔ چین کب تک ہماری مدد کرے گا، چین کہتا ہوگا کہ یہ کب تک ہم سے مانگیں گے، اسی طرح سعودی عرب بھی سوچتا ہوگا کہ یہ ہمارے بھائی ہیں یہ کب اپنے پاؤں پر کھڑے ہوں گے۔ تحریک انصاف کی حکومت نے گندم، چینی اور دیگر اشیا پر سبسڈی دے کر ملک کا خزانہ خالی کردیا اور اسکینڈل پر اسکینڈل کرتے رہے جس کی وجہ سے ہم قیمتوں میں اضافہ کرنے پر مجبور ہیں اور مسلم لیگ کے قائد نواز شریف سمیت تمام قیادت اس بات پر دکھی ہے کہ قیمتیں بڑھ رہی ہیں لیکن سب کے ذہن میں ایک بات تھی کہ پہلے ریاست پھر سیاست، اگر ریاست ہوگی تو سیاست بھی ہوگی۔ آئی ایم ایف تلا ہوا تھا کہ معاہدے کی تمام شقیں پوری کی جائیں اور ہمیں اعتبار نہیں ہے، ریاست کا طرہ امتیاز ہوتا ہے کہ معاہدے کی پاسداری کی جائے، یا تو آئی ایم ایف کی شرطیں نہ مانتے کہ ہم یہ کام نہیں کر سکتے لیکن شرطیں مان کر ان پر دستخط کرنے کے بعد ان کی دھجیاں اڑا دیں، تو آئی ایم ایف نے کہا کہ آپ بھی تو پاکستان کی حکومت ہیں، ہم آپ پر کس طرح اعتبار کریں۔ آئی ایم ایف سے ہماری شرائط طے ہو گئی ہیں ۔ آئی ایم ایف سے معاہدے کے نتیجے میں راتوں رات خوشحالی نہیں آئے گی، ہمیں اپنی مالیاتی پوزیشن کو مستحکم کرنا ہے جس کے بعد ورلڈ بینک اور ایشین بینک بھی ہم سے رجوع کریں گے اور آئی ایم ایف سے معاہدے کے بعد اسلامی ممالک سے بھی تعاون پروان چڑھے گا۔تاریخ میں پہلی بار امیر طبقے پر ٹیکس لگایا گیا ہے کیونکہ غریب آدمی نے ہر دور میں قربانی دی ہے اور وہ ہی پاکستان کا اصل معمار ہیں۔ پاکستان میں گیس کے ذخائر اب کم ہو رہے ہیں اور ہمیں اب گیس کی ضرورت ہے مگر گیس مل نہیں رہی کیونکہ پچھلی حکومت نے ایسا کوئی معاہدہ نہیں کیا۔ گزشتہ حکومت نے چین پر اتنی غیرضروری تنقید کی، ان پر الزامات عائد کیے کہ سی پیک پلانٹس میں کرپشن ہوئی لیکن اس کے باوجود بھی چین نے یقین دہانی کروائی ہے کہ ہم منصوبوں کو آگے بڑھائیں گے۔ اب ہمیں فیصلہ کرنا ہے کہ ہمیں قوم کو ترقی کی راہ پے لے جانا ہے اور ہم اس لیے کوئی موقع ہاتھ سے جانے نہیں دیں گے”۔ وزیر اعظم شہباز شریف کا خطاب اور اس کی معنویت اپنی جگہ مگر یہ بھی حقیقت ہے کہ اب پاکستان کا ہر شخص بلا تخصیص جانتا ، مانتا اور اس حقیقت پر یقینِ کامل رکھتا ہے کہ پیارے وطنِ عزیز کو حکمرانوں اور طاقتوروں کی کرپشن نے برباد کیا ہے ۔پاکستان کا ہر غریب اور تہی دست پاکستان کے کسی بھی دولتمند ، اسراف پسند اور طاقت کے نشے میں سرشار کسی مقتدر کو دیکھتا ہے تو میر تقی میر کے بقول پکار اُٹھتا ہے :امیر زادوں سے دِلّی کے مت ملا کر میر/ کہ ہم غریب ہُوئے ہیں اِنہی کی دولت سے!!پاکستان کے سابقہ اور موجودہ حکمرانوں نے ایک عام پاکستانی کو معاشی طور پر جس طرح در بدر اور خوار کیا ہے ، اس ذلالت اور تہی دستی کا کوئی اثر اِن اہلِ زر ، مقتدروں اور سرکاری مراعات یافتہ گروہوں اور طبقات پر قطعی نہیں پڑ رہا۔ جب ملک کے سارے سرکاری وسائل پر یہ استحصالی طبقہ سانپ بن کر بیٹھا ہوگا تو وہ کیوں کسی غریب کا بھلا اور خیر خواہی کا مظاہرہ کرے گا؟ وہ اپنے ہی پیٹی بھائیوں ، اپنے ہی ہم منصبوں اور ہم نفسوں کے مفادات کا تحفظ کرے گا۔حیرت مگر یہ ہے کہ اب جبکہ نئے حالات کے جبر کے تحت غریب آدمی کو دو وقت کی روٹی کمانا ، بجلی گیس کے بل بھرنا، بچوں کی فیسیں ادا کرنا ، ادویات خریدنا ، ویگنوں اور بسوں پر سفر کرنا دشوار تر ہو چکا ہے، ہمارے ایک وفاقی وزیر صاحب نے تازہ ترین ارشاد فرمایا ہے کہ ”دُنیا میں کئی ممالک ایسے ہیں جنہوں نے ہماری جتنی کرپشن کی لیکن وہ ترقی کر گئے ۔” یہ وزیر صاحب مبینہ طور پر خاصے پڑھے لکھے ، شائستہ مزاج اور مڈل کلاسئیے کہے جاتے ہیں لیکن وہ پاکستان میں کرپشن اور کرپٹ افراد کی مذمت کرنے کے برعکس یہ دلیل دے رہے ہیں کہ کرپشن جاری بھی رہے تو بھی ملک ترقی کر سکتا ہے ۔ تو پھرسوال کیا جا سکتا ہے کہ پاکستان میں کرپشن تو ”اعلیٰ ترین ”پیمانے پر ہو چکی ہے ، لیکن ترقی اعلیٰ ترین پیمانے پر نظر کیوں نہیں آ رہی ؟المیہ یہ ہے کہ جب غریب عوام اور مسائل پر نظر رکھنے والے اخبار نویس ایسے وزیروں کے ایسے بیانات پر استفسار کرتے ہیں تو سرکار کی جانب سے اُلٹا کہا جاتا ہے: لو جی، یہ لوگ تو ہر بات کا مذاق اڑانا شروع کردیتے ہیں ۔ یہی وزیر صاحب ابھی چند دن پہلے ہی پاکستان کی غربت کی ماری بے کس اور بے بس عوام کو مطالبہ کر چکے ہیں کہ ملک بچانا ہے تو اپنی چائے کی پیالیاں کم کر دیں ۔ارے، آپ لوگ اقتدار کے ایوانوں میں پہنچ کر غیر محتاط زبان کے خوگر کیوں ہو جاتے ہیں ؟ ایسی زبان کیوں بروئے کار لاتے ہیں جو غریب عوام کے زخموں پر نمک پاشی کے مترادف ہو؟ المیہ اور ظلم یہ ہے کہ عوام سے قربانیاں مانگنے اور عوام کی کھال اُتارنے والے تو ہر دَور میں ہمارے اوپر مسلط ہوتے آ رہے ہیں لیکن عوام کی خاطر اپنی سرکاری مراعات، سہولتیں اور عیاشیاں کم کرنے پر تیار نہیں ہوتے ۔ چینی مہنگی ہوجائے تو حکمران عوام سے کہتے ہیں : چائے میں چینی کے کم دانے استعمال کر لیں گے تو کیا قیامت آ جائیگی؟ گھی اور کوکنگ آئل غریب کی پہنچ سے دُور ہُوا تو حکمران مشورہ دیتے ہیں کہ گھی استعمال نہ کریں ، سالن میں دہی ڈالا کریں ۔ ٹماٹر اور پیاز بازار سے غائب ہو کر آسمان سے لگ جائیں تو نہائت بے حسی سے حکمران طبقہ غریب عوام کو حکم دیتا ہے: ملک کی خاطر چند دن ٹماٹر اور پیاز نہیں کھائیں گے تو مر تو نہیں جائیں گے ۔ بلا تکان اور بے حسی سے یہ مشورے دئیے جاتے ہیں لیکن ہمارا ہر قسم کا حکمران طبقہ اپنی سرکاری مراعات میں رتی بھر کمی کرنے کیلئے تیار نہیں ہے ۔ ابھی اگلے روز اسلام آباد میں ہم نے یہ ظالمانہ تماشہ دیکھا کہ ایک وفاقی وزیر نے اپنے گھر والوں کیلئے ایک مہنگے ریستوران سے کھانا منگوانے کیلئے پانچ سرکاری اور مہنگی گاڑیاں مذکورہ ریستوران بھیج دیں ۔ سوشل میڈیا نے اس ظلم کو بے نقاب کیا تو حکمران بیک زبان بول اُٹھا: لیجئے، اب یہ سوشل میڈیا چائے کی پیالی میں طوفان اُٹھا رہا ہے ۔عام پاکستانی غریب آدمی کو ایک لٹر پٹرول خریدنا دشوار تر ہو رہا ہے اورایک وفاقی وزیر ہے کہ گھر والوں کیلئے بازار سے کھانا منگوانے کیلئے پانچ پانچ سرکاری گاڑیاں بازار بھیج رہا ہے اور اُسے اس بات کی کوئی پروا نہیں کہ ان گاڑیوں پر کتنا پٹرول خرچ ہورہا ہے اور گاڑیوں کے ڈرائیورز کی سرکاری تنخواہوں میں غریب عوام کا خون پسینہ شامل ہے ۔ ہمارے بے حس اور استحصالی حکمرانوں کے اِنہی اللوں تللوں کے باعث غریب آدمی ویگن اور بس کے مہنگے کرایوں سے تنگ آ کر بائیسکل سواری پر آ گیا ہے ۔ اس کا بھی ہماری بدمعاشیہ مذاق اُڑاتی ہے اور کہتی ہے : سائیکل سواری سے صحت بنتی ہے ۔ خود مگر یہ بدمعاشیہ ایسی ”صحت” بنانے کی طرف مائل نہیں ہوتی ۔مہنگے پٹرول اور گراں ڈیزل نے غریب عوام کا بھرکس نکال دیا ہے ۔ لیکن ملک کی سرکاری اشرافیہ کو مفت پٹرول اور ڈیزل دئیے جانے کا سلسلہ بند نہیں کیا جا سکا ہے ۔ عوام چاہے بلکتے رہیں ۔ ایسے میں عوام سے ”ہم آہنگی” اور ”یکجہتی” دکھانے کیلئے یہ سرکاری مراعات یافتہ طبقہ ڈرامے کرنے سے بھی باز نہیں آتا ۔ مثال کے طور پر: پٹرول مہنگا ہُوا تو پیپلز پارٹی کے سینیٹر ، جناب بہرا مند تنگی، یوں سینیٹ میں بائیسکل پر تشریف لائے کہ ایک ملازم نے اُنہیں سائیکل پر براجمان کررکھا تھا اور ملازم خود سائیکل کے ساتھ ساتھ دَوڑ رہا تھا۔ یہ مزید ظلم کا منظر تھا۔ ہمارے سابق وزیر اعظم ، جناب عمران خان، نے بھی مغربی ممالک کے وزرائے اعظموں کے تتبع میں سائیکل پر دفتر جانے کا اعلان کیا تھا۔ عوام اس سادگی پر مر مٹے تھے لیکن خان صاحب نے سائیکل چلانے کا عملی مظاہرہ کرنے اور قوم کیلئے بچت کرنے کا مظاہرہ نہ کیا۔ اُلٹا ہیلی کاپٹر کو اپنے گھر اور دفتر کے درمیان بے دریغ گھماتے رہے ۔ اُن کے سرکاری پروٹوکول پر اب بھی ، جبکہ غریب عوام پرپٹرول کے بم آئے روز چلائے جارہے ہیں، ماہانہ کروڑوں روپے کا پٹرول صرف ہورہا ہے ۔ ہمارے سبھی حکمران ، جمہوری ہوں یا غیر جمہوری، اپنے اقدامات سے عوام کامذاق اُڑانے اور اُن کے زخموں پر نمک چھڑکنے میں یکساں خصوصیات کے حامل ہیں ۔ جنرل ضیاء الحق ایسے جابر آمر نے بھی ایک بار راولپنڈی میں سائیکل چلاکر اپنے دفتر پہنچنے کا مظاہرہ کیا تھا، یوں کہ سارے راولپنڈی کا دَم ناک میں آ گیا تھا۔ اچھا ہی ہُوا یہ مظاہرہ ایک ہی بار کیا گیا۔وگرنہ یہ آمرانہ شوق عوام پر ایک اور عذاب بن کر نازل ہوتا رہتا۔ ہمارے یہ حکمران بعض مغربی حکمرانوں کی نقل میں سائیکل سواری کا ڈھونگ رچانے کی ناکام کوشش کرکے خود اپنا بھی اور عوام کا مذاق اُڑاتے ہیں ۔ قوم کے ”غم” میں دُبلے ہونے والے ہمارے یہ حکمران کسی دن یوں کریں کہ اسلام آباد کی منسٹرز کالونی سے اپنے سبھی بچوں کو سائیکلوں پر اسکول اور کالج بھیجنے کا مظاہرہ کریں تو قوم بھی دیکھ سکے کہ ان مراعات یافتہ طبقات کے بچے دھوپ کی حدت سہتے ہُوئے، سردی کی شدت برداشت کرتے ہُوئے اور برساتوں کی بارشوں میں بھیگتے ہُوئے کیسے لگتے ہیں ؟ اور کیا محسوس کرتے ہیں؟ عوام سے ہر روز قربانی کا مطالبہ کرنے والے یہ مراعات یافتہ طبقات، کیا قوم و ملک کے وسیع تر مفاد اور قومی بچت کی خاطر ہمارے یہ وزیر، مشیر اور اعلیٰ ترین سرکاری افسر یہ چھوٹی سے قربانی بھی نہیں دے سکتے ؟

17جون2022ء اس لحاظ سے پاکستان کیلئے خوش قسمت ثات ہُوا ہے کہ اس تاریخ کو پاکستان کے ”فیٹف ”(FATF)سے نکلنے کے امکانات واضح اور روشن ہو گئے ہیں ۔ فیٹف کی تلوار پاکستان کے سر پر کئی برسوں سے لٹک رہی تھی ۔ اس سے پاکستان کا عالمی امیج بھی منفی طور پر متاثر ہورہا تھا اور پاکستان کو سفارتی اور تجارتی محاذ پر کئی مشکلات کا مسلسل سامنا کرنا پڑ رہا تھا۔ اب انشاء اللہ ان مسائل سے نکلنے کی سبیل پیدا ہو گئی ہے ۔ خاص بات یہ ہے کہ اس بار بھی بھارت کی یہی کوشش تھی کہ پاکستان یا تو بدستور گرے لسٹ ہی میں رہے یا پاکستان کو بلیک لسٹ میں شامل کر دیا جائے ۔ الحمد للہ، پاکستان کے ازلی دشمن بھارت کو منہ کی کھانا پڑی ہے ۔ پاکستان کے فیٹف کی گرے لسٹ سے خارج ہونے کے ممکنات پوری طرح عیاں ہو گئے ہیں ۔ خبروں کے مطابق:فنانشل ایکشن ٹاسک فورس (ایف اے ٹی ایف) نے چار روزہ اجلاس کے بعد کہا ہے کہ پاکستان نے 34 نکات پر مشتمل 2 ایکشن پلان کے تمام نکات پر عمل کر لیا ہے۔ایف اے ٹی ایف کے صدر مارکس پلیئر نے منگل کو جرمنی کے شہر برلن میں شروع ہونے والے چار روزہ اجلاس کے بعد پریس کانفرنس کرتے ہوئے کہا :” پاکستان نے 34 نکات پر مشتمل 2 علیحدہ ایکشن پلانز کی تمام شرائط پوری کرلی ہیں، تاہم پاکستان کو آج گرے لسٹ سے نہیں نکالا جارہا ہے۔ ایف اے ٹی ایف کورونا صورتحال کا جائزہ لے کر جلد از جلد پاکستان کو دورہ کرے گا جس کے بعد پاکستان کو گرے لسٹ سے خارج کیا جائے گا۔پاکستان نے فیٹف سے نکلنے کی جتنی کوششیں کی ہیں، ہم انہیں تسلیم کرتے ہیں۔ یہ پاکستان کی سلامتی اور استحکام کے لیے اچھا ہے۔ پاکستان کو اس بات کو یقینی بنانا ہوگا کہ اس نے منی لانڈرنگ اور دہشت گردوں کی فنڈنگ پر مؤثر طریقے سے قابو پالیا ہے۔ پاکستان نے اقوام متحدہ کی جانب سے نامزد کیے گئے دہشت گرد گروپوں کے سینئر رہنما اور کمانڈرز کے خلاف دہشت گردوں کی مالی معاونت کی تحقیقات میں بہتری کا مظاہرہ کیا ہے، اس کے ساتھ منی لانڈرنگ کی تحقیقات اور قانونی چارہ جوئی میں مثبت رجحان دیکھا گیا ہے۔ پاکستان نے 2021ء کے ایکشن پلان پر 2021ء میں وقت سے قبل ہی عمل کر لیا تھا”۔یہ پاکستان کیلئے مبارک اور مسعود لمحات ہیں ۔ خاص طور پر بھارت کی شکست پر تمام پاکستانی دلی طور پر خوش ہیں ۔ اس کامیابی پر ہر کوئی کریڈٹ لینے کی کوشش کررہا ہے لیکن سچی بات یہ ہے کہ سارے پاکستان ، پاکستان کے تمام اداروں اور متعلقہ شخصیات کی مجموعی کوششوں کی شاندار کامیابی ہے ۔ اس کامیابی میں انفرادی کوششیں بھی شامل ہیں اور اجتماعی بھی ۔ اس ضمن میں اگر افواجِ پاکستان کا یہ دعویٰ ہے کہ” اس کامیابی میں GHQکے کور سَیل نے ملک کا نام بلند کیا ہے” تو یہ بالکل درست ہے ۔ اگر سابق وزیر اعظم جناب عمران خان یہ دعویٰ کرتے ہیں کہ ”ملک کو فیٹف سے نکالنے میں ہماری کارکردگی مثالی ہے” تو یہ بات بھی تسلیم کی جانی چاہئے ۔ اور اگراِس عظیم کامیابی پر موجودہ حکومت کی وزیر مملکت برائے خارجہ محترمہ حنا ربانی کھر دل بڑا کرکے یہ کہتی ہیں کہ” جو مرضی ہے کریڈٹ لے لے، اصل فتح پاکستان کی ہے” تو اس بیان کی بھی تحسین کی جانی چاہئے کہ اس بیان میں وسیع القلبی کے جملہ احساسات و خیالات شامل ہیں ۔ اس ضمن میں حنا ربانی کھر نے فوری طور پر اپنے ٹوئٹر پیغام میں کہا:” قوم کو مبارکباد۔ ایف اے ٹی ایف نے دونوں ایکشن پلان کو مکمل قرار دیا ہے۔ عالمی برادری نے متفقہ طور پر ہماری کوششوں اور کاوشوں کو تسلیم کیا ہے، ہماری یہ کامیابی 4 سال کے ہمارے مشکل اور چیلنجنگ سفر کا ثمر ہے۔ پاکستان اس کامیابی کے سفر کو جاری رکھنے اور اپنی معیشت کو فروغ دینے کے عزم کا اعادہ کرتا ہے۔ایف اے ٹی ایف پر کام کرنے والی ساری پاکستانی ٹیم کو بھی مبارکباد اور شاباش ”۔وزیر اعظم پاکستان جناب شہباز شریف نے بھی خوش ہو کر بیان دیتے ہُوئے کہا ہے :” الحمد للہ، پاکستان کی وائٹ لسٹ کی طرف واپسی بڑی کامیابی ہے ۔ پوری قوم کو مبارکباد۔”وزیر دفاع، خواجہ آصف، نے بھی اس بارے قوم کو تہنیت دی ہے ۔ آرمی چیف جنرل قمر جاوید باجوہ نے اس بارے بیان دیتے ہُوئے کہا ہے :’پاکستان کی طرف سے ایف اے ٹی ایف ایکشن پلان کی تکمیل بڑی کامیابی ہے۔پاکستان کی وائٹ لسٹ میں شمولیت کی راہ ہموار کرنے میں یہ یادگار کوشش ہے۔جنرل ہیڈکوارٹر کے کور سیل نے قومی کوششوں کو آگے بڑھایا اور سول ملٹری ٹیم نے ایکشن پلان پر عمل درآمد کو ممکن بنایا جس کے سبب پاکستان کا سر فخر سے بلند ہوا”۔ پیپلز پارٹی کی قیادت بھی اس کامیابی پر مسرت کا اظہار کررہی ہے ۔خیال رہے کہ ایف اے ٹی ایف کے 206 ارکان اور مبصرین کی نمائندگی کرنے والے مندوبین نے مکمل اجلاس میں شرکت کی۔ مبصرین میں انٹرنیشنل مانیٹری فنڈ (آئی ایم ایف)، اقوام متحدہ، ورلڈ بینک اور ایگمونٹ گروپ آف فنانشل انٹیلی جنس یونٹس شامل تھے۔بین الاقوامی میڈیا کی حالیہ رپورٹس میں بھی اس ‘خاموش لابنگ’ کا ذکر کیا گیا تھا جس کی قیادت چین کر رہا ہے اور ایک بھارتی خبر رساں ادارے نے اطلاع دی تھی کہ اجلاس میں ممکنہ طور پر پاکستان کو ان ممالک کی فہرست سے نکالنے کا فیصلہ کیا جائے گا جو زیر نگرانی ہیں، جسے عام طور پر ‘گرے لسٹ’ کہا جاتا ہے۔پاکستان چار سال فیٹف کی گرے لسٹ میں شامل رہا ہے ۔سابق وزیر خزانہ شوکت ترین نے کہا ہے کہ ‘گرے لسٹ سے نکلنا’ حماد اظہر کا ایک اور بڑا کارنامہ ہے جو سابق وزیر توانائی اور انسداد منی لانڈرنگ اور انسداد دہشت گردی کی مالی معاونت پر کوششوں کے لیے حکومت کے اعلیٰ رابطہ کار بھی تھے”۔سابق حکومت میں وزیر برائے انسانی حقوق شیریں مزاری نے اسے پی ٹی آئی کی سابقہ حکومت کی ایک اور کامیابی قرار دیا۔ پاکستان کو یہ کامیابی ایسے موقع پر ملی ہے جب پاکستان کے سب سے بڑے صوبے، پنجاب، کا بجٹ بھی کامیاب ہو گیا ہے ۔ اگرچہ اس بجٹ کو پیش کرنے اور اسے کامیاب بنانے کیلئے وزیر اعلیٰ پنجاب جناب حمزہ شہباز شریف کو بڑے مسائل اور رکاوٹوں سے گزرنا پڑا ہے ۔ ویسے تو پنجاب میں دو بجٹ اجلاس ہوئے ہیں، ایک اسپیکر چودھری پرویز الٰہی نے پنجاب اسمبلی کی بلڈنگ میں منعقد کیا، دوسرا اجلاس گورنر پنجاب جناب بلیغ الرحمن کی ہدایت پر ایوان اقبال میں ہوا۔ حکومت نے ایوان اقبال میں بجٹ پیش کیا جب کہ اپوزیشن نے پنجاب اسمبلی میں اجلاس کیا۔ایک عمومی رائے یہی ہے کہ گورنر کی ہدایت پر بلایا گیا اجلاس قانونی ہے تاہم دونوں فریق اپنے اپنے اجلاس کو قانونی اور آئینی کہہ رہے ہیں۔ اب یہ تو عدالت ہی طے کر سکتی ہے کہ کس کا اجلاس قانونی ہے اور کس کا غیر قانونی ہے لیکن اپوزیشن نے تاحال عدالت جانے کا کوئی اعلان نہیں کیا ہے۔حکومت کے پاس ایوان اقبال میں بجٹ اجلاس بلانے کا ایک جواز ہے کہ اس نے دو دن تک معاملات حل کرنے کی کوشش کی لیکن جب معاملات پوائنٹ آف نو ریٹرن پر پہنچ گئے تو اس کے پاس متبادل حکمت عملی پر جانے کے سوا کوئی آپشن نہیں تھا، دو دن تک حکومت پنجاب اسمبلی میں بجٹ پیش کرنے کی کوشش کرتی رہی لیکن اسپیکر اسمبلی چوہدری پرویز الہیٰ نے بجٹ پیش نہیں کرنے دیا۔اسپیکر کی شرط تھی کہ پہلے آئی جی پنجاب اور چیف سیکریٹری پنجاب کو ایوان میں لایا جائے، پھر بجٹ پیش ہوگا جب کہ حکومت چیف سیکریٹری اور آئی جی کو ایوان میں پیش کرنے کے لیے تیار نہیں تھی۔ حکومت اسپیکر اسمبلی کی رولنگ پر عطاء تارڑ کو ایوان سے باہر بھیجنے کے لیے تو تیار ہو گئی لیکن حکومت کو علم تھا کہ اگر آئی جی اور چیف سیکریٹری کو ایوان میں لایا گیا تو کہیں اسپیکر ایسی رولنگ نہ دے دیں جس سے بعد میں مسائل پیدا ہو جائیں گے، اس لیے معاملات ڈیڈ لاک کا شکار ہو گئے۔اگر اس محاذ آرائی کا جائزہ لیا جائے تو یہ لگتا ہے کہ حکومت جیت گئی ہے اور اپوزیشن ہار گئی ہے، اگر حکومت کو پنجاب اسمبلی کی عمارت میں ہونے والے اجلاس میں بجٹ پیش کرنے دیا جاتا تو حکومت کے لیے مشکلات زیادہ تھیں کیونکہ بعد میں بجٹ پاس کرانے کے لیے ووٹ پورا کرنا ایک مشکل مرحلہ ہوتا، ہر کٹوتی کی تحریک پر ووٹ پورے رکھنا حکومت کے لیے لازم ہوتا ہے۔پنجاب اسمبلی کی اس وقت عددی تقسیم ایسی ہے کہ حکومت اور اپوزیشن کے درمیان بمشکل ایک دو ووٹ کا فرق ہے۔ ایک دو ووٹ کا فرق بہت معمولی ہوتا ہے،ایسے میں ووٹنگ کے لیے ہر وقت ووٹ پورے رکھنا ایک مشکل کام ہوتا ہے۔ لیکن جب اپوزیشن نے ایوان اقبال کے بجٹ اجلاس میں شرکت سے ہی انکار کر دیا ہے تو حکومت کو واک اوور مل گیا ہے۔ اب ووٹ پورے کرنے کا درد سر ہی ختم ہو گیا، اس لیے اگر سیاسی طور پر دیکھا جائے تو حکومت کا اس ساری لڑائی میں فائدہ ہو گیا ہے۔اسپیکر چوہدری پرویز الٰہی کو اندازہ ہونا چاہیے تھا کہ گورنر اجلاس ختم بھی کر سکتے ہیں اور نیا اجلاس بلا بھی سکتے ہیں۔ چوہدری پرویز الٰہی کو اندازہ نہیں تھا کہ گورنر کیا کر سکتے ہیں۔ اگر انھیں ان امور کا ادراک نہیں تھا تو یہ سیاسی اور قانونی غلطی ہی کہی جا سکتی ہے کیونکہ چودھری پرویز الٰہی نے جیتی ہوئی گیم ہار دی ہے۔ انھوں نے مشکل میں پھنسی ہوئی حکومت کو تمام مشکلات سے آزاد کر دیا ہے۔ اب جب کہ اپوزیشن نے بجٹ اجلاس کا بائیکاٹ کر دیا ہے، ایک طرح سے یہ حکومت کی مدد ہو گئی ہے۔لوگ سوال کرتے ہیں کہ پنجاب میں یہ بحرانی کیفیت کب تک جاری رہے گی؟ خیال یہ ہے کہ یہ سارا کھیل 17جو لائی2022ء کو اپنے منطقی انجام پر پہنچ جائے گا۔ پنجاب کے بیس ضمنی حلقوں میں ضمنی انتخاب ہو رہا ہے۔ اگر حکومت ان میں سے اکثریتی حلقے جیت جاتی ہے تو چوہدری پرویز الہیٰ اور تحریک انصاف کا کھیل ختم۔ اسی طرح اگر تحریک انصاف نے اکثریتی سیٹیں جیت لیں تو حمزہ شہباز کی وزارت اعلیٰ کا کھیل ختم ہوجائے گا۔اس لیے پنجاب کے بیس حلقوں میں ضمنی انتخابات کے بعد ہی پنجاب میں بحران ختم ہوگا، اس سے پہلے استحکام ممکن نہیں۔ تحریک انصاف کا یہ دعویٰ ہے کہ ان کے پاس اکثریت ہے لیکن وہ حمزہ شہباز کے خلاف عدم اعتماد نہیں لا رہے کیونکہ ووٹ پورے نہیں ہیں۔اسی طرح حکومت کے پاس بھی ووٹ پورے نہیں ہیں۔ اسی لیے چوہدری پرویز الٰہی کے خلاف تحریک عدم اعتماد پر ووٹنگ نہیں ہو رہی۔ دونوں ہی پھنسے ہوئے ہیں۔ہمارے نزدیک یہ بحرانی کیفیت عارضی ہے۔ چوہدری پرویز الٰہی کو مستقبل کو سامنے رکھ کر فیصلے کرنے چاہییں۔ انھیں اس محاذ آرائی کا کوئی فائدہ نہیں ہورہا ہے کیونکہ اس طرح کی محاذ آرائی ان کی سیاست کی پہچان نہیں ہے۔ لوگ حیران ہیں کہ پنجاب اسمبلی میں یہ کیا تماشہ ہورہا ہے؟سچی بات یہ ہے کہ پنجاب اسمبلی کے اسپیکر ، چودھری پرویز الٰہی، نے وزیر اعلیٰ پنجاب، میاں حمزہ شہاز، کو تنگ کرنے اور اُنہیں ناکوں چنے چبانے کا جو راستہ اختیار کررکھا ہے، یہ دراصل پرویز الٰہی ہی کی سیاست کیلئے مہلک اور خطرناک ہے ۔ لوگ بجا طور پر حیرت کا اظہار کرتے ہُوئے کہتے ہیں کہ یہ محاذ آرائی تو گجراتی چودھریوں کا کبھی شعار نہیں رہا ہے ۔ عمران خان کے پیچھے لگ کر مگر پرویز الٰہی اور اُن کے صاحبزادے مونس الٰہی نے سبھی راستے بند کردئیے ہیں ۔ شنید ہے کہ وزیر اعلیٰ پنجاب ، حمزہ شہباز، کو ان مسائل سے نکالنے کیلئے جناب آصف علی زرداری نے قاف لیگ کے سربراہ چودھری شجاعت حسین سے بھی رابطہ کیا ہے اور درمیان کی کوئی راہ نکالنے کی کوشش کی ہے لیکن فی الحال اس میں کامیابی نہیں مل سکی ہے ۔ گویا کہا جا سکتا ہے کہ وزیر اعلیٰ پنجاب کے گمبھیر مسائل اُسی وقت ختم ہوں گے جب اگلے ماہ ضمنی صوبائی انتخابات میں نون لیگ اکثریتی سیٹیں جیت جاتی ہے ۔ تب تک وزیر اعلیٰ پنجاب حمزہ شہباز کو اِنہی مسائل سے نباہ کرنا پڑے گا۔ یہ اُن کی سیاسی بصیرت کا بھی امتحان ہے ۔